Ti dŭm să knông lăn Ia Rvê, Ea Bung, Ƀuôn Đon leh anăn Ia Lốp, čar Dak Lak, phung knuă druh nah gŭ, khua mduôn, mnuih mâo kơhưm, knuă druh alŭ, ƀuôn leh anăn êpul kahan răng mgang knông lăn dưi bi hriăm klei thâo kơ klei hâo hưn hŏng tač êngao, klei dưi kiă kriê krĭng lăn, klei êđăp ênang knông lăn ala čar; mbĭt anăn mprăp klei thâo hâo hưn leh anăn klei êđăp ênang êlan mạng.

Phung čih klei mrâo ktrâo lač kơ klei thâo mkăp, msir mghaih klei hâo hưn, čih mkra mnơ̆ng hâo hưn; thâo kral, msir mghaih klei hâo hưn soh čhuai, mplư hlăm êlan mạng. Bruă dưn yua klei thâo mĭn anak mnuih mkra mjing leh anăn kdrăp mrô ăt dưi hưn mthâo, đru kơ êpul hâo hưn ti nah gŭ čŏng pô hĭn hlăm bruă tŭ mă leh anăn ba mtruh klei hâo hưn.

Amai Nguyễn Thị Thi, ti alŭ 4, să Êa Bung yăl dliê, dŭm klei thâo, klei mbruă anei dưi ba yua hlăm bruă hâo hưn ti alŭ, ƀuôn.

“Mơ̆ng klei bi kƀĭn, kâo thâo săng klă hĭn kơ bruă klam mơ̆ng grăp čô mnuih ƀuôn sang hlăm bruă răng mgang klei êđăp ênang, răng mgang klei dưi kiă kriê knông lăn; mbĭt anăn thâo tŭ mă, kah mbha klei hâo hưn klă sĭt leh anăn amâo hmư̆ klei hâo hưn ka dưi ksiêm dlăng. Êdei anei leh wĭt ti ƀuôn, kâo srăng bi mguôp hlăm dŭm mmông bi kƀĭn êpul, dŭm klei bi kƀĭn ƀuôn, bi trông klă anăp hŏng mnuih ƀuôn sang leh anăn mtrŭt mjhar phung hgŭm hluê ngă jăk hdră bhiăn, hur har nao hgŭm răng mgang klei êđăp ênang, klei êđăp ênang leh anăn klei dưi kiă kriê knông lăn.”

Mbĭt hŏng anăn, dŭm klei bi kƀĭn ăt mjing klei găl čiăng kơ mnuih ƀuôn sang krĭng knông lăn dưi mâo klei hâo hưn djŏ klă kơ boh klei ti knông lăn leh anăn dŭm hdră êlan djŏ tuôm. Lê Đình Quý, K'iăng khua bruă sang čư̆ êa să Ia Rvê, čar Dak Lak brei thâo:

“Anei jing wưng čiăng kơ mnuih ƀuôn sang dưi mâo klei hâo hưn djŏ klă, djŏ hdră bhiăn kơ boh klei ti knông lăn, klei mjĕ giăm, bi mguôp plah wah Việt Nam leh anăn Campuchia ăt msĕ mơh dŭm hdră êlan, hdră mtrŭn djŏ tuôm kơ alŭ wăl knông lăn. Mơ̆ng anăn, mnuih ƀuôn sang mđĭ klei thâo săng, klei đua klam hlăm bruă răng mgang klei dưi kiă kriê kluôm ênŭm lăn čar, hur har nao hgŭm răng mgang klei êđăp ênang, mkŏ mjing klei bi mguôp, klei mjĕ giăm plah wah mnuih ƀuôn sang dua tĭng knông lăn.”

Nguyễn Quốc Hiệp, kiăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak dlăng, hla pŏk yang ƀuôn dôk jing sa hdră hâo hưn jêñ jêñ mơ̆ng mnuih ƀuôn sang. Kyua anăn, mbĭt hŏng ba klei hâo hưn klă sĭt truh kơ nah gŭ, bruă mprăp klei thâo kơ klei hâo hưn soh čhuai, mplư ăt dưi bi mklă jing sa mta phŭn yuôm bhăn. Thŭn anei, hŏng bruă pŏk mlar mnuih leh anăn hdră hâo hưn, bruă hâo hưn hŏng tač êngao dưi ba truh giăm hĭn hŏng phung knuă druh leh anăn mnuih ƀuôn sang ti krĭng knông lăn:

“Hmei pŏk ngă lar ƀar truh kơ knuă druh alŭ, ƀuôn, khua mduôn, khua ƀuôn, êpul knuă druh, mnuih mă bruă phŭn ti nah gŭ, boh nik jing krĭng knông lăn. Hluê hŏng klei bi kƀĭn, hmei mđĭ klei thâo săng mơ̆ng knuă druh, bruă kđi čar leh anăn mnuih ƀuôn sang ti krĭng knông lăn; hưn mthâo, hâo hưn dŭm klei găl, klei mâo, dŭm hdră êlan čiăng răng mgang klei dưi kiă kriê krĭng knông lăn ăt msĕ mơh gang mkhư̆ klei hâo hưn jhat hlăm hla pŏk yang ƀuôn ară anei."

Bruă ba klei hâo hưn klă sĭt truh kơ nah gŭ, mbĭt anăn mđĭ klei thâo mgaih msir klei hâo hưn kơ êpul hâo hưn, khua mduôn, mnuih mâo khưm leh anăn knuă druh alŭ, ƀuôn dưi čang hmăng mjing sa hdră mkŏ plah wah bruă sang čư̆ êa, êpul êya bruă hŏng mnuih ƀuôn sang. Mơ̆ng anăn, mnuih ƀuôn sang krĭng knông lăn mâo thiăm tur knơ̆ng čiăng tŭ mă, ksiêm dlăng klei hâo hưn, mđĭ klei thâo răng leh anăn čŏng nao hgŭm răng mgang klei êđăp ênang, mkŏ mkra krĭng knông lăn êđăp ênang, hgŭm mguôp.