Hòa Thịnh - krĭng êa lip ngă luč liê kjham êdi hlăm êa lip prŏng mlan 11 thŭn dih, ară anei dôk mjêč mprăp gang mkhư̆ klei truh yan adiê. Mbĭt hŏng dŭm boh sang mrâo mâo boh dlông êgao hnơ̆ng êa lip, dưi rŭ mdơ̆ng mơ̆ng "Hdră bruă Quang Trung", 13 boh sang gang êa lip êpul êya dôk dưi rŭ mdơ̆ng. Hluê si Phương Văn Lành, Khua bruă Đảng să Hòa Thịnh, hŏng 13 boh sang gang êa lip, grăp boh sang mâo hnơ̆ng dưi mkăp kơ hlăm brô 200 čô mnuih, alŭ wăl dưi h'ĭt ai tiê hlăm bruă duah anôk êđăp ênang kơ mnuih ƀuôn sang tơdah êa lip đĭ. Bruă mprăp mnuih mă bruă leh anăn mjuăt bi hriăm klei thâo dŏng đru ăt dưi hluê ngă:

"Să Hòa Thịnh dôk mđing lu snăk hdră êlan čiăng mdrơ̆ng, gang mkhư̆ klei yan adiê ngă hlăm yan hjan êa lip ti anăp. Boh nik, să mrâo êgao pŏk ngă leh bruă rŭ mdơ̆ng 13 boh sang tlô êa lip êpul êya. Să ăt bi hgŭm leh hŏng Anôk bruă gang mkhư̆ klei yan adiê ngă mkŏ mjing klei hriăm mjuăt klei thâo, hdră ngă bruă kơ klei gang mkhư̆ klei yan adiê ngă, mdrơ̆ng hŏng klei hjan êa lip kơ mnuih ƀuôn sang; mbĭt anăn mprăp mran leh anăn ao mŭng kơ dŭm alŭ čiăng čŏng pô. Mbĭt anăn, să ăt tŭ mă leh dŭm kŭm păn hŏng hnơ̆ng prŏng čiăng mkăp kơ bruă mdrơ̆ng, gang mkhư̆ klei yan adiê ngă."

Mlir hŏng Hòa Thịnh, să Hoà Mỹ ăt jing alŭ wăl khăng mâo klei êa lip ngă. Klei hriăm ktrŏ hlăm bruă mdrơ̆ng hŏng klei yan adiê ngă ti nah gŭ hlăm gưl êa lip knhal jih thŭn êgao mâo alŭ wăl mă klei hriăm êlam. Nguyễn Hữu Thuận, Khua bruă Đảng să Hoà Mỹ, čar Dak Lak brei thâo:

"Hmei ăt čŏng mprăp leh kơ grăp krĭng ƀuôn sang sa boh hô̆ pui čiăng hluê ngă bruă klam đru dŏng ti anăn mtam. Grăp alŭ msĕ snăn srăng mâo sa êpul đru dŏng mơ̆ng phung êdam êra, ƀĭng ngă lŏ hma kiă kriê."

Yan hjan 2026, dŭm anôk bruă, êpul êya ti čar Dak Lak mâo leh hdră kčah, mprăp ba nao êbeh 24.000 čô knuă druh, lĭng kahan mbĭt hŏng hlăm brô 35.000 kdrăp mnơ̆ng, kdrăp yua čiăng hluê ngă hdră mbĕ đuê̆ mnuih ƀuôn sang, đru dŏng mnuih mâo klei truh leh anăn msir mghaih klei truh mơ̆ng yan adiê ngă tơdah mâo klei truh. Trung tá Phạm Thành Long, Kiăng khua gĭt gai, Anôk bruă gĭt gai răng mgang alŭ wăl 6, Knơ̆ng gĭt gai lĭng kahan čar Dak Lak brei thâo:

"Mkŏ mjing hdră mbha mnơ̆ng dhơ̆ng, kdrăp mnơ̆ng đru dŏng truh kơ 18 Anôk gĭt gai să hlăm alŭ wăl rơ̆ng djăp kơ ênoh kơ dŭm anôk bruă leh anăn êpul êya hluê ngă bruă klam. Hlăm anăn, mđing hĭn kơ ênoh kơ dŭm să leh anăn alŭ wăl mâo klei huĭ hyưt, kreh tŭ klei hmăi mơ̆ng klei truh mơ̆ng yan adiê ngă, boh nik jing hjan hlĭm angĭn êbŭ."