Khua bruă kƀĭn ala brei thâo, leh êbeh sa thŭn hluê ngă hdră bhiăn lăn ala thŭn 2024, dŭm klei kpăk hlăm hdră čuăl mkă, bi klă ênoh, hrui wĭt, jao leh anăn brei mưn lăn bi êdah leh, boh nik hlăm wưng mkŏ mjing bruă sang čư̆ êa alŭ wăl dua gưl. Bruă mkra mlih hdră bhiăn čiăng mđing truh mkŏ mjing hdră bhiăn phŭn, čoh čuăn dŭm mta phŭn, mbĭt anăn mâo hdră êlan mbruă, hrăm mbĭt hŏng klei mlih mrâo bruă knŭk kna, bi mlih mrô leh anăn dŭm hdră bhiăn djŏ tuôm.

Kơ ênoh lăn, Khua bruă kƀĭn ala mtă brei bi mklă klei ba yua ênoh lăn leh anăn ênoh đĭ hlăm klei čiu hnô, tĭng tla prăk yua lăn, prăk mưn lăn; rơ̆ng ênoh djŏ hŏng wăl anôk mnia mblei ƀiădah amâo bi kluôm ênŭm klei bhiăn wăl anôk mnia mblei, ñĕ kơ klei "ênoh mđĭ ênoh", ngă kơ ênoh đĭ pral leh anăn hdră bruă kpăk đuôm.