Hŏng asăp hưn mthâo "Bi mklă ênoh yuôm - Yăl dliê klei yăl dliê Việt - Mkŏ mjing wăl anôk bruă lŏ hma, mnơ̆ng ƀơ̆ng huă leh anăn hiu čhưn ênguê kluôm dhuôm", klei bi kƀĭn mđing kơ hdră msir mkŏ mnuih ƀuôn sang ngă lŏ hma hŏng anôk bruă duh mkra mkra mjing, ba čhĭ leh anăn hiu čhưn ênguê; bi mklă krĭng pla mjing, ba yua kdrăp mrâo, mkŏ mjing anăn knăl leh anăn pŏk mlar anôk mnia mblei tar rŏng lăn.

Hlăm bruă mkra mjing, klei čiăng jing ksiêm dlăng hnơ̆ng tŭ jăk, rơ̆ng phŭn mkăp hơĭt kjăp leh anăn ngă djŏ hnơ̆ng čuăn mơ̆ng grăp wăl anôk mnia mblei. Hlăm bruă mkra mjing, dŭm kdrăp mrâo msĕ si msir mgaih hŏng hnơ̆ng êran pral, bi mthu hŏng pui kmlă, mđam hŏng klei ksiêm dlăng, bi mguôp hŏng bruă đŭng hruh sinh học leh anăn ksiêm dlăng phŭn agha mrô dưi lač čiăng bi kdung wưng kriê pioh, bi hrŏ klei luč liê leh anăn bi lu jơr mnơ̆ng dhơ̆ng. Bruă ba yua djah djâo ăt đru mđĭ boh tŭ yuôm, bi hrŏ djah djâo.

Kah mbha klei thâo ba yua kdrăp mrâo hlăm bruă rông mnơ̆ng leh anăn ksiêm dlăng hnơ̆ng tŭ jăk êa ksâo, Đoàn Trung Kiên, Khua anôk bruă rông êmô mă êa ksâo NutiMilk ti să Mang Yang, Gia Lai, brei thâo kdrăp kriê dlăng êpul êmô dưi mkăp klei hâo hưn nanao, đru ktuê dlăng klei suaih pral leh anăn bruă ngă mơ̆ng mnơ̆ng rông.

"Hŏng ênoh jih jang êmô truh 12 êbâo drei, snăn bruă duh bi liê, ba yua kdrăp mrâo mrang hlăm bruă kriê dlăng klei hâo hưn kơ êpul êmô brei dưi ngă. Anei jing kdrăp kriê dlăng mơ̆ng Israel. Msĕ snăn grăp 10 mnĭt jing lŏ mâo klei hâo hưn mơ̆ng êmô dưi mkăp, kơ hnơ̆ng ngă bruă, hnơ̆ng bi mdoh, bi mklă kơ klei suaih pral."

Amâo djŏ knŏng mđĭ hnơ̆ng tŭ jăk mnơ̆ng dhơ̆ng, bruă ba mnơ̆ng dhơ̆ng truh hŏng phung blei yua hluê hŏng mnơ̆ng ƀơ̆ng, klei yăl dliê alŭ wăl leh anăn hdră hiu čhưn ênguê ăt dưi bi mklă jing hdră mđĭ ênoh yuôm. Bruă anei čiăng mâo klei nao hgŭm mơ̆ng ƀĭng ngă lŏ hma, phung mkra mnơ̆ng ƀơ̆ng, phung thâo mbruă, phung kreh knhâo leh anăn anôk bruă hiu čhưn ênguê. Dŭm klei yăl dliê kơ mnơ̆ng dhơ̆ng, mnơ̆ng ƀơ̆ng, bruă djuê ana mơ̆ng đưm brei hluê si ênoh yuôm sĭt; mnuih ƀuôn sang alŭ wăl brei dưi nao hgŭm leh anăn dưi dưn klei tŭ djŏ guôp.

Nguyễn Thị Thanh Lịch, K'iăng khua knơ̆ng bruă sang čư̆ êa čar Gia Lai lač, klei găl mnơ̆ng dhơ̆ng lu jơr mơ̆ng krĭng čư̆ dliê truh kơ krĭng êa ksĭ mjing klei găl čiăng kơ alŭ wăl mđĭ kyar dŭm gru hmô bruă lŏ hma mguôp hŏng mnơ̆ng ƀơ̆ng huă leh anăn hiu čhưn ênguê. Khă snăn, čiăng bi mlih klei găl jing hdră duh ƀơ̆ng sui, mnuih ngă lŏ hma brei dưi mprăp klei thâo anôk mnia mblei, klei thâo mnia mblei leh anăn đru nao hgŭm hlăm dŭm hnơ̆ng čuăn ba čhĭ kơ ala tač êngao.

"Ngă bruă duh mkra lŏ hma, mnuih ngă lŏ hma thơ̆ng kơ bruă brei thâo kơ mnơ̆ng pô mkra mjing, dưi čhĭ si ngă. Brei thâo săng kơ bruă ba čhĭ kơ wăl anôk mnia mblei Ơrôp snăn brei rơ̆ng si ngă, ba čhĭ kơ wăl anôk mnia mblei China si ngă. Snăn brei drei mâo klei thâo, klei mbruă djŏ. Bruă klam mơ̆ng čar, mơ̆ng phung khua kiă kriê dŭm knơ̆ng dhar bruă, alŭ wăl hrăm mbĭt, mkŏ mjing hdră bhiăn kjăp, mjing êlan, đru hrăm mbĭt, ruh mgaih hlăk mnuih ngă lŏ hma tuôm hŏng klei dleh dlan."