Dak Lak jing sa hlăm dŭm krĭng pla mjing boh durian phŭn mơ̆ng kluôm ala, hŏng ênhă êbeh 41.000 ha, hnơ̆ng mâo thŭn 2026 hlăm brô 500.000 ton. Hdră bruă bi mklă hdră pla mjing dưi pŏk ngă mơ̆ng 26/10 truh 26/11/2026 ti 35 să, ƀuôn hgŭm, hŏng 76 adŭ mtô bi hriăm. Mta phŭn mđing ktrâo lač kơ ƀĭng ngă lŏ hma hluê ngă hdră pla mjing VietGAP; ba yua hbâo pruê, êa drao răng mgang mnơ̆ng pla mjing djŏ hdră; kriê dlăng phŭn mkăp êa, hrui pĕ, mkra mjing, rơ̆ng klei doh ê ƀăt mnơ̆ng dhơ̆ng leh anăn tui duah phŭn agha.

Mbĭt anăn jing ktrâo lač kơ dŭm klei kčah mtrŭn kơ mrô krĭng pla mjing, kriê dlăng hnơ̆ng tŭ jăk leh anăn mđĭ boh tŭ bruă mkra mjing boh durian. Anôk mtrŭt mjhar bruă ngă lŏ hma čar Dak Lak gĭt gai mkŏ mjing klei hriăm mjuăt, bi hgŭm hŏng dŭm anôk bruă thơ̆ng kơ bruă leh anăn bruă sang čư̆ êa alŭ wăl ktrâo lač, ktuê dlăng bruă ba yua hdră mnêč leh hriăm mjuăt. Hdră bruă srăng đru kơ ƀĭng ngă lŏ hma mđĭ klei thâo săng, ƀrư̆ ƀrư̆ bi mlih klei mưng ngă bruă, hluê ngă hdră pla mjing hluê si hnơ̆ng čuăn VietGAP leh anăn čŏng kriê dlăng ênoh mrô krĭng pla mjing. Mơ̆ng anăn, mkŏ mjing tur knơ̆ng mđĭ hnơ̆ng tŭ jăk, krơ̆ng kjăp klei đăo knang boh durian Dak Lak, mđĭ klei dưi bi ktưn leh anăn mtrŭt mđĭ hdră bruă đĭ kyar hơĭt kjăp.