Hluê anăn, 20 sang hră gưl tlâo dưi bi mŭt mbĭt, mkŏ mjing 10 sang hră gưl tlâo mrâo, mâo: Ƀuôn Hồ, Ƀuôn Ama Thuôt, Chu Văn An, Čư̆ Mgar, Ea Hleo, Nguyễn Bỉnh Khiêm, Nguyễn Huệ, Trần Quốc Tuấn, Lê Trung Kiên leh anăn Krông Ana. Hŏng dŭm Anôk bruă mtô bi hriăm bruă mă - mtô bi hriăm nanao, 10 anôk bruă dưi bi mŭt mbĭt, mkŏ mjing 3 anôk bruă mrâo jing Ƀuôn Hồ, Krông Pač leh anăn Tuy An. Ti anôk bi kƀĭn, Knơ̆ng bruă sang hră mtô bi hriăm ăt hưn mthâo, jao klei bi mklă ruah mdưm mnuih mă bruă ti dŭm anôk bruă mrâo.

Blŭ hrăm ti anôk bi kƀĭn, Khua knơ̆ng bruă sang hră mtô bi hriăm Dak Lak Lê Thị Thanh Xuân brei thâo, bruă mkŏ dăp kñăm bi khuăt anôk bruă, mđĭ boh tŭ dưn kriê dlăng, ba yua anôk bruă leh anăn êpul êya; bi hrŏ ênoh mnuih mă bruă kriê dlăng, mđĭ ênoh mnuih mă bruă mtô bi hriăm, mơ̆ng anăn đru mđĭ hnơ̆ng tŭ jăk bruă mtô bi hriăm.