Hlăm sa mmông livestream mkŏ klei ba čhĭ mnơ̆ng dhơ̆ng lŏ hma, amai Đặng Thị Hồng Đào, pô anôk bruă mnia mblei Trà Nghinh Phong, ti ƀuôn hgŭm Phú Yên, čar Dak Lak, hưn mthâo dŭm mta mnơ̆ng dhơ̆ng čê, mứt leh anăn êa boh kruê̆ čêñ mơ̆ng anôk bruă mkra mjing. Tuôm mâo leh klei thâo hlăm bruă hưn mthâo, ba mnơ̆ng dhơ̆ng hlăm dŭm anôk čhĭ mnia leh anăn anôk hiu čhưn ênguê, ƀiădah hŏng hnơ̆ng mkra mjing adôk điêt, lu jing knang kơ ai tiê pô, amai Đào ăt čiăng lŏ mâo ƀĭng hgŭm leh anăn dŭm hdră ba čhĭ mnơ̆ng dhơ̆ng mrâo. Livestream jing sa hdră čiăng kơ amai Đào ba mnơ̆ng dhơ̆ng truh giăm hĭn hŏng phung blei yua, tui duah klei găl pŏk mlar anôk mnia mblei.

“Livestream jing pô čiăng bi tuôm, ba mnơ̆ng dhơ̆ng truh kơ mnuih yua, mjing klei găl bi tuôm hŏng phung blei yua, pŏk mlar wăl anôk mnia mblei. Ară anei gŏ sang duh mkra pla mjing nah gŭ, mâo hjăn pô kâo amâo mâo ôh mnuih hrăm mbĭt kyua anăn ka dưi mđĭ lar jih klei găl, kyua anăn pô čiăng êdi bi tuôm hŏng mnuih hrăm mbĭt mđĭ kyar wăl anôk mnia mblei.”

Mơ̆ng sa klei hưn mdah mnơ̆ng dhơ̆ng hlăm wăl anôk mrô truh kơ bruă mkŏ mjing hdră ba čhĭ hơĭt kjăp ăt adôk kbưi. Hŏng dŭm anôk bruă mkra mjing điêt msĕ si mơ̆ng amai Đào, kdrăp mrâo dưi pŏk thiăm klei găl dưi nao truh hŏng phung blei yua, ƀiădah čiăng bi mlih klei găl jing hră mơar, rơ̆ng anôk ba čhĭ leh anăn pŏk mlar hnơ̆ng lŏ dơ̆ng jưh knang kơ hnơ̆ng tŭ jăk mnơ̆ng dhơ̆ng, klei dưi mkăp brei leh anăn klei dưi mkŏ hŏng wăl anôk mnia mblei.

Ti sa kdrêč mkăn hlăm hdră pla mjing, kdrăp mrâo mrang hlăk đru kơ dŭm gŏ êsei mnuih ƀuôn sang ngă lŏ hma čŏng pô hĭn hlăm bruă dlăng kriê wiê ênăk mnơ̆ng pla mjing. Gŏ sang Lê Thị Yến, ti să Ea Drăng, čar Dak Lak bi mlih leh ênhă 5ha ksu khua mduôn ba pla kphê pla pluă boh durian. Hlăm ênhă anei, gŏ sang duh bi liê leh kdrăp krih êa bi rôc̆ thư̆ thư̆ mguôp hŏng pui kmlă êran hŏng pil yang hruê hŏng ênoh bi liê jih jang hlăm brô sa êklai prăk. Kdrăp anei dưi ktuê dlăng mơ̆ng kbưi hŏng đĭng blŭ, đru kơ bruă krih êa găl ênưih hĭn, bi hrŏ klei jưh knang kơ bruă ngă ti đang war. Aduôn Yến brei thâo, bruă ba yua kdrăp mrâo đru kơ gŏ sang mkiêt mkriêm bruă kriê dlăng, čŏng pô hĭn leh anăn tŭ dưn hĭn hlăm bruă pla mjing.

“Ară anei 5 ha mâo duh bi liê leh pui kmlă êran hŏng pil yang hruê leh anăn krih êa bi rôc̆ thư̆ thư̆, mkŏ dưm hlăm đĭng blŭ, tơdah ti anôk nao ăt dưi krih mơh. Ba yua klei kreh knhâo mrâo mrang snăn hnơ̆ng mâo boh mnga đĭ hĭn, êlâo hrui pĕ mâo 5 tôn kphê/ha ƀiădah ară anei đĭ 6 tôn/ha ƀiădah ƀiă ai tiê mă bruă.”

Mơ̆ng bruă gĭt gai krih êa hŏng đĭng blŭ truh kơ tui duah phung blei yua hlăm hla pŏk web, dŭm kdrăp anei brei ƀuh kdrăp mrâo mrang mrô hlăk ƀrư̆ ƀrư̆ mâo hlăm bruă pla mjing, mnia mblei mơ̆ng ƀĭng ngă lŏ hma Dak Lak. Ƀiădah klei găl dưi nao hgŭm amâo mâo sa hnơ̆ng. Amâo djŏ djăp gŏ êsei dưi duh bi liê kdrăp mă bruă ênuk mrâo; ăt kăn djŏ djăp mnuih ba mnơ̆ng dhơ̆ng hlăm hla pŏk web dưi rơ̆ng bruă čhĭ mnia tŭ dưn. Kyua anăn, mbĭt hŏng klei čŏng pô mơ̆ng grăp gŏ êsei, bruă ktrâo lač, mkŏ leh anăn đru kơ ƀĭng ngă lŏ hma ruah kdrăp mrâo mrang djŏ guôp hŏng klei čiăng sĭt mâo boh tŭ yuôm bhăn.

Ti ƀuôn hgŭm Ea Drăng, Êpul hgŭm ƀĭng ngă lŏ hma ƀuôn hgŭm dôk ƀrư̆ ƀrư̆ ba yua kdrăp mrô hlăm bruă kriê dlăng, gĭt gai. Aduôn Vũ Thị Thúy Hòa, Khua Êpul hgŭm ƀĭng ngă lŏ hma ƀuôn hgŭm Ea Drăng lač kơ hdră ngă mơ̆ng Êpul hgŭm.

“Drei pŏk ngă jih jang hŏng kdrăp mrô. Mơ̆ng leh bi mŭt anôk bruă knŭk kna truh kơ ară anei jih jang klei čih pioh dưi bi mlih nanao leh anăn nanao. Čiăng dưi ngă bruă anăn snăn êlâo dih drei bi hriăm mjuăt leh ênŭm ênap, djă ti kngan ktrâo ti bruă kơ grăp čô khua êpul hgŭm. Klei yuôm bhăn hĭn mơ̆ng să Êa Drăng jing brei thâo ƀuh mnuih ƀuôn sang dôk čiăng ya bruă čiăng drei đru brei bi djŏ leh anăn djŏ hŏng mta kñăm mnuih ƀuôn sang dôk čiăng kơ ana mjeh, êđai mjeh hŏng hnơ̆ng tŭ jăk, ênoh yuôm leh anăn mâo phŭn agha klă klơ̆ng.”

Hŏng klei thâo pŏk ngă ti anôk bruă nah gŭ, klei akâo amâo djŏ knŏng ba dŭm kdrăp mrô hlăm bruă ngă mơ̆ng êpul hgŭm, ƀiădah lŏ đru kơ phung hgŭm yua kdrăp mrâo čiăng msir mgaih dŭm klei čiăng klă klơ̆ng hlăm bruă mkra mjing, mnia mblei. Hlăm 6 mlan akŏ thŭn anei, dŭm gưl Êpul hgŭm mnuih ngă lŏ hma čar Dak Lak đru leh giăm 2.000 gŏ sang ba mnơ̆ng dhơ̆ng hlăm anôk mnia mblei điện tử; mtrŭt mjhar êbeh 116.000 čô hgŭm dưm, yua kdrăp mnuih ngă lŏ hma Việt Nam. Êbeh 300 adŭ mjuăt bi hriăm kreh knhâo dưi mkŏ mjing, iêo jak giăm 27.000 gưl čô hgŭm, mnuih ngă lŏ hma nao hgŭm. Võ Duy Kha, K'iăng khua Êpul hgŭm ƀĭng ngă lŏ hma čar Dak Lak brei thâo, Êpul hgŭm mâo mta kñăm đru kơ dŭm alŭ wăl hưn mthâo mnơ̆ng dhơ̆ng, ktrâo lač kơ phŭn agha lehanăn mđĭ hdră bi hgŭm ba čhĭ.

"Hmei mkŏ mjing leh hdră kñăm grăp thŭn grăp să, ƀuôn hgŭm brei mkŏ mjing dŭm clip čiăng hưn mdah mnơ̆ng dhơ̆ng OCOP, mnơ̆ng dhơ̆ng lŏ hma êdah êdi kơ mnuih ƀuôn sang ngă lŏ hma, ktrâo lač đru kơ mnơ̆ng dhơ̆ng mâo mơ̆ng 3 mtŭ kơ dlông mâo mrô QR tui duah phŭn agha, bi mguôp hŏng dŭm anôk bruă hlăm bruă hrui blei ba čhĭ."

Boh sĭt brei ƀuh, klei bi mlih mrô hlăm bruă lŏ hma amâo djŏ knŏng mkăp kdrăp mrâo mrang amâodah ba mnơ̆ng dhơ̆ng hlăm dŭm anôk bruă online ôh. Klei yuôm bhăn jing mnuih ngă lŏ hma mâo klei ruah kdrăp mrâo djŏ guôp, thâo ba yua leh anăn krơ̆ng hdră ba yua hlăm boh sĭt amâodah hơăi; mbĭt anăn, dŭm kdrăp anăn dưi đru kơ diñu bi hrŏ ênoh bi liê, mđĭ hnơ̆ng tŭ jăk mnơ̆ng dhơ̆ng leh anăn dưi nao truh kơ anôk mnia mblei jăk hĭn amâodah hơăi. Êjai bruă ba yua kdrăp mrâo mguôp hŏng klei čiăng sĭt lehanăn ba wĭt boh tŭ dưn dưi ksiêm dlăng, mlih mrô mrâo jing boh kdrŭt bi mlih hdră mkra mjing, mnia mblei, đru kơ ƀĭng ngă lŏ hma Dak Lak ƀrư̆ ƀrư̆ păn kjăp kdrăp mrâo lehanăn mđĭ boh tŭ yuôm mnơ̆ng dhơ̆ng lŏ hma.