Thŭn 2026, bruă mdrơ̆ng hŏng klei yan adiê ngă mâo čar Dak Lak mđĭ ktang hluê hdră pral hĭn, hŏng giăm 100 anôk mkă hnơ̆ng hjan thơ̆ng yua, 11 anôk kăp hưn brei răng êa lêč čŏng pô; 100% să, ƀuôn hgŭm mkŏ mjing êpul ba anăp gang mkhư̆ klei yan adiê ngă hŏng êbeh 11.000 čô mnuih. Boh sĭt ăt čiăng kơ dŭm anôk bruă lŏ dơ̆ng msir mgaih, hlăm anăn mâo bruă bi hgŭm, kah mbha klei hâo hưn hlăm hdră ba yua knơ̆ng kdơ̆ng êa leh anăn mbĭt knơ̆ng kdơ̆ng êa tơdah mâo hjan prŏng. Anei jing klei hriăm Dak Lak mđing dlăng leh gưl êa lip prŏng mlan 11 thŭn dih.

Blŭ hrăm ti anôk bi kƀĭn, Khua bruă Đảng čar Dak Lak Lương Nguyễn Minh Triết mtă brei rơ̆ng bi trông klei hâo hưn nanao hŏng čar Gia Lai kơ hnơ̆ng hjan, hnơ̆ng êa leh anăn bruă ba yua dŭm knơ̆ng kdơ̆ng êa, mbĭt anăn hưn brei răng brei truh hŏng mnuih ƀuôn sang êlâo kơ pŏk phai êa. Mơ̆ng akŏ thŭn truh kơ ară anei, klei truh yan adiê ti alŭ wăl čar Dak Lak ngă kơ 2 čô djiê, 109 boh sang jhat rai, luč liê êbeh 2.8 êklai prăk.