Hdră čuăl mkă Anôk kriê dlăng bruă Đảng čar Dak Lak wưng thŭn 2025-2030 mâo 122 čô, Anôk kriê dlăng bruă Đảng čar mâo 38 čô. Phŭn agha mnuih mă bruă phŭn rơ̆ng kơ klei lŏ čuê, bi mguôp leh anăn đĭ kyar plah wah dŭm ênuk gưl. Lu phung knuă druh dưi mtô bi hriăm, bi mlih, dăp, ba yua leh anăn đĭ hriê kơ prŏng hlăm boh sĭt. Ƀiădah hdră čuăl mkă mnuih mă bruă amâo djŏ knŏng ruah djăp ênoh. Klei yuôm bhăn hĭn jing ruah djŏ mnuih leh anăn mjing klei găl čiăng kơ phung knuă druh đĭ hriê kơ prŏng.

 Boh sĭt brei ƀuh phung knuă druh mda asei, boh nik hlăm hdră čuăl mkă Anôk kriê dlăng bruă Đảng čar, adôk ƀiă; ênoh phung knuă druh mniê ti dŭm anôk bruă ka lu ôh. Klei dưi mdrơ̆ng hŏng bruă mrâo ăt ka bi knar. Mâo phung knuă druh dôk mtŭk mtŭl tơdah mlih hlăm dŭm mta bruă dleh msĕ si ngăn prăk, lăn ala, rŭ mdơ̆ng. Hlăm klei ba yua gru hmô bruă sang čư̆ êa alŭ wăl dua gưl, klei mĭn huĭ, huĭ soh, huĭ đua klam ăt jing bruă brei dlăng klă nik. Mơ̆ng boh sĭt nah gŭ, Khua bruă Đảng să Quảng Phú Vũ Hồng Nhật lač, hnơ̆ng mkă klei thâo phung knuă druh knhal tuič jing boh tŭ bruă ngă.

“Tơdah leh bi mklă djŏ anôk gun kpăk brei mđing kơ ai dưi, mbha bruă klam klă klơ̆ng lehanăn ktuê dlăng truh kơ jih čiăng mjing klei bi mlih klă sĭt; bruă tal dua brei mă boh tŭ dưn klă sĭt jing hnơ̆ng mkă kơ bruă knuă. Mnuih ƀuôn sang amâo bi mklă phung knuă druh hŏng ênoh klei bi kƀĭn amâodah hră mơar ƀiădah hŏng dŭm bruă klă klơ̆ng dưi msir mghaih lehanăn dŭm klei bi mlih diñu ƀuh hlăm klei hdĭp.”

Klei mĭn anei ăt mdưm klei čiăng klă sĭt hŏng bruă čuăl mkă knuă druh: Amâo dưi dlăng knŏng kơ hră mơar, hnơ̆ng hriăm amâodah klei mă bruă, ƀiădah brei dlăng kơ klei thâo msir mghaih boh klei, klei dưi mkŏ mjing hluê ngă leh anăn boh tŭ bruă knuă. Blŭ hrăm ti anôk bi kƀĭn, Khua bruă Đảng čar Dak Lak Lương Nguyễn Minh Triết mñă klă, hdră čuăl mkă brei klă sĭt jing hdră mjing phung knuă druh mâo hnơ̆ng tŭ jăk; mơ̆ng anăn thâo ƀuh hnưm phung mâo knhuah, klei thâo, kơhưm leh anăn klei čang hmăng čiăng mtô mjuăt, mjuăt bi hriăm, mjuăt bi hriăm djŏ mnuih, djŏ klei čiăng.

“Klei čiăng mđĭ kyar mrâo mơ̆ng čar brei êpul knuă druh êlâo hĭn bi mlih klei mĭn, hdră mĭn, hdră ngă hlăm boh klei ară anei. Drei amâo dưi lŏ ngă tui si klei thâo mơ̆ng êlâo ôh. Brei mlih ktang mơ̆ng klei mĭn kriê dlăng jing klei mĭn mkŏ mjing klei đĭ kyar, mơ̆ng msir mghaih bruă knŭk kna jing mkŏ mjing boh tŭ dưn klei đĭ kyar, mơ̆ng klei mĭn wưng bhiâo jing klei mĭn sui thŭn kluôm dhuôm leh anăn mâo klei bi mguôp krĭng lăn.”