Blŭ hrăm hlăm Klei bi kƀĭn, Khua knŭk kna Lê Minh Hưng bi mklă, bruă duh mkra dôk tŭ klei kpĭ prŏng mơ̆ng klei čiăng mlih mrâo gru hmô đĭ kyar leh anăn ksiêm dlăng klei prăk luič ênoh. Kyua anăn, dŭm phŭn, dhar bruă, alŭ wăl brei lŏ dơ̆ng čŏng pô, ktang phĭt pŏk ngă dŭm hdră msir ruh mtlaih klei dleh dlan, mtrŭt mđĭ bruă mkra mjing, mnia mblei leh anăn bi liê knŭk kna. Hluê si klei hưn, hlăm 8 mlan êgao, hrui wĭt ngăn prăk knŭk kna đăo tĭng êbeh 2 êklăk êklai prăk; hlăm brô 209 êbâo êklai prăk jia, prăk tăk dưi amâo tĭng, bi hrŏ, lŏ wĭt tĭng kơ mnuih ƀuôn sang leh anăn anôk bruă duh mkra.

Bi liê ngăn prăk knŭk kna mâo 49% hdră kčah; prăk FDI čih yap mâo êbeh 40 êklai USD, đĭ 55% mkă hŏng wưng anei thŭn dih. Hnơ̆ng prăk bi mnia mblei hŏng ala tač êngao mâo hlăm brô 770 êklai USD. Khua knŭk kna Lê Minh Hưng mtă lŏ dơ̆ng kjăp hdră kñăm ksiêm dlăng klei prăk luč ênoh, rơ̆ng kjăp klei hơĭt bruă duh mkra kluôm, mjing tur knơ̆ng mtrŭt mđĭ klei đĭ kyar hlăm dŭm mlan knhal jih thŭn. Phung khua kiă kriê Knŭk kna mđing msir mghaih dŭm anôk gun kpăk, mtrŭt mđĭ dŭm boh kdrŭt đĭ kyar, gĭr bi leh kdlưn hĭn dŭm hdră kñăm mđĭ kyar bruă duh mkra - ala ƀuôn thŭn 2026.