Să Êa Mdroh dưi mkŏ mjing mơ̆ng tur knơ̆ng bi mŭt mbĭt tlâo să Êa Mdroh, Êa Mnang leh anăn Quảng Hiệp, hlăm kdriêk Čư̆ Mgar hđăp. Knhal jih thŭn 2025, să adôk 202 gŏ êsei ƀun, truh 2.67% ênoh gŏ êsei mnuih ƀuôn sang; mbĭt anăn, să adôk giăm 600 gŏ êsei giăm ƀun čiăng lŏ dơ̆ng dưi đru bi hơĭt klei hdĭp.

Ti anôk bi blŭ hrăm, lu gŏ êsei mnuih ƀuôn sang klă klơ̆ng hưn mdah klei dleh dlan, ba mdah hdră êlan đru kơ hdră duh ƀơ̆ng, bruă mă leh anăn sang dôk. Lê Tiến Dũng, ti alŭ Bình Hòa brei thâo, leh sa thŭn dưi đru êmô ana mđai ƀiădah ka mâo boh tŭ dưn, ñu akâo mkra mlih hdră êlan đru bi djŏ guôp hĭn hŏng klei găl gŏ sang.

“Thŭn dih pô mâo klei đru brei êmô ƀiădah sa thŭn leh êmô ka mâo êđai ôh anăn hruê anei kâo mâo klei mĭn hŏng ƀuôn hgŭm akâo mlih rông êmô prŏng. Ƀuôn hgŭm wĭt lač mtam, srăng mkăp brei 4 drei, mâo 2 drei êmô 2 drei bê. Knŭk kna ăt uêñ mĭn kơ mnuih ƀuôn sang snăn hmei lač jăk êdi”.

Mbĭt hŏng klei akâo kơ hdră duh ƀơ̆ng, lu gŏ êsei ƀun bi êdah klei hmăng hmưi dưi đru duah bruă mă, mâo sang dôk kjăp. Anôk bruă sang čư̆ êa să Êa Mdroh tŭ mă, bi trông klă anăp kơ dŭm klei čiăng mơ̆ng grăp čô, ngă tur knơ̆ng bi mklă klei čiăng đru mơ̆ng dŭm gŏ sang.

Mơ̆ng akŏ thŭn 2025 truh kơ ară anei, hluê ngă dŭm hdră bruă, hdră đru kơ hdră duh ƀơ̆ng, klei hdĭp mda, să Êa Mdroh mâo leh dŭm klei đru hmao truh kơ dŭm gŏ êsei ƀun. Hlăm anăn, să đru leh 76 drei êmô ana mđai kơ 38 gŏ êsei ƀun mđĭ kyar bruă rông êmô ana mđai. Ƀiădah, boh sĭt pŏk ngă brei ƀuh brei hluê si klei găl grăp gŏ sang čiăng mkra mlih hdră duh ƀơ̆ng tơdah čiăng êdi. Thŭn anei, să mdưm mta kñăm bi hrŏ 93 gŏ êsei ƀun, hŏng hdră ngă mbha tĭng tui si mta phŭn ƀun lehanăn klei dưi kpưn đĭ mơ̆ng grăp gŏ êsei.

Trần Doãn Tới, Khua bruă Đảng să Êa Mdroh brei thâo, alŭ wăl srăng pŏk ngă dŭm hdră msir mdê mdê, mơ̆ng đru kơ bruă mkra mjing truh kơ mjing bruă mă leh anăn rơ̆ng klei hdĭp mda ala ƀuôn:

"Bi mlih klei bhiăn amâo mâo djŏ, đru ba jao klei kreh knhâo ana mjeh, êđai mjeh hŏng gŏ sang adôk mâo mnơ̆ng dhơ̆ng mkra mjing. Bi hŏng dŭm gŏ sang adôk mâo ai tiê mă bruă hlăm gŏ sang snăn srăng mjing bruă mă, đru nao mă bruă kơ ala tač êngao leh anăn bruă mă hlăm ala čar. Bi hŏng dŭm gŏ sang amâo lŏ mâo ai tiê mă bruă, amâo mâo ai tiê mkra mjing snăn bruă Đảng, bruă sang čư̆ êa alŭ wăl srăng mjing klei găl kơ klei hdĭp mda ala ƀuôn leh anăn đru kơ sang dôk, mnơ̆ng yua aguah tlam"