Khua knŭk kna Lê Minh Hưng mñă klă boh tŭ yuôm bhăn mơ̆ng klei mkŏ mjing hlăk mkŏ mjing leh hdră mtrŭn mđĭ klei bi hgŭm dua nah. Khua knŭk kna brei thâo, Poland ară anei jing ƀĭng hgŭm mnia mblei prŏng hĭn mơ̆ng Việt Nam ti Ngŏ Ơrôp. Hŏng klei găl kdrăp mrâo, bruă mdrao mgŭn, bruă lĭng kahan, bruă pui kmlă mơ̆ng Poland bi mguôp mbĭt hŏng êpul êya 18 klei kuôl kă mnia mblei êngiê (FTA) lehanăn anôk mnia mblei pral kdal mơ̆ng Việt Nam, mta kñăm mđĭ ênoh bi mnia mblei dua ala čar truh 6 êklai USD jing năng ngă. Mtrŭt mđĭ anôk bruă duh mkra dua ala čar bi hgŭm wưng sui, ba jao kdrăp mrâo mtah, mjing klei găl kơ anôk bruă duh mkra Việt Nam nao hgŭm êlam hĭn hlăm hdră duh mkra tar rŏng lăn, Khua knŭk kna mñă klă Knŭk kna Việt Nam hrăm mbĭt nanao, mjing djăp klei găl jăk hĭn čiăng kơ phung duh bi liê mơ̆ng Poland mă bruă hŏng klei kjăp, hơĭt kjăp sui thŭn.

Kơ kdrêč pô, Khua knŭk kna Donald Tusk yap yuôm bhăn kơhưm mơ̆ng Việt Nam - hdră duh mkra mbruă mrô sa ti Asi. Khua knŭk kna Poland kčĕ dŭm mta bruă bi hgŭm hdră êlan kơ bruă mdrao mgŭn leh anăn êa drao, điện tử, ksiêm hriăm mbĭt kơ vệ tinh ksiêm dlăng lăn ala mblang klei čih pioh mkăp kơ bruă duh mkra mtah. Ñu brei thâo Poland mprăp jing ƀăng jang pŏk mlar čiăng kơ anôk bruă duh mkra leh anăn mnơ̆ng dhơ̆ng Việt Nam dưi truh kơ jih jang anôk mnia mblei Êpul hgŭm Ơrôp (EU)./.