Kñăm tĭng dlăng boh tŭ hluê ngă lehanăn bi sĭt dŭm hdră mtrŭn prŏng mơ̆ng Gưl dlông hlăm klei hdĭp yang ƀuôn, mrâo êgao, Anôk bruă Djuê ana Êpul gơ̆ng bruă ƀuôn sang čar Dak Lak mkŏ mjing leh gưl ksiêm dlăng boh sĭt ti dŭm gru hmô hiu čhưn ênguê êpul êya ti alŭ wăl. Êpul ksiêm dlăng klă anăp mă bruă ti ƀuôn Kli A (ƀuôn hgŭm Ƀuôn Hồ), ƀuôn Tuôr (să Hoà Phú), Ƀuôn Tơng Jú (să Ea Kao) lehanăn ƀuôn Akŏ Dhông (ƀ uôn prŏng Ƀuôn Ama Thuôt).

Mơ̆ng hdră ksiêm dlăng brei ƀuh, hdră đru mơ̆ng čar mjing leh boh kdrŭt yuôm bhăn đru kơ mnuih ƀuôn sang čŏng mkăp djŏ hŏng klei găl mâo, pŏk mlar hdră duh bi liê lehanăn mkŏ mjing lu mta mnơ̆ng tui ksiêm nao mbĭt hŏng knhuah gru dhar kreh, bruă mkra mjing hŏng kiê kngan, mkŏ mjing hdră duh ƀơ̆ng kjăp kơ mnuih ƀuôn sang.

Anei yơh jing klei bi knăl klă mngač kơ bruă mjing knhuah gru dhar kreh jing ai ktang mđĭ kyar hlue djŏ hŏng hdră êlan phŭn mơ̆ng hdră mtrŭn mrô 80.

Ƀiădah, čiăng lŏ dơ̆ng mkŏ mjing tŭ dưn dŭm klei gĭt gai mơ̆ng Phŭn bruă kđi čar kơ bruă kriê pioh dhar kreh hlăm wưng mrâo, dŭm alŭ wăl akâo kơ čar čiăng lŏ mđĭ hnơ̆ng hdră êlan. Boh phŭn jing đru răng kriê wăl anôk dhar kreh, mjuăt bi hriăm klei thâo mbruă leh anăn mtrŭt mđĭ klei bi hgŭm mlir krĭng. Y Kle Knul, K’iăng Khua Knơ̆ng bruă sang čư̆ êa să Hoà Phú mâo klei blŭ:

“Čiăng lŏ dơ̆ng uêñ mĭn đru kơ ai dưi kriê pioh sang krum dlông knhuah gru, bruă pơ̆k mñam, wăl dhar kreh čing čhar, dŭm knăm mơak knhuah gru leh anăn mkŏ mjing mnơ̆ng kriê pioh knhuah gru dhar kreh alŭ wăl. Mđĭ ktang bruă mtrŭt mjhar, hưn mdah, mkŏ mjing tuôr bi mguôp Ƀuôn Tuôr hŏng dŭm anôk hiu čhưn ênguê ti alŭ wăl čar kñăm pŏk mlar wăl anôk mnia mblei phung tuê leh anăn mđĭ hnơ̆ng tŭ dưn ba yua dŭm mta mnơ̆ng dhơ̆ng bruă hiu čhưn ênguê êpul êya”.

Hluê si Anôk bruă Djuê ana Êpul gơ̆ng bruă ƀuôn sang čar Dak Lak, bruă pŏk ngă Hdră mtrŭn 80 brei mnuih ƀuônsang klă sĭt jing pô phŭn nao hgŭm lehanăn dưi dưn boh tŭ yuôm dhar kreh mơ̆ng pô. Dŭm klei čih yap mơ̆ng boh sĭt srăng jing tur knơ̆ng yuôm bhăn čiăng kơ čar bi leh klei bhiăn, mđĭ dŭm hdră êlan đru mđĭ kyar. Mñă kơ klei kơ anăp čiăng ba Hdră mtrŭn mơ̆ng Đảng hlăm klei hdĭp, Đỗ Thị Như Tình, Khua Êpul gơ̆ng bruă ƀuôn sang čar Dak Lak brei thâo:

“Êpul ksiêm dlăng ăt čih yap dŭm klei hưn lač boh sĭt hlăm hdră pŏk hluê ngă hdră mtrŭn leh anăn dŭm hdră êlan ti alŭ wăl. Mơ̆ng tur knơ̆ng anăn snăn ăt srăng ksiêm duah kčĕ pŏk ngă sa hdră mtrŭn mrâo kơ klei mđĭ kyar bruă hiu čhưn ênguê êpul êya mguôp hŏng kriê pioh leh anăn bi lar knhuah dhar kreh hlăm wưng mrâo snăn srăng ba wĭt boh tŭ dưn hĭn".

Bruă mjêč ksiêm duah, čih mkra Hdră mtrŭn mrâo mơ̆ng Êpul gơ̆ng bruă ƀuôn sang čar djŏ guôp hŏng boh sĭt anăn jing knhuang nao klă klơ̆ng, ktang phĭt čiăng ba Hdră Mtrŭn 80 mơ̆ng Phŭn bruă kđi čar mtrŭn agha êlam hĭn; mjing hjiê dhar kreh Lăn Dap Kngư jing boh kdrŭt mđĭ kyar bruă duh mkra ala ƀuôn kdlưn hĭn kơ Dak Lak hlăm wưng kơ anăp.