20 să dưi ruah hlăm ênoh 51 să dleh dlan êdi mơ̆ng čar Dak Lak. Hlăm anăn, 14 să mâo mơ̆ng 7 hnơ̆ng čuăn dleh dlan hĭn êdi, mâo lu klei dleh dlan kơ anôk bruă nah gŭ, bruă mkra mjing leh anăn bruă nah tluôn. Hdră kñăm truh thŭn 2030, grăp să mâo ƀiă êdi sa gru hmô bruă duh mkra mtah amâodah bruă duh mkra kluôm, sa hdră bi hgŭm mkra mjing, mkra mjing leh anăn ba čhĭ; mguôp mđĭ kyar bruă duh mkra hŏng bruă kriê pioh dhar kreh, mkra mđĭ wăl hdĭp mda.

Klei čiăng kơ ngăn prăk mĭn tĭng hlăm brô 5.000 êklai prăk, mâo hlăm brô 3.000 êklai prăk iêo mkrum ti alŭ wăl lehanăn yang ƀuôn, hlăm brô 2.000 êklai prăk mơ̆ng ngăn prăk čar. Bruă dăp ngăn prăk klă klơ̆ng tui hluê klei dưi bi kna ngăn prăk lehanăn iêo mkrum dŭm hdră djŏ hdră bhiăn.

Hlăm klei kƀĭn trông, khua gĭt gai dŭm knơ̆ng dhar bruă leh anăn bi ala dŭm să hưn mdah leh dŭm hdră êlan čiăng kơ hdră dưi hnưm hluê ngă hlăm boh sĭt. Nguyễn Duy Tính, Khua Bruă sang čư̆ êa să Phú Mỡ, čar Dak Lak mñă hnưm mâo klei mtô kơ hră anăn mđing tal êlâo leh anăn hdră êlan pluă mbĭt čiăng čŏng pô mprăp duh bi liê mơ̆ng akŏ thŭn 2027.

“Kñăm rŭ mdơ̆ng bruă mkŏ mkra, klă klơ̆ng msĕ si dŭm hdră mkăp brei êa kơ dŭm alŭ ƀuôn mnuih djuê ƀiă. Kñăm mkŏ mkra dŭm anôk dôk kơ dŭm alŭ ƀuôn mnuih djuê ƀiă. Mkăp brei dŭm kdrăp mnơ̆ng kơ dŭm sang hră, boh nik jing dŭm sang hră Knŭk kna rông ba hđeh sang hră mnuih djuê ƀiă.”

Hlăk êjai anăn, Knơ̆ng bruă djuê ana lehanăn klei đăo čar Dak Lak mtă kơ dŭm să ruah bruă klam djŏ guôp hŏng klei čiăng, mđĭ lar klei găl kơ bruă mkra mjing, bruă djuê ana lehanăn hiu čhưn ênguê mguôp hŏng dhar kreh alŭ wăl. Grăp gru hmô brei mâo hdră êlan krơ̆ng kjăp leh klei đru.

Bi klă hlăm klei bi kƀĭn, Y-Nhuân Byă, kiăng khua bruă sang čư̆ êa čar Dak Lak, mtă kơ dŭm knơ̆ng, dhar bruă leh anăn alŭ wăl bi mklă bruă klam, hnơ̆ng ngă bruă grăp thŭn, bi hgŭm mkăp ngăn prăk, ñĕ kơ klei mđĭ mđăl plah wah dŭm hdră bruă. Êlâo hĭn, mđing mprăp dŭm klei găl hluê ngă thŭn 2027, mđing tal êlâo kơ anôk bruă nah gŭ.

“Mkŏ mjing hluê ngă hdră êlan nao mbĭt hŏng mđĭ kyar bruă duh mkra, lu jơr dŭm gru hmô ngă bruă, boh nik jing mđĭ hnư hrui wĭt, bi hơĭt klei hdĭp mơ̆ng mnuih ƀuôn sang. Msĕ snăn, ênoh gŏ êsei ƀun ăt jing sa hlăm dŭm hnơ̆ng čuăn yuôm bhăn êdi. 20 să dưi ruah snăn brei čŏng pô ksiêm dlăng, bi klă klei čiăng klă leh anăn ba mdah djŏ guôp.”