Jing čar krĭng čư čhiăng, knông lăn kwar Yŭ Dưr, Sơn La mâo giăm 275km êlan knông lăn siă knông hŏng ala čar Lào; ênoh mnuih êbeh 1.4 êklăk čô hŏng 12 djuê ana. Bi mni kơ 6 boh tŭ mâo čar dưi mâo hlăm wưng êgao, êdah êdi jing bruă duh mkra- ala ƀuôn hơĭt kjăp, wăl hdĭp mda dưi răng mgang, lŏ mkŏ dăp bruă lŏ hma lŏ dơ̆ng nao djŏ hdră, dŭm mta bruă dhar kreh, ala ƀuôn leh anăn klei hdĭp lŏ dưi kriê dlăng; Khua gĭt gai Đảng, Khua lăn čar Tô Lâm tĭng dlăng, dŭm boh tŭ anei bi êdah ai tiê bi hgŭm mguôp, čŏng pô, ktang phĭt, đua klam mơ̆ng bruă Đảng čar, bruă sang čư̆ êa, êpul lĭng kahan, êpul êya anôk bruă duh mkra leh anăn mnuih ƀuôn sang dŭm djuê ana čar Sơn La.  

Ñu mtă kơ čar Sơn La mđing gĭt gai, ktrâo lač kơ 8 êpul bruă klam phŭn, hlăm anăn brei mđing dlăng, bi mklă gru hmô đĭ kyar leh anăn anôk bruă mơ̆ng Sơn La hlăm krĭng Yŭ Dưr. Lač klă klei mĭn, brei mă klei đĭ kyar anak mnuih, mtô bi hriăm, bi hơĭt yang ƀuôn leh anăn bi hrŏ ƀun kjăp jing mta phŭn, Khua gĭt gai Đảng, Khua lăn čar mñă, anăp anei brei alŭ wăl mprăp bi jăk thŭn hriăm 2026–2027, ngă jăk bruă mkă dlăng jêñ jêñ klei suaih pral amâo mâo mă prăk ôh kơ mnuih ƀuôn sang ƀiă êdi 1 blư̆ /thŭn./.