Mă klei hriăm mơ̆ng gưl êa lip prŏng hlăm mlan 11/2025, thŭn anei, bruă duah anôk gang mkhư̆ kơ mnuih ƀuôn sang ti dŭm krĭng êlam, krĭng huĭ hyưt mâo čar Dak Lak mđing dlăng êdi. Ti dŭm să nah Ngŏ čar, 100 boh sang gang mkhư̆ êa lip yang ƀuôn giăm leh bi leh, djăp, hmao ba jao hlăm krah mlan 9 anei. Mbĭt hŏng anăn, dŭm pluh boh sang gang mkhư̆ êa lip hluê dŭm hnơ̆ng, hdră mdê mdê ăt dưi rŭ mdơ̆ng mơ̆ng dŭm phŭn prăk yang ƀuôn. Ti dŭm anôk amâo mâo sang gang mkhư̆ êa lip, mnuih ƀuôn sang čŏng mkiêt mkriêm čiăng rŭ mdơ̆ng sang krum gang mkhư̆ êa lip ti sang.

Mnơ̆ng ƀơ̆ng huă, mnơ̆ng yua leh anăn êa mnăm čiăng gang mkhư̆ tơdah mâo angĭn êbŭ, êa lip ăt jing bruă brei mprăp mtam ti gŏ sang. Mơ̆ng boh sĭt lu mnuih hlăm leh anăn êdei kơ êa lip amâo mâo djăp mnơ̆ng ƀơ̆ng huă, êa mnăm leh anăn čhum ao mđao, abăn msăm čiăng yua hlăm gưl êa lip thŭn dih, mnuih ƀuôn sang čŏng pô mă klei hriăm hlăm bruă mprăp hlăm yan hjan êa lip thŭn anei.

Bi kơ bruă sang čư̆ êa alŭ wăl leh anăn dŭm êpul thơ̆ng kơ bruă, bruă gang mkhư̆ klei yan adiê ngă mâo mprăp leh kjăp. Mơ̆ng êlâo kơ yan hjan, Anôk bruă kriê dlăng knơ̆ng kdơ̆ng êa leh anăn Adŭ bruă gang mkhư̆ klei yan adiê ngă (Phŭn bruă lŏ hma leh anăn wăl hdĭp mda) bi hgŭm hŏng Knơ̆ng bruă lŏ hma leh anăn wăl hdĭp mda čar Dak Lak, Anôk bruă ksiêm hriăm kơ mnơ̆ng ƀơ̆ng tŭ jăk (Phŭn bruă mdrao mgŭn) mkŏ mjing klei hriăm mjuăt "Mđĭ klei thâo săng êpul êya hlăm bruă ksiêm dlăng klei truh yan adiê leh anăn rơ̆ng mnơ̆ng ƀơ̆ng tŭ jăk mjêč" ti Dak Lak. Mơ̆ng anăn, phung hriăm jing phung hlăm êpul đru dŏng klei truh yan adiê, êpul răng mgang klei êđăp ênang dŭm să, ƀuôn hgŭm… dưi ktrâo lač hluê ngă dŭm kdrăp ksiêm dlăng klei truh jhat mơ̆ng yan adiê ngă hluê si êpul êya; thâo ƀuh dŭm mta klei ênưih hmăi djŏ; ba mdah dŭm hdră msir gang mkhư̆, mdrơ̆ng djŏ guôp hŏng klei mâo sĭt mơ̆ng alŭ wăl; ktrâo lač kơ bruă mprăp leh anăn rơ̆ng mnơ̆ng ƀơ̆ng tŭ jăk, boh nik hŏng phung hđeh leh anăn phung mduôn... Phương Văn Lành, Khua bruă Đảng să Hòa Thịnh - sa hlăm dŭm să krĭng êa lêč nah Ngŏ čar Dak Lak, brei thâo:

Să ăt bi hgŭm leh hŏng Anôk bruă gang mkhư̆ klei yan adiê ngă mkŏ mjing klei hriăm mjuăt klei thâo, klei mbruă kơ bruă gang mkhư̆ klei yan adiê ngă, mdrơ̆ng hŏng klei hjan hlĭm kơ mnuih ƀuôn sang; mbĭt anăn mprăp mran lehanăn ao mŭng kơ dŭm alŭ čiăng čŏng pô. Mbĭt anăn, să ăt tŭ mă leh dŭm kŭm păn hŏng hnơ̆ng prŏng čiăng mkăp kơ bruă mdrơ̆ng hŏng klei yan adiê ngă hlăm wưng kơ anăp."

Hluê si Đào Mỹ, K'iăng khua anôk bruă sang čư̆ êa čar Dak Lak, ară anei čar dôk mjêč ksiêm dlăng, bi mklă hdră mdrơ̆ng hŏng klei yan adiê ngă dŭm mlan knhal jih thŭn 2026. Ti dŭm să, mđing bi kjăp hdră êlan " pă anôk", mđĭ ai dưi gưl să; dăp mnơ̆ng dhơ̆ng, kdrăp mnơ̆ng, kdrăp yua leh anăn mnơ̆ng yua aguah tlam ti dŭm krĭng huĭ hyưt, rơ̆ng dưi nao truh leh anăn yua mtam. Mbĭt anăn, Anôk bruă sang čư̆ êa čar Dak Lak mtă kơ dŭm să mkŏ mjing hdră bi hgŭm, đru kčĕ hluê krĭng krông, nah tluôn dŭm knơ̆ng kdơ̆ng êa, krĭng ktuê hang ksĭ leh anăn dŭm krĭng huĭ hyưt. Êpul kahan răng mgang knông lăn mơ̆ng čar truh kơ să ăt mđing mjuăt bi hriăm mprăp kơ klei dŏng đru hlăm dŭm klei mjêč.

"Ară anei hmei ăt dôk lŏ dơ̆ng bi kluôm Êpul gĭt gai hdră gang mkhư̆ klei ruă tưp ti gưl nah gŭ čiăng bi djŏ guôp hŏng bruă čŏng pô mdrơ̆ng hŏng dŭm boh klei ti alŭ wăl."