Dak Lak ară anei mâo êbeh 1.200 hdră bruă knơ̆ng kdơ̆ng êa, mâo 676 ênao mgơ̆ng êa, 286 knơ̆ng kdơ̆ng êa, 244 anôk pom êa leh anăn 2 hdră bruă mbông mnuôr êa. Êlâo kơ yan hjan hlĭm, knơ̆ng bruă sang čư̆ êa čar mtă kơ dŭm anôk bruă, alŭ wăl ksiêm dlăng, tĭng dlăng boh sĭt grăp hdră bruă, boh nik dŭm ênao mgơ̆ng êa, knơ̆ng kdơ̆ng êa, hdră bruă toh hroh amâo dah huĭ srăng luič klei êđăp ênang čiăng pral hmao ƀuh, msir mghaih dŭm klei amâo jăk.

Mbĭt anăn, dŭm alŭ wăl brei ksiêm dlăng hdră ba yua knơ̆ng kdơ̆ng êa, knơ̆ng bi êran pui kmlă hŏng ai êa; ksiêm dlăng kdrăp hưn brei răng, klei hâo hưn leh anăn hdră mbĕ đuê̆ mnuih ƀuôn sang hlăm klei mâo hjan prŏng, êa lip amâo dah klei truh hlăm knơ̆ng kdơ̆ng êa. Hŏng dŭm knơ̆ng kdơ̆ng êa prŏng, êpul êya dưi mbha brei dôk gak răng, ktuê dlăng klei mâo hjan hlĭm, hnơ̆ng êa leh anăn pral ba yua, hưn brei răng.