Ti anôk bi tuôm, Khua gĭt gai Đảng, Khua lăn čar bi mni kơ dŭm klei đru mguôp mơ̆ng dŭm gưl phung mniê bi ala bruă kƀĭn ala, mbĭt anăn mñă klă klei čiăng mđĭ lar klei thâo, klei jhŏng leh anăn bruă klam mơ̆ng phung mniê hlăm bruă čih mkra hdră bhiăn, ksiêm dlăng leh anăn bi mklă dŭm bruă yuôm bhăn mơ̆ng lăn čar. Bruă kƀĭn ala gưl XVI mâo 150 čô mniê bi ala, truh 30% ênoh phung bi ala. Khua gĭt gai Đảng, Khua lăn čar čang hmăng phung mniê bi ala čŏng pô nao hgŭm mơ̆ng hnưm hlăm hdră ksiêm hriăm, mkŏ mjing hdră bhiăn; bi klă tur knơ̆ng boh sĭt, klei sa ai leh anăn klei dưi hluê ngă mơ̆ng dŭm klei čuăn hdră bhiăn.

Mbĭt anăn, brei rơ̆ng kjăp klei mĭn, čŏng pô ba mdah klei mĭn kyua boh tŭ kluôm, gang mkhư̆ klei tŭ kơ sa anôk, kơ sa êpul hmăi kơ hdră bhiăn. Khua gĭt gai Đảng, Khua lăn čar ăt mtă kơ phung mniê bi ala klă sĭt jĕ giăm hŏng alŭ wăl, mđing hmư̆ klei mĭn, klei čiăng mơ̆ng mnuih ƀuôn sang; ktuê dlăng truh kơ klei mgaih msir dŭm klei akâo mơ̆ng mnuih ƀuôn sang. Boh nik, brei hur har nao hgŭm bi mklă dŭm hdră êlan mđĭ kyar bruă duh mkra - ala ƀuôn, ngăn prăk thŭn 2027, rơ̆ng klei dưi leh anăn klei tŭ dưn djŏ klă mơ̆ng phung mniê leh anăn mnuih ƀuôn sang, đru hluê ngă dŭm mta kñăm mđĭ kyar lăn čar truh thŭn 2030, hnơ̆ng trah dlăng thŭn 2045.