Hŏng akŏ “Dak Lak - klei găl, klei čang hmăng mđĭ kyar”, klei bi kƀĭn hưn mdah hdră čuăl mkă leh anăn mđĭ duh bi liê thŭn 2026 iêo jak hlăm brô 1000 čô bi ala jing khua gĭt gai dŭm Phŭn, dhar bruă gưl dlông, êpul bruă lu ala čar, êpul hgŭm duh mkra, êpul grup  duh mkra leh anăn phung bi liê hlăm ala čar, ala tač êngao.

 Klei mñă yuôm bhăn mơ̆ng klei bi kƀĭn jing hưn mdah Hdră mtrŭn bi mklă Mkra mđĭ klei čuăl mkă čar Dak Lak wưng 2021-2030, hnơ̆ng trah dlăng truh thŭn 2050. Hră čuăl mkă mrâo mâo čang hmăng srăng pŏk wăl đĭ kyar prŏng hĭn, tă hdră dŭm krĭng mâo boh kdrŭt, bruă duh mkra leh anăn dŭm anôk đĭ kyar mrâo, mjing tur knơ̆ng kơ alŭ wăl iêô jak klei găl bi liê hlăm wưng mrâo.

 Êngao kơ klei phŭn, Klei bi kƀĭn lŏ mkŏ mjing dŭm bruă ngă msĕ si: Mphŭn rŭ mdơ̆ng,  ba yua dŭm hdră bruă, bruă êdah kdlưn; Klei bi kƀĭn bi blŭ hrăm hŏng anôk bruă duh  mkra, êpul hgŭm bruă leh anăn gŏ êsei mnia blei; Klei bi kƀĭn bruă duh mkra êngao knŭk kna Việt Nam - Klei bi blŭ hrăm alŭ wăl ti Dak Lak; Klei bi trông kơ mđĭ kyar bruă tuh tia mkra mjing êlam leh anăn logistics mlir krĭng; Klei bi trông kơ “mđĭ kyar bruă lŏ hma yua kdrăp mrâo: Klei găl leh anăn hdră bruă kluôm kơ bruă duh mkra”; Klei bi trông kơ “mlih mrô leh anăn mđĭ kyar lu anôk duh mkra hơĭt kjăp”; Knăm rang mdag mnơ̆ng dhơ̆ng tuh tia mjra mjing   krĭng ƀuôn sang êdah kdlưn, OCOP mơ̆ng čar leh anăn dŭm čar riêng gah...

Hlăm klei bi kƀĭn, čar Dak Lak mđup brei leh hră bi mklă tŭ dư hdră êlan bi liê, hră bi mklă čih anăn bi liê leh anăn siñê hră mơar bi hdơr bi hgŭm kơ dŭm pluh hdră bruă hlăm lu mta bruă. Trần Công Sơn, K’iăng Khua Knơ̆ng bruă ngăn prăk čar Dak Lak brei thâo, mbĭt hŏng bruă iêô jak bi liê hŏng klei klă sĭt, čar dôk pŏk ngă klei bhiăn găl jăk kñăm bi hrŏ jih hnơ̆ng wưng msir mgaih hră mơar kơ anôk bruă duh mkra.

“Knơ̆ng bruă ngăn prăk kčĕ leh hŏng Knơ̆ng bruă sang čư̆ êa čar mkŏ mjing klei bhiăn găl jăk hlue si hdră  bi hrŏ 50% hră mơar knŭk kna, hŏng gưl bi mklă hdră êlan bi liê êlâo dih jing 17 hruê mmông adôk 8,5 hruê. Ară anei klei bhiăn găl jăk mâo čar hưn mdah, kơ anăp hlăm tur knơ̆ng ksiêm dlăng dŭm knơ̆ng bruă djŏ tuôm kčĕ kơ Knơ̆ng bruă sang čư̆ êa čar mâo hră mơar hlue si hdră bi khuăt djô̆ tuôm kơ hdră bi liê čiăng rơ̆ng kơ dŭm hdră bruă hnưm ngă bruă leh anăn mđĭ lar boh tŭ bi liê.”

Amâo kƀĭn ruh mgaih klei kpăk đuôm kơ hră mơar ôh, čar Dak Lak ăt dôk mprăp hrăm mbĭt klei găl kơ anôk bruă nah gŭ, klei găl mnuih mă bruă leh anăn mlih mrô čiăng drông dŭm hdră bruă mrâo. Hlue si Anôk bruă mkŏ mjing,  hŏng dŭm pluh hdră bruă mâo mđup brei hră mtrŭn bi liê leh anăn siñê klei bi hgŭm, anei dưi dlăng jing sa hlăm dŭm klei mđĭ kyar bi liê mâo hnơ̆ng prŏng hĭn mơ̆ng êlâo truh ară anei mơ̆ng alŭ wăl.

Hlăm boh klei wăl mđĭ kyar mrâo dôk mlar lu klei găl bi hgŭm krĭng plah wah Lăn Dap Kngư leh anăn ktuê hang ksĭ Dhŭng kwar Krah, klei bi kƀĭn tal anei mâo čang hmăng amâo djŏ knŏng iêô jak thiăm klei găl kơ klei mđi kyar bruă duh mkra - ala ƀuôn ôh ƀiădah lŏ mjing knhuang mlih mrâo hlăm klei mĭn iêô jak bi liê, mơ̆ng klei tui tiŏ ênoh truh kơ ruah hdră bruă mâo hnơ̆ng jăk, mâo klei mjing boh kdrŭt đĭ kyar sui kơ alŭ wăl. Trương Công Thái,  K’iăng Khua Knơ̆ng bruă sang čư̆ êa čar Dak Lak, bi mklă:

  “Klei bi kƀĭn hưn mdah hdră čuăl mkă čar leh anăn mđĭ kyar bi liê thŭn 2026 mơ̆ng čar Dak Lak, hŏng anăn hdră bruă leh anăn ênoh bi liê dŭm anôk bruă duh mkra čih anăn snăn dưi lač anei jing sa hlăm dŭm gưl iêô jak bi liê prŏng hĭn mơ̆ng êlâo truh kơ ară anei leh bi mŭt dua čar Dak Lak leh anăn Phú Yên. Hŏng klei găl msĕ si ară anei kơ čar kƀĭn pŏk ngă mkra mđĭ hră mơar, bi mlih mrô; tal dua jing mtô bi hriăm mnuih mă bruă leh anăn êpul mă bruă mâo klei găl bruă knuă čiăng duh kơ hdră bruă hlăm wưng kơ anăp; tal tlâo jing hŏng bruă msir hră mơar mơ̆ng tal êlâo hlăk phung duh bi liê mă bruă snăn hmei srăng mâo klei bi hgŭm mtam leh anăn msir mgaih klei dleh dlan”./.