Blŭ hrăm ti anôk bi tuôm, Khua gĭt gai Đảng, Khua lăn čar mñă klă, Đảng, Knŭk kna leh anăn Mnuih ƀuôn sang hdơr nanao kơ klei duh myơr, săn asei mơ̆ng phung duh myơr, săn asei kyua lăn čar. Klei hdơr knga brei dưi bi êdah hŏng dŭm bruă ngă klă klơ̆ng, kriê dlăng klei suaih pral, klei hdĭp leh anăn ai tiê kơ mnuih mâo bruă tŭ dưn. Đại đội Mniê mgăt êdeh Trường Sơn mâo phŭn agha jing Trung đội mniê mgăt êdeh mkŏ mjing hruê 18/12/1968.

Hlăm hdră kdơ̆ng mblah Mi, phung mniê lĭng kahan găn leh lu ktuê êlan dleh dlan, dŭ ba mnơ̆ng dhơ̆ng mkăp kơ anôk bi blah leh anăn ba phung kahan êka wĭt kơ anôk mdrao mgŭn. Thŭn 2014, anôk bruă dưi mđup brei anăn knăl Pô jhŏng ktang lĭng kahan yang ƀuôn. Khua gĭt gai Đảng, Khua lăn čar mtă kơ Phŭn bruă lĭng kahan bi hgŭm hŏng dŭm alŭ wăl ksiêm dlăng, msir mghaih djăp ênŭm hdră mtrŭn, hdră đru kơ phung djăp klei găl; mđing dlăng mdrao mgŭn, đru kơ phung mâo klei hdĭp dleh dlan leh anăn mjing klei găl krơ̆ng klei bi tuôm knhuah gru grăp thŭn. Mbĭt anăn, mtă kơ gưl bruă Đảng, bruă sang čư̆ êa leh anăn dŭm êpul êya lŏ dơ̆ng hrăm mbĭt, kriê dlăng mnuih mâo bruă tŭ dưn hŏng bruă klam leh anăn klei jih ai tiê, čiăng kơ boh tŭ mđĭ kyar lăn čar dưi bi êdah hlăm klei hdĭp phung săn leh asei kyua lăn čar.