Hjan prŏng mơ̆ng mlam 8/9 ngă kơ dŭm alŭ wăl hlăm čar Dak Lak mâo klei êngăp êlam, ngă hmăi djŏ kơ êlan klông. Knơ̆ng bruă sang čư̆ êa čar Dak Lak mtă kơ dŭm alŭ wăl pŏk hdră mdrơ̆ng hŏng klei hjan prŏng dŭm hruê kơ anăp. Knơ̆ng bruă Lŏ hma leh anăn Wăl hdĭp mda čar Dak Lak brei thâo truh 4 mmông tlam hruê 9/9, hjan prŏng ka ngă luič liê kơ mnuih, sang dôk leh anăn bruă mkra mjing. Ƀiădah, dŭm ktuê êlan klông mâo klei êngăp êlam. Ti să Ia Lốp, kban mrô 9 dôk êngăp hlăm brô 50cm, hnơ̆ng êa lŏ đĭ, ngă kơ êlan klông bi ktlah. Bruă sang čư̆ êa alŭ wăl iêu mthưr leh êpul ba anăp kă klei, hưn brei răng, amâo brei mnuih ƀuôn sang găn êrô. Dŭm anôk mơ̆ng să Ea Drông, să Ea Kar, să Čuôr Dăng, čar Dak Lak ăt čih yap êngăp ƀiă.

Êbeh 300 čô hđeh sang hră ti 2 anôk sang hră să Čuôr Dăng brei mdei êjai klei hriăm kyua êlan klông mâo êa lip bi ktlah. Ti anăp klei hjan lŏ dơ̆ng dleh dưi ksiêm dlăng, čar Dak Lak lŏ dơ̆ng mtă kơ dŭm alŭ wăl krơ̆ng kjăp klei ngă bruă, bi klă klei đăo knăl, hưn brei răng kơ yan adiê, pral ksiêm dlăng dŭm krĭng huĭ srăng êngăp êa, klưh hroh lehanăn dŭm anôk êlan klông êdu awăt. Dŭm alŭ wăl pral mâo hdră mbĕ mnuih ƀuôn sang ti dŭm krĭng huĭ srăng klưh hroh truh kơ anôk êđăp ênang.