100 sang bi kƀĭn êpul êya mguôp hŏng bruă gang mkhư̆ klei êa lip lêč dưi pŏk ngă ti 27 să, ƀuôn hgŭm, ênoh duh bi liê êbeh 170 êklai prăk mơ̆ng prăk knŭk kna čar Dak Lak. Hdră bruă mphŭn rŭ mdơ̆ng hruê 27/6/2026. Dŭm hdră bruă dưi mkra mjing 2 tal, hŏng 3 gru hmô rŭ mdơ̆ng djŏ guôp hŏng klei bhiăn dhar kreh grăp alŭ wăl, ênhă sang kah knar 300m2 grăp boh sang. Truh ară anei, jih jang hdră bruă dưi bi leh lehanăn dôk ba jao ba yua. Nao hlăm knăm mphŭn ba yua, Đặng Kim Hùng, alŭ Ân Niên, brei thâo bruă mâo thiăm sang đuĕ kơ êa lip đru kơ mnuih ƀuôn sang čŏng pô hĭn tơdah mâo klei truh yan adiê:

“Dŭm gŏ êsei sang điêt msĕ si mrâo anei mnuih ƀuôn sang dleh dlan êdi. Kyua knŭk kna đru jing rŭ mdơ̆ng sang gang êa lêč msĕ snei jing mnuih ƀuôn sang hơ̆k mơak êdi, mơak snăk.”

Čiăng kơ hdră bruă dưi rŭ mdơ̆ng djŏ anôk, găl ênưih kơ mnuih ƀuôn sang yua, lu gŏ sang čŏng myơr lăn. Nguyễn Liễm, ti alŭ Hiệp Đồng, să Hòa Xuân, myơr leh hlăm brô 450m² lăn mơ̆ng gŏ sang čiăng rŭ mdơ̆ng sang bi kƀĭn êpul êya bi mguôp gang mkhư̆ klei êa lip, kah mbha:

“Mmông sang kjăp, dlông hĭn 1m mkă hŏng gưl êa lip mrâo êgao, snăn mnuih ƀuôn sang hơ̆k mơak êdi, tơdah êa lip amâodah angĭn êbŭ truh snăn kƀĭn tinăn jih. Lač kluôm tinăn ară anei êđăp ênang êdi”

Nguyễn Thiên Văn, kiăng khua bruă sang čư̆ êa čar Dak Lak mñă klă, dŭm hdră bruă mrâo mkăp kơ klei hdĭp êpul êya, lŏ jing anôk êđăp ênang tơdah mâo klei truh yan adiê. Kyua anăn, dŭm să, ƀuôn hgŭm brei kriê dlăng, krơ̆ng kjăp, ba yua tŭ dưn; ksiêm dlăng dŭm klei găl kơ pui kmlă, êa, klei hâo hưn čiăng mprăp ba yua ngă anôk mbĕ đuê̆ tơdah mâo klei truh yan adiê.

Nguyễn Thiên Văn mtă kơ dŭm knơ̆ng, dhar bruă leh anăn dŭm să, ƀuôn hgŭm ksiêm dlăng gru hmô wưng tal 1 Hdră bruă duh bi liê rŭ mdơ̆ng sang bi kƀĭn êpul êya mguôp hŏng hdră gang mkhư̆ klei êa lip ti alŭ, ƀuôn, krĭng ƀuôn prŏng. Mơ̆ng anăn, ksiêm dlăng pŏk mlar ti dŭm krĭng kreh hmăi mơ̆ng adiê hjan êa lip, klưh hroh lăn.

“Êlâo hĭn jing mkăp kơ klei čiăng hlăm klei hdĭp dhar kreh êpul êya, dŭm bruă yuôm bhăn mơ̆ng alŭ, ƀuôn, krĭng. Boh nik hlăm bruă gang mkhư̆ klei truh yan adiê snăn mguôp hŏng bruă mkŏ mjing hdră 4 tinăn mtam, kyua anăn alŭ wăl brei ksiêm dlăng dŭm klei găl kơ anôk bruă nah gŭ, pui kmlă, klei hâo hưn čiăng mprăp ngă anôk mbĕ đuê̆, anôk dôk êđăp ênang kơ mnuih ƀuôn sang tơdah mâo asăp mtrŭn amâodah tơdah mâo klei truh yan adiê.”