Phung bi lač hră mkăp hdră bhiăn ƀuah mkra klei ngă soh ( mkra mlih) čih mkra jăk êdi, klă sĭt hŏng klei mĭn čih mkra hdră bhiăn mrâo mrang, rơ̆ng klei mtăp mđơr plah wah ƀuah mkra ktang phĭt hŏng dŭm klei ngă soh hŭi hyưt mrâo leh anăn bruă pŏk mlar hdră êlan pap brei, klei pap mơ̆ng Knŭk kna. Hluê anăn, phung ngă soh čŏng pô čiu tla, msir boh jhat srăng dưi ksiêm dlăng pap brei lu hĭn čiăng mtrŭt mjhar ai tiê bruă klam.

Djŏ tuôm hŏng klei ngă soh kơ tŭ klei ƀuah mkra bi mdjiê, phung bi ala bi tŭ ư lui 4 klei ƀuh mkra bi mdjiê hŏng 4 klei ngă soh truh hŏng klei êđăp ênang lăn čar jing Klei soh ngă klei bi rŭng, bi kdơ̆ng hŏng anak mnuih, Klei soh bi blah leh anăn ngă măk ƀai bi kdơ̆ng hŏng bruă Knŭk kna ala ƀuôn. Phung bi ala akâo ka brei lui ôh hnơ̆ng bi kmhal mdjiê asei hŏng klei soh blei mnia matuĭ ti hnơ̆ng prŏng amâodah pô phŭn. Dŭm klei blŭ ti anôk bi kƀĭn ăt tŭ ư hŏng klei čih mkra lŏ mkŏ dăp leh dŭm klei soh hlăm êlan mạng hluê hdră ngă bruă, mơ̆ng mprăp, mkŏ mjing truh kơ ngă bruă, kyua mkhư̆ mơ̆ng hdră mprăp jing srăng dưi mkhư̆ klei luič liê mơ̆ng mnuih ƀuôn sang êlâo kơ prăk klă sĭt đuĕ nao.