Hluê ngă hdră mtrŭn 57, thŭn anei čar Dak Lak mĭn tĭng mkăp brei êbeh 1.000 êklai prăk kơ klei kreh knhâo kdrăp mrâo lehanăn mlih mrâo mbruă, mbĭt anăn mĭn tĭng lŏ dơ̆ng đĭ hlăm dŭm thŭn kơ anăp. Khă snăn, truh kơ ară anei čar knŏng mrâo mkăp brei hlăm brô 30 êklai prăk lehanăn ênoh prăk anei ăt ka ba yua jih ôh.

Cao Đình Huy, Khua knơ̆ng bruă ngăn prăk, brei thâo Dak Lak amâo kƀah ôh ai dưi kơ klei kreh knhâo, kdrăp mrâo lehanăn mlih mrâo hŏng klei mbruă. Hŏng dŭm hdră êlan đru hlăk dôk ba yua, anôk bruă duh mkra điêt lehanăn man dưn dưi mâo klei đru truh 100 êklăk prăk hlăm grăp thŭn. Dŭm bruă ksiêm duah klei kreh knhâo mâo ngăn prăk đru mơ̆ng 50% truh 100% ênoh prăk mnuih mă bruă, mnơ̆ng yua lehanăn kdrăp mnơ̆ng. Ƀiădah, brei mkŏ mjing dŭm hdră bruă, klei akâo djăp ênŭm čiăng pŏk ngă.

 Kơ anôk bruă duh mkra, Phạm Ngọc Duy Liêm lač snei, wăl anôk mnia mblei ară anei amâo kƀah ôh phần mềm amâo dah dŭm hdră msir kdrăp mrâo. Khă snăn, anôk bruă duh mkra brei bi mklă ya klei pô čiăng leh anăn ya bruă dưi mgaih msir hŏng kdrăp mrâo, mơ̆ng anăn ba mdah klei čiăng klă klơ̆ng hŏng anôk bruă duh mkra kdrăp mrâo.

“Dŭm anôk bruă duh mkra kdrăp mrâo hmei dôk kƀah jing klei čiăng mơ̆ng anôk bruă duh mkra, jing drei srăng bi trông dua nah, amâo djŏ knŏng jing anôk bruă duh mkra kdrăp mrâo hriê hưn mdah kdrăp mrâo ƀiădah jing dŭm anôk bruă srăng ba mdah dŭm klei lông dlăng, ba mdah dŭm klei dleh dlan čiăng kơ anôk bruă duh mkra kdrăp mrâo nao mghaih msir”.

Phung bi ala ba mdah, hŏng klei găl kơ bruă lŏ hma, mkra mjing mnơ̆ng lŏ hma leh anăn hiu čhưn ênguê, Dak Lak dưi mđing tal êlâo dŭm bruă msĕ si bruă lŏ hma thâo mĭn, tui duah phŭn agha, kriê dlăng bruă mkra mjing, mkra mjing leh anăn hiu čhưn ênguê thâo mĭn; mkŏ mjing anôk lông ngă bruă kdrăp mrâo, anôk anôk bruă duh mkra ba mdah bruă čiăng kơ dŭm anôk bruă kdrăp mrâo lông ngă hdră msir hlăm brô 3 truh kơ 6 mlan; tơdah dưi bi mklă klei tŭ dưn snăn lŏ pŏk mlar.

Đỗ Hữu Huy, Khua anôk bruă sang čư̆ êa čar Dak Lak tĭng dlăng, lu phung duh mkra ti alŭ wăl jing phung duh mkra điêt leh anăn man dưn. Hlăm hdră ba yua kdrăp mrâo, tlâo klei gun kpăk prŏng jing phŭn mkăp prăk duh bi liê, mnuih ngă bruă leh anăn klei mĭn amâo jhŏng mlih mrâo. Kyua anăn, čiăng ruh mgaih, čar mtrŭt mđĭ phung duh mkra čŏng duh bi liê hlăm kdrăp mrâo mâo klei dưi, mbĭt anăn mđĭ hĭn klei bi hgŭm plah wah phung duh mkra hŏng bruă sang čư̆ êa, sang hră gưl prŏng, anôk bruă ksiêm hriăm leh anăn phung thơ̆ng kơ bruă kdrăp mrâo.

“Dŭm anôk bruă duh mkra brei bi mlih kơ klei mĭn, kơ hdră êlan kiă kriê, brei mkŏ mjing knhuah gru mlih mrâo hlăm anôk bruă pô. Tal dua jing akâo mđing kơ bruă pô mâo klei găl hlăm alŭ wăl, mđing kơ hdră êlan bi hgŭm "tlâo anôk bruă", anôk bruă duh mkra akâo kơ dŭm knơ̆ng bruă leh anăn anôk bruă duh mkra akâo kơ dŭm sang hră hlăm alŭ wăl čar, dŭm anôk ksiêm hriăm leh anăn phung thơ̆ng kơ bruă kdrăp mrâo hlăm ala čar, êngao ala čar, anôk bruă duh mkra ya mta čiăng, akâo ya mta čiăng kơ knơ̆ng bruă, kơ knơ̆ng bruă sang hră mơar, amâodah kơ dŭm sang hră srăng msir mghaih klei anăn".