Knơ̆ng bruă sang čư̆ êa čar Dak Lak mtă kơ bruă mkŏ dăp anôk bruă mtô bi hriăm brei mđing truh bi hrŏ hlăm brô 50% anôk mkŏ mjing sang hră, lu hĭn hnơ̆ng ƀiă êdi Gưl dlông kčah mtrŭn. Anei jing mta phŭn dưi mñă ktang hlăm klei bi kƀĭn hŏng dŭm knơ̆ng, dhar bruă leh anăn 102 să, ƀuôn hgŭm kơ hdră mkŏ dăp sang hră mơar, hlăk Dak Lak jing sa hlăm 15 alŭ wăl mâo gưl dlông ruah lông ngă. Ară anei kluôm čar mâo 1.238 anôk bruă mtô bi hriăm knŭk kna. Hdră mtrŭn mơ̆ng dŭm alŭ wăl brei bi hrŏ 462 boh sang hră, bi Knơ̆ng bruă Sang hră mar lehanăn mjuăt bi hriăm brei mtrŭn 690 sang hră, mbĭt anăn mkŏ mjing thiăm lu sang hră mlir gưl. K’iăng Khua Knơ̆ng bruă sang čư̆ êa čar Dak Lak Nguyễn Thiên Văn mtă bruă mkŏ dăp brei dưi ngă hŏng klei kreh knhâo, djŏ guôp hŏng grăp alŭ wăl; knŏng bi hrŏ anôk kriê dlăng, amâo bi mlih anôk hriăm mơ̆ng phung hđeh sang hră.

Knơ̆ng bruă sang čư̆ êa čar Khánh Hòa mrâo bi tŭ ư hdră êlan mkŏ dăp anôk bruă mtô bi hriăm knŭk kna, mprăp kơ thŭn hriăm 2026–2027, hluê anăn, kluôm čar srăng bi hrŏ 248 boh sang hră knŭk knar hŏng 34% ênoh anôk dôk mâo, bi djăp hŏng klei čiăng bi hrŏ ƀiă êdi 30% hlue si klei gĭt gai mơ̆ng Knŭk kna. Ară anei Khánh Hòa mâo 728 anôk bruă mtô bi hriăm knŭk kna hŏng êbeh 26.500 čô knuă druh kiă kriê, nai mtô leh anăn mnuih mă bruă. Leh dăp wĭt, dŭm boh sang hră leh anăn anôk mbha gưl ăt dưi rơ̆ng kjăp bruă mjuăt bi hriăm, rơ̆ng mâo djăp mnơ̆ng yua kơ hđeh sang hră; hjăn sang hră knŭk kna rông ba leh anăn sang hră mdê hjăn ka dưi mkŏ dăp. Hŏng phung knuă druh kiă kriê êbeh, čar srăng ksiêm dlăng tiŏ nao kơ dŭm anôk bruă djŏ tuôm amâodah lŏ dăp wĭt mtô bi hriăm, amâodah mghaih msir mdei tui si klei bhiăn.