Blŭ hrăm hlăm knăm bi hdơr, Khua gĭt gai Đảng, Khua lăn čar Tô Lâm lač klă, čiăng kiă kriê lăn čar đĭ kyar, Đảng brei amâo mdei mlih mrâo klei mĭn, mđĭ kyar klei čih pioh. Mơ̆ng 30 thŭn êgao, Êpul hgŭm ksiêm hriăm bruă kđi čar gưl dlông bi mklă leh bruă klam phŭn đru kčĕ hdră êlan kơ klei mĭn bruă kđi čar; bi kƀĭn klei thâo mơ̆ng phung khua kiă kriê, kriê dlăng, phung kreh knhâo, phung knuă druh đảng viên lehanăn Mnuih ƀuôn sang. Lăn čar dôk pŏk ngă Hdră mtrŭn Klei bi kƀĭn phung bi ala kluôm ala čar tal XIV mơ̆ng Đảng, gĭr hluê ngă dŭm mta kñăm mđĭ kyar lăn čar truh thŭn 2030 leh anăn thŭn 2045 leh anăn 100 thŭn kơ anăp.

Klei čiăng jing đĭ kyar pral, hơĭt kjăp; mđĭ ai dưi čŏng pô, rơ̆ng kơ klei đĭ kyar, mtăp mđơr yang ƀuôn leh anăn klei hdĭp mnuih ƀuôn sang. Khua gĭt gai Đảng, Khua lăn čar Tô Lâm mtă kơ Êpul gơ̆ng lŏ dơ̆ng bi mklă leh anăn mđĭ hnơ̆ng bruă klam phŭn hlăm klei ksiêm duah hdră mtrŭn, ksiêm wĭt boh sĭt leh anăn đru kčĕ hdră êlan mơ̆ng Đảng, čŏng ksiêm dlăng leh anăn thâo ƀuh dŭm boh klei mrâo. Êpul gơ̆ng kƀĭn ksiêm duah dŭm boh klei kreh knhâo phŭn leh anăn dŭm boh klei mrâo, mjêč mơ̆ng lăn čar, mơ̆ng ênuk gưl. Mbĭt anăn nao êlam hlăm klei mlih mrâo klei mĭn gĭt gai hdră bhiăn, mlih mrâo bruă kriê dlăng ala čar; msir mghaih bi knar klei mjĕ giăm plah wah Knŭk kna, anôk bruă duh mkra leh anăn yang ƀuôn; mđĭ hnơ̆ng tŭ jăk, klei tŭ dưn ba yua ai dưi.