Ti Dak Lak, sa hlăm dŭm alŭ wăl mâo hnơ̆ng mtô bi hriăm prŏng hĭn krĭng Lăn Dăp Kngư, bruă lŏ mkŏ dăp anôk bruă mtô bi hriăm dôk pŏk ngă hŏng hnơ̆ng bruă prŏng êdi. Kluôm čar ară anei mâo 1.267 anôk bruă mtô bi hriăm, mtô bi hriăm bruă mă knŭk kna hŏng êbeh 40.400 čô knuă druh, nai mtô, mnuih mă bruă. Hluê hdră mkŏ dăp, ênoh anôk bruă mtô bi hriăm mĭn tĭng hrŏ adôk 655 anôk bruă.

Bruă mkŏ dăp amâo djŏ knŏng kñăm bi hrŏ anôk bruă kriê dlăng ƀiădah mđing truh kơ mta kñăm ba yua tŭ dưn hĭn ai dưi, mđĭ hnơ̆ng tŭ jăk bruă mtô bi hriăm. Ƀiădah, mbĭt hŏng anăn jing klei akâo čiăng hlăm bruă knuă druh, boh nik jing bruă ruah phung khua kiă kriê, kiăng khua kiă kriê ti dŭm sang hră leh mkŏ dăp. Knơ̆ng bruă sang čư̆ êa čar Dak Lak mtă kơ bruă ruah phung knuă druh kriê dlăng bruă sang hră mơar brei tĭng kơ dŭm hnơ̆ng čuăn klă klơ̆ng, hưn mdah, klă mngač leh anăn dưi ksiêm dlăng. Dŭm mta phŭn dưi ksiêm dlăng mâo gưl thŭn, klei thâo mă bruă, klei thâo kriê dlăng, klei thâo hlăm bruă. Khua knơ̆ng bruă sang čư̆ êa čar Dak Lak Đỗ Hữu Huy mtă:

“Knơ̆ng bruă sang hră mơar hnưm bi mguôp hŏng knơ̆ng bruă kiă kriê bruă knuă ba mdah ênoh čuăn ruah phung khua kiă kriê sang hră, ktang hnưm ktang jăk, ktang klă mngač klă jăk. Mbĭt hŏng anăn knơ̆ng bruă kiă kriê bruă knuă ăt ba mdah hnơ̆ng čuăn ruah phung khua kiă kriê sang hră, k’iăng khua kiă kriê sang hră brei bi nik mâo klei thâo hlăm wưng kơ anăp čiăng amâo mâo ôh dŭm klei dleh kpăk.”

Amâo djŏ knŏng Dak Lak, dŭm alŭ wăl mkăn hlăm krĭng Lăn Dap Kngư ăt dôk pŏk ngă dŭm knhuang nao ktang phĭt kñăm mlih mrâo hdră mtô bi hriăm. Ti Lâm Đồng, kluôm čar ară anei mâo 1.453 sang hră knŭk kna, tĭng leh hdră mkŏ dăp adôk 977 sang hră, hrŏ 476 sang hră; mbĭt anăn hrŏ êbeh 1.810 čô knuă druh kriê dlăng leh anăn mnuih mă bruă. Hdră anei dưi mtă brei hluê ngă djŏ guôp hŏng klei găl grăp alŭ wăl; boh nik rơ̆ng hnơ̆ng êrô êbat mơ̆ng phung hđeh, klei găl anôk bruă nah gŭ leh anăn klei čiăng rơ̆ng kjăp hdră mtô bi hriăm ti krĭng čư̆ čhiăng, krĭng taih kbưi.

Ti Gia Lai, Knơ̆ng bruă sang čư̆ êa čar ba mdah leh hdră mkŏ dăp, mkŏ wĭt anôk bruă sang hră gưl hđeh điêt leh anăn gưl sa knŭk kna čiăng mđĭ boh tŭ kriê dlăng, ba yua êpul nai mtô, anôk bruă nah gŭ. Hluê si hdră, ênoh sang hră gưl hđeh điêt leh anăn gưl sa knŭk kna mơ̆ng čar srăng hrŏ mơ̆ng 1.267 sang hră adôk 699 sang hră, hrŏ 568 sang hră. Bruă mkŏ dăp dưi hluê ngă hluê hdră, djŏ guôp hŏng klei găl grăp alŭ wăl; hlăm anăn, ti 61 să, ƀuôn hgŭm krĭng găl ênưih, hnơ̆ng hrŏ anôk bruă sang hră êbeh 51%, adôk 74 să, ƀuôn hgŭm adôk êbeh 37%.

 Bruă sang hră mtô bi hriăm Gia Lai bi mklă hdră mkŏ dăp srăng mguôp hŏng rơ̆ng klei dưi hriăm hră mơ̆ng phung hđeh, boh nik phung hđeh krĭng dleh dlan, krĭng mnuih djuê ƀiă. Mbĭt hŏng bruă mnuih mă bruă mơ̆ng anôk bruă mtô bi hriăm, bruă hâo hưn, mjing klei sa ai hlăm yang ƀuôn ăt mâo dŭm alŭ wăl hlăm krĭng Lăn Dap Kngư mđing dlăng. Ti anăp dŭm klei êmuh mơ̆ng sa êpul phung amĭ ama kơ klei huĭ hyưt bi rai klei hriăm hră mơar, bruă mtô bi hriăm dŭm alŭ wăl bi mklă bruă mkŏ dăp lu jing mkŏ mjing hdră kriê dlăng hluê hdră sang hră leh anăn dŭm anôk bi hriăm; phung hđeh ăt hriăm ti sang hră, adŭ leh anăn anôk ară anei, amâo ngă kpăk gun hdră hriăm hră mơar.