Mâo 8 klei čih mkra hdră bhiăn mâo mđing bi trông, đru mguôp, mâo: Hdră bhiăn bi lông blei (lŏ mlih mrâo); Hdră bhiăn bi lông blei ngăn drăp (lŏ mlih mrâo); Hdră bhiăn sang dôk (lŏ mlih mrâo); Hdră bhiăn mđĭ kyar anôk bruă duh mkra điêt leh anăn man dưn; Hdră bhiăn lŏ mlih mrâo, thiăm mbŏ dŭm mta mơ̆ng Hdră bhiăn mnia mblei, Hdră bhiăn bi ktưn, Hdră bhiăn kriê dlăng bruă mnia mblei hŏng ala tač êngao, Hdră bhiăn răng mgang klei tŭ dưn mnuih blei yua; Hdră bhiăn hrui blei, hrui mă ngăn drăp; Hdră bhiăn lŏ mlih mrâo, thiăm mbŏ dŭm mta mơ̆ng Hdră bhiăn răng mgang klei êđăp ênang, doh êƀăt hlăm bruă mă; leh anăn klei čih mkra Hdră bhiăn lŏ mlih mrâo, thiăm mbŏ dŭm mta mơ̆ng dŭm hdră bhiăn kơ klei mjuăt ktang asei mlei, hiu čhưn ênguê, sang dlăng hră, film, mnơ̆ng kriê pioh dhar kreh, klei hưn mthâo, klei čih.

Năng mđing jing kơ hră čih mkra mlih, thiăm mbŏ dŭm mta mơ̆ng Hdră bhiăn klei êđăp ênang, doh ê ƀăt hlăm bruă knuă, phung bi ala akâo pŏk mlar mnuih nao hgŭm hlăm hră ênua klei truh êka hlăm bruă knuă, klei ruă djŏ tuôm kơ bruă knuă brei mguôp hŏng hdră đru djŏ guôp. Hluê anăn, brei ksiêm dlăng klei čuăn klă klơ̆ng phŭn đru mơ̆ng êpul mnuih mă bruă amâo mâo hră kuôl kă mă bruă dôk hlăm gŏ êsei ƀun, giăm ƀun amâo dah hdĭp ti krĭng mnuih djuê ƀiă.