Blŭ hrăm klah čŭn klei bi kƀĭn, Khua gĭt gai Đảng, Khua lăn čar klă klơ̆ng tŭ ư hŏng klei hưn mdah, dŭm klei kčĕ mơ̆ng Anôk bruă gĭt gai gưl dlông kơ bruă ksiêm wĭt boh sĭt leh anăn ksiêm hriăm mkra mlih, thiăm mbŏ Hdră bhiăn Đảng leh anăn hdră êlan mprăp hră mơar ba mdah kơ Phŭn bruă kđi čar, ba mdah kơ Klei bi kƀĭn gưl dlông 4.

Khua gĭt gai Đảng, Khua lăn čar mtă brei bi leh hdră kčah ksiêm wĭt boh sĭt leh anăn ksiêm duah mkra mlih, thiăm mbŏ Hdră bhiăn Đảng, rơ̆ng djŏ hdră kčah, klă boh tŭ leh anăn dưi ksiêm dlăng hnơ̆ng ngă bruă. Brei ksiêm dlăng kjăp grăp wưng kčah, klei čiăng hŏng boh tŭ leh anăn hdră ksiêm dlăng hnơ̆ng tŭ jăk. Khua gĭt gai Đảng Tô Lâm lač klă "Knŏng ksiêm duah ba hlăm hdră bhiăn dŭm boh klei dưi ksiêm wĭt, ksiêm dlăng, mâo klei bhiăn, tur knơ̆ng, hơĭt kjăp leh anăn brei hluê ngă sa hnơ̆ng hlăm kluôm Đảng. Dŭm boh klei ka djăp klei găl brei lŏ ksiêm duah, amâo bi mlih hdră êlan mta phŭn hdră mtrŭn hlăm hdră bhiăn."