Mñă klă tla hnô, đru, lŏ mkŏ anôk dôk mrâo hmăi klă anăp kơ klei hdĭp mnuih ƀuôn sang leh anăn ăt jing mta phŭn mâo lu klei kčŭt hưn, klei akâo kơ klei ngă soh, sui, phung bi ala lač, brei bi mklă ênoh lăn giăm hŏng ênoh klă sĭt mơ̆ng anôk mnia mblei, đru kơ mnuih ƀuôn sang tŭ hnơ̆ng tla hnô djŏ guôp tơdah hrui mă lăn. Hŏng lăn ngă lŏ hma dôk hlăm krĭng mnuih ƀuôn sang dôk mâo phŭn agha ba yua hơĭt kjăp mơ̆ng lu ênuk gưl, pô bi ala Lê Hữu Trí, êpul mơ̆ng Khánh Hòa akâo, ksiêm duah hdră êlan tla hnô djŏ guôp hŏng phŭn agha lăn, hdră ba yua leh anăn klei hmăi sĭt mơ̆ng bruă hrui mă lăn.

Hluê si pô bi ala Dương Khắc Mai, êpul mơ̆ng Lâm Đồng, brei bi mklă mta phŭn anôk dôk mrâo brei jing jăk hĭn anôk dôk hđăp hŏng dŭm hnơ̆ng čuăn klă klơ̆ng, dưi ksiêm dlăng. Phung bi ala ăt lač, Klei čih mkra Hdră bhiăn mđing hĭn kơ klei čiăng bi hơĭt klei hdĭp, mkra mjing, mnia blei leh anăn krŭ wĭt hdră duh ƀơ̆ng kơ mnuih mâo lăn hrui mă, ƀiădah brei bi klă hĭn bruă klam, boh tŭ hluê ngă hdră êlan. Hdră hrui mă lăn brei dưi ksiêm dlăng amâo djŏ knŏng hŏng hnơ̆ng msir mghaih anôk ala ƀiădah lŏ hŏng klei dưi bi hơĭt klei hdĭp leh anăn krŭ wĭt hdră duh ƀơ̆ng mơ̆ng phung hmăi djŏ.