Khua knŭk kna Lê Minh Hưng mñă klă: Thŭn 2026 čih yap klei đĭ kyar kluôm dhuôm hŏng 14/15 hnơ̆ng kčah dưi mâo leh anăn êgao. Mŭt hlăm thŭn 2027, Việt Nam kjăp hdră kñăm đĭ kyar pral, hŏng klei čang hmăng đĭ kyar GDP mơ̆ng 10% kơ dlông. Phung bi ala brei akâo lŏ dơ̆ng mlih mrâo, mtrŭt mđĭ boh kdrŭt đĭ kyar mơ̆ng đưm mâo duh bi liê knŭk kna, ba čhĭ mnơ̆ng kơ ala tač êngao, blei ba yua; mbĭt anăn lŏ krŭ wĭt leh anăn mtrŭt mđĭ dŭm boh kdrŭt đĭ kyar mrâo msĕ si bruă duh mkra mtah, bruă duh mkra mrô, bruă duh mkra kluôm.

Mbĭt hŏng anăn, ruh mgaih klei kpăk kơ dŭm hdră bruă phŭn, mtrŭt mđĭ bruă mkăp prăk duh bi liê knŭk kna, mđĭ boh tŭ dưn bruă ngă bruă sang čư̆ êa alŭ wăl dua gưl leh anăn mtrŭt mđĭ bruă mkra mlih hră mơar knŭk kna. Phung bi ala ăt lač, hdră êlan mă bruă thŭn 2027 brei tĭng kơ klei êmưt mơ̆ng dŭm klei amâo jăk thŭn 2026, boh nik klei năng ai ênoh êa pui lŏ dơ̆ng ti hnơ̆ng đĭ, klei prăk luič ênoh đĭ tơdah dŭm hdră êlan đru prăk jia, prăk tăk dưi mkra mlih. Hluê si phung bi ala bruă kƀĭn ala, bruă klam mơ̆ng thŭn 2027 jing lu êdi ƀiădah hŏng tur knơ̆ng yuôm bhăn dưi mâo leh, mbĭt hŏng klei gĭr ktưn êgao hnơ̆ng mơ̆ng jih bruă kđi čar, êpul êya anôk bruă duh mkra leh anăn mnuih ƀuôn sang, klei čang hmăng đĭ kyar dua ênoh mrô thŭn 2027 dưi jing boh sĭt. ./.