Dak Lak ară anei mâo 667 knơ̆ng kdơ̆ng êa, hlăm anăn tĭng Yŭ mâo 253 knơ̆ng kdơ̆ng êa, tĭng Ngŏ mâo 414 knơ̆ng kdơ̆ng êa. Ti tĭng Yŭ, knŏng 130 knơ̆ng kdơ̆ng êa djăp hnơ̆ng êa đĭ msĕ si yăng đar, mâo 51%, ƀiă hĭn mkă hŏng hnơ̆ng 64% mơ̆ng wưng anei dŭm thŭn êlâo. Ti tĭng Ngŏ, hnơ̆ng êa dŭm knơ̆ng kdơ̆ng êa lu jing truh 70% truh kơ gŭ 100% hnơ̆ng knơ̆ng kdơ̆ng êa. Phŭn êa ti dŭm hnoh krông Sêrêpôk, krông Ba, krông Kỳ Lộ leh anăn lu hnoh krông, hnoh êa mkăn ăt ti hnơ̆ng ƀiă hĭn amâo dah giăm msĕ hŏng kah knar lu thŭn.

Đặng Thị Thủy, K'iăng khua knơ̆ng bruă lŏ hma leh anăn wăl hdĭp mda čar Dak Lak brei thâo, El Nino năng ai srăng ngă kơ klei adiê không kƀah êa đĭ hlăm yan bhang thŭn 2026–2027. Hnơ̆ng hjan thŭn anei đăo knăl ƀiă hĭn mkă hŏng hnơ̆ng kah knar lu thŭn mơ̆ng 20–40%. Tĭng nah Ngŏ năng ai kƀah êa kơ 2.500 ha mdiê yan Puih Mnga leh anăn 40.000 ha yan Bhang Hjan; tĭng nah Yŭ năng ai hmăi truh mơ̆ng 68.000 truh 100.000 ha mnơ̆ng pla, hlăm brô 42.000 gŏ êsei mnuih ƀuôn sang năng ai kƀah êa yua aguah tlam. Anôk bruă lŏ hma mtă brei mkra mlih hdră rah pla hluê si êa krih leh anăn ruah mjeh mdiê djŏ guôp. Đặng Thị Thủy lač dŭm hdră msir.

"Hluê si hdră kčah grăp thŭn, mơ̆ng hruê 20/12/2026 truh 10/01/2027 jing wưng rah pla mdiê phŭn yan Puih Mnga. Tơdah mâo klei kƀah êa, brei mnuih ƀuôn sang bi kdung wưng rah pla čiăng ñĕ kơ klei luič liê prŏng. Dŭm krĭng amâo mâo klei kƀah êa, dưi mkăp djăp êa krih snăn mnuih ƀuôn sang bi rah pla hnưm hĭn hdră kčah. Êngao anăn, Knơ̆ng bruă jao leh kơ Anôk bruă pla mjing leh anăn răng mgang mnơ̆ng pla mjing čar bi hgŭm hŏng dŭm alŭ wăl ksiêm duah dŭm mta mjeh mdiê djŏ guôp čiăng bi mlih mjeh hđăp dưi gang mkhư̆ klei kƀah êa."

Nguyễn Thiên Văn, k'iăng khua knơ̆ng bruă sang čư̆ êa čar Dak Lak, mtă kơ dŭm knơ̆ng, dhar bruă, alŭ wăl dôk gak răng, ngă bruă jih hruê mdei; čŏng pô mkăp êa ti dŭm knơ̆ng kdơ̆ng êa, bi hrŏ klei luč liê. Dŭm alŭ wăl ksiêm dlăng ênhă mnơ̆ng pla, mkra mlih hdră pla mjing, ruah mjeh mdiê djŏ guôp; ktrâo lač kơ mnuih ƀuôn sang krih êa mkiêt mkriêm, mkăp êa leh anăn mjêč mkra mđĭ anôk bruă mkăp êa yua. Mbĭt anăn, đru kdrăp mkăp êa leh anăn čŏng pô hdră gang mkhư̆ klei pui ƀơ̆ng dliê. Nguyễn Thiên Văn mñă klă:

“Brei drei čŏng pô gang mkhư̆, hmao mdrơ̆ng leh anăn gĭt gai mbruă hlăm hdră gang mkhư̆, mdrơ̆ng hŏng adiê không kƀah êa. Brei mđing tal êlâo hĭn kơ bruă mkăp êa yua kơ mnuih ƀuôn sang, boh nik krĭng taih kbưi, krĭng mnuih djuê ƀiă. Knơ̆ng bruă lŏ hma leh anăn wăl hdĭp mda bi hgŭm hŏng dŭm alŭ wăl, knơ̆ng bruă, dhar bruă djŏ tuôm lŏ dơ̆ng ktuê dlăng kjăp phŭn mkăp êa, klei dưi mkăp êa mơ̆ng grăp hdră bruă; čŏng bi mlih, bi leh dŭm hdră êlan gang mkhư̆ klei truh jhat, mbĭt anăn mkŏ mjing hdră êlan, hdră msir gang mkhư̆ klei pui ƀơ̆ng dliê čiăng mdrơ̆ng”.