Lăn Dap Kngư mâo yan adiê, lăn ala leh anăn wăl hdĭp mda lu jơr, jing klei găl čiăng ksiêm hriăm, mđĭ kyar lu mta ana êa drao, hlăm anăn mâo dŭm ana djŏ guôp ti gŭ êyui kyâo dliê. Wăl anôk đĭ kyar leh bi mŭt mbĭt ăt pŏk thiăm klei găl mkŏ krĭng pla mjing hŏng anôk mkra mjing leh anăn anôk mnia mblei. Êngao kơ sâm Ngọc Linh leh anăn Hồng Đẳng Sâm dưi bi mklă, dŭm alŭ wăl brei lŏ ruah ana mâo boh tŭ bruă duh mkra, djŏ guôp hŏng wăl hdĭp mda, kriê pioh gen leh anăn mkŏ mjing bruă pla mjing mguôp hŏng klei čiăng blei yua. Čiăng mtrŭt mđĭ bruă duh mkra ana êa drao, brei đru mjeh, hdră mnêč leh anăn bi hgŭm hrui blei; mbĭt anăn bi klă klei tŭ dưn, bruă klam plah wah êpul êya, pô dliê leh anăn anôk bruă duh mkra. Nguyễn Thị Thu Hà, Khua kiă kriê Hdră bruă mơ̆ng Êpul grŭp Trường Sinh lač, ana êa drao Lăn Dap Kngư mâo leh dŭm krĭng pla mjing prŏng ƀiădah adôk ka lu jơr kơ mta leh anăn mdei ti bruă mkra mjing phŭn yơh. Anôk bruă duh mkra čang hmăng mkŏ mjing thiăm lu krĭng pla mjing hŏng lu mta hĭn, bi mguôp mkra mjing êlam:

“Hmei amâo mâo mdei ôh hlăm bruă mkra mjing, ƀiădah lŏ mkra mjing êlam dŭm mta mnơ̆ng dhơ̆ng msĕ si êa drao, êa drao gŭn pioh mkra mjing êa drao amâodah mnơ̆ng ƀơ̆ng răng mgang klei suaih pral dưi bi lŭk hlăm dŭm mta mnơ̆ng dhơ̆ng mkăn. Amâo mâo djŏ knŏng jing dŭm mta mnơ̆ng ba yua êa drao mnăm, drei dưi ba hlăm mnơ̆ng bi msiam kriê dlăng klei suaih pral".

Lu phung bi ala nao hlăm klei kƀĭn trông lač, mơ̆ng klei akâo duh bi liê truh kơ krĭng pla mjing tŭ dưn adôk lu klei găl brei bi mâo. Êlâo hĭn, alŭ wăl brei ksiêm dlăng, čih mkra hră kak krĭng mâo klei găl, bi mklă phŭn dliê, klei găl lăn êa, anôk bruă nah gŭ lehanăn anôk ba čhĭ; grăp krĭng brei mâo hdră răng mgang dliê, ksiêm dlăng klei hmăi truh kơ klei čăt đĭ mơ̆ng dliê, lăn leh anăn êa jua. Mbĭt anăn jing bi mklă mnơ̆ng dhơ̆ng lehanăn anôk ba čhĭ êlâo kơ ruah hdră mnêč, mkŏ mjing krĭng pla mjing; mnơ̆ng dhơ̆ng brei dưi ksiêm dlăng kơ klei bi mklă, mta hóa học, hnơ̆ng tŭ jăk lehanăn tui duah hluê gưl. Đoàn Ngọc Có- Kiăng khua knơ̆ng bruă lŏ hma leh anăn wăl hdĭp mda Gia Lai brei thâo:

“Truh thŭn 2030, hdră mđĭ kyar ana êa drao ti gŭ êyui kyâo dliê mâo hlăm brô 31.000 ha. Ênoh yuôm mơ̆ng ana êa drao Việt Nam yuôm bhăn snăk. Ƀiădah, bruă mđĭ kyar ana êa drao brei mguôp hŏng bruă ba čhĭ mnơ̆ng dhơ̆ng, mkra mjing leh anăn mjing anôk ba čhĭ kơh dưi mđĭ kyar jăk.”

Mơ̆ng dŭm klei blŭ, klei akâo ti anôk bi kƀĭn, klei čiăng kčĕ kơ Lăn Dap Kngư jing brei ksiêm dlăng krĭng pla djŏ guôp, ruah gru hmô dưi ngă êlâo kơ mđĭ lar; mbĭt anăn, mđĭ kyar ana êa drao ti gŭ êyui kyâo dliê brei mâo klei nao hgŭm mơ̆ng phung duh bi liê mâo ai dưi ngăn prăk, kdrăp mrâo lehanăn hdră ba čhĭ klă klơ̆ng. Mơ̆ng anăn mjing mnơ̆ng dhơ̆ng êa drao mâo ênoh, đru mđĭ hnư hrui wĭt mơ̆ng mnuih ƀuôn sang, mjing tur knơ̆ng kơ bruă răng mgang dliê lehanăn mđĭ kyar ana êa drao sui thŭn.