Hruê 4/8, hlăm hdră Klei bi kƀĭn amâo kčah mtrŭn tal Sa, Bruă kƀĭn ala gưl XVI, êjai bi trông hlăm êpul kơ Hdră bhiăn Hâo hưn, mtô mblang hdră bhiăn (lŏ mlih mrâo), Khua bruă kƀĭn ala Trần Thanh Mẫn mñă klă, bruă mkra mlih hdră bhiăn amâo djŏ knŏng mdei ti klei mkra mlih hdră kčah amâodah thiăm mbŏ bruă klam kơ dŭm anôk bruă, ƀiădah brei mjing klei bi mlih klă sĭt, mkŏ mjing knhuah hdĭp mpŭ kơ hdră bhiăn hlăm kluôm yang ƀuôn. Ñu lač bruă hâo hưn, mtô mblang hdră bhiăn wưng êgao adôk bi êdah kơ êlan, ka djŏ hŏng klei čiăng hlăm boh sĭt. Khua bruă kƀĭn ala mtă brei bi mlih mơ̆ng klei mĭn "mđup brei" klei hâo hưn jing klei mĭn đru, đru kơ mnuih ƀuôn sang mđĭ klei thâo pô răng mgang klei dưi, boh tŭ dưn djŏ hdră bhiăn mơ̆ng pô hŏng hdră bhiăn.

 Khua bruă kƀĭn ala mtă brei čoh čuăn klă ênoh mmông ngă bruă đru kčĕ hdră bhiăn leh anăn mtô mblang, mjuăt bi hriăm hdră bhiăn mjêč grăp thŭn hŏng êpul phung ngă bruă hdră bhiăn, phung ksiêm hriăm hdră bhiăn.

Mbĭt anăn, ksiêm duah mkŏ mjing wăl anôk mrô ala čar kơ bruă mtô mblang, mjuăt bi hriăm hdră bhiăn, mkă hnơ̆ng klei dưi, klei thâo săng leh anăn hluê ngă hdră bhiăn mơ̆ng mnuih ƀuôn sang hlăm wăl anôk mrô, đru ba hdră bhiăn klă sĭt nao hlăm klei hdĭp.