Hlăm 9 mlan thŭn 2026, klei duh mkra ti dŭm să, ƀuôn hgŭm ktuê hang ksĭ mơ̆ng Dak Lak lŏ dơ̆ng krơ̆ng kjăp; mnia mblei, bruă nah tluôn, hiu čhưn ênguê leh anăn bruă tuh tia, rông mnơ̆ng hlăm êa mâo klei bi mlih jăk. Mâo 09/15 alŭ wăl bi leh, êgao hdră kčah hrui wĭt ngăn prăk thŭn 2026. Mâo 06 alŭ wăl êmưt bi liê ngăn prăk knŭk kna. Hlăm anăn, să Tuy An Đông bi liê 0%, să Xuân Cảnh giăm 30%, Xuân Lộc êbeh 56.5% leh anăn ƀuôn hgŭm Sông Cầu giăm 57%.

Ƀiădah, bruă lŏ hma, bruă tuh tia mkra mjing, rŭ mdơ̆ng sang dôk, kriê dlăng lăn ala, rŭ mdơ̆ng, duh bi liê ăt adôk lu klei dleh dlan. Bruă dăp wĭt, msir mgaih ngăn drăp knŭk kna đa đa alŭ wăl adôk bluh mâo klei kpăk gun. Klei kƀah knuă druh thơ̆ng kơ bruă, anôk bruă kdrăp hâo hưn ka hrăm mbĭt, dôk hmăi truh kơ hnơ̆ng tŭ jăk, hnơ̆ng ngă bruă, boh nik hlăm dŭm mta bruă lăn ala, čuăl mkă, rŭ mdơ̆ng, ngăn prăk, duh bi liê leh anăn kdrăp hâo hưn.

Hlăm 03 mlan knhal jih thŭn 2026, hnơ̆ng bruă adôk prŏng, boh nik bi liê dŭm phŭn mkăp prăk, bi leh bruă mkŏ mkra, hdră bruă. Hlăk gưl IV ăt jing wưng yan hjan angĭn êbŭ, năng ai hmăi truh kơ hdră hluê ngă, kyua anăn tơdah amâo mâo hdră kčah djŏ snăn srăng dleh dưi mâo dŭm hnơ̆ng kčah đĭ kyar.

Ti anôk bi kƀĭn, dŭm alŭ wăl brei thâo bi mklă leh bruă klam, hdră msir hluê ngă hlăm grăp mlan hlăm gưl IV lehanăn dôk lŏ dơ̆ng ksiêm dlăng, bi leh hdră êlan mđĭ kyar. Khua knơ̆ng bruă sang čư̆ êa čar Dak Lak Đỗ Hữu Huy, boh nik mđing kơ dŭm alŭ wăl adôk ênoh ênil mnơ̆ng dhơ̆ng mkra mjing prŏng brei hluê ngă brei mâo hdră msir klă klơ̆ng, djăp ênŭm čiăng dưi mâo dŭm ênoh čuăn đĭ kyar. Ñu brei thâo srăng ksiêm dlăng KPI hŏng phung knuă druh ba anăp, boh nik jing khua bruă Đảng lehanăn khua knơ̆ng bruă sang čư̆ êa gưl să.

"Čiăng rơ̆ng bi leh 10 hnơ̆ng kčah đĭ kyar mơ̆ng gưl 4, grăp alŭ wăl brei ksiêm dlăng grăp hnơ̆ng kčah leh anăn jao bruă kơ grăp čô knuă druh, čih klă wưng bi leh grăp bruă. Knơ̆ng bruă kiă kriê bruă knuă mă mă ênoh mrô 10 hnơ̆ng kčah anei leh anăn dŭm hnơ̆ng kčah mkăn čiăng bi mklin, ba mdah kơ khua knơ̆ng bruă sang čư̆ êa čar bi mklă hdră kčah KPI gưl 4 mơ̆ng phung khua knơ̆ng bruă sang čư̆ êa dŭm să, ƀuôn hgŭm."

Ti anăp klei mâo mơ̆ng adiê hjan angĭn êbŭ dŭm mlan knhal jih thŭn 2026, dŭm alŭ wăl ktuê hang ksĭ čar Dak Lak bi kluôm ênŭm mnuih mă bruă ti anôk bruă leh anăn ksiêm dlăng krĭng huĭ srăng hmăi kjham čiăng mâo hdră mbĕ đuê̆ mnuih ƀuôn sang mơ̆ng hnưm.

Dŭm să, ƀuôn hgŭm ăt mkŏ mjing hdră rơ̆ng êđăp ênang krĭng rông mnơ̆ng hlăm êa ti êa ksĭ leh anăn ktuê hang ksĭ; rơ̆ng êđăp ênang kơ kŭm păn. Khua knơ̆ng bruă sang čư̆ êa čar Dak Lak mtă kơ dŭm alŭ wăl brei mkŏ mjing mtam hdră ngă bruă klă klơ̆ng, lač klă klei hâo hưn grăp gŏ sang dưi bi ktlah hjăn, êdeh êdâo bi ktlah hjăn lehanăn anôk tŭ drông bi ktlah hjăn, gĭr amâo lui mâo klei amâo mâo jăk.