Ti anôk drông, Khua bruă kƀĭn ala bi mklă bruă hŏng tač êngao mơ̆ng mnuih ƀuôn sang mâo bruă klam yuôm bhăn hlăm bruă bi kjăp klei mjĕ giăm, mđĭ klei bi hgŭm plah wah dua ala čar. Việt Nam dlăng nanao Dhŭng Korea jing ƀĭng hgŭm mrô sa hlăm dŭm mta bruă mnia mblei, bruă duh mkra, duh bi liê, bruă hiu čhưn ênguê, bruă kreh knhâo - kdrăp mrâo leh anăn bruă mtô bi hriăm. Hlăm 9 mlan thŭn 2026, ênoh prăk duh bi liê klă anăp mơ̆ng ala čar Dhŭng Korea ti Việt Nam mâo 103 êklai USD; ênoh prăk bi mnia mblei dua nah grăp thŭn mâo mơ̆ng 80 truh 90 êklai USD.

Ênoh tuê Dhŭng Korea hriê ti Việt Nam mâo êbeh 3 êklăk gưl čô mnuih. Khua bruă kƀĭn ala bi mni kơ dŭm klei đru mguôp mơ̆ng Êpul hgŭm bi mguôp Dhŭng Korea - Việt Nam hlăm bruă mkŏ êpul êya mnuih Việt Nam ti Dhŭng Korea, đru kơ klei êđăp ênang leh anăn mtrŭt mđĭ klei mjĕ êrô dhar kreh, mtô bi hriăm. Dua tĭng bi tŭ ư lŏ dơ̆ng mđĭ hdră bi hgŭm, mtrŭt mđĭ hdră mnia mblei, duh bi liê, boh nik hlăm dŭm bruă kreh knhâo - kdrăp mrâo, mlih mrâo hŏng klei mbruă, bán dẫn leh anăn klei thâo anak mnuih; mbĭt anăn mtrŭt mđĭ hdră mjĕ êrô mnuih ƀuôn sang, đru bi êlam hĭn klei bi mjĕ Ƀĭng hgŭm phŭn kluôm dhuôm Việt Nam - Dhŭng Korea.