Tlam mbruê (22/09) ti Anôk bruă knŭk kna, Khua knŭk kna Lê Minh Hưng gĭt gai klei bi kƀĭn hŏng Phŭn bruă rŭ mdơ̆ng leh anăn dŭm phŭn dhar bruă djŏ tuôm čiăng ksiêm dlăng, mtrŭt mđĭ hdră pŏk ngă leh anăn bi liê ngăn prăk hŏng dŭm hdră bruă, hdră bruă phŭn ala čar hlăm bruă êlan klông dŭ mdiăng. Blŭ hrăm hlăm mmông mă bruă, Khua knŭk kna Lê Minh Hưng mñă klă, kluôm ênoh prăk duh bi liê hưn mdah mkăp kơ dŭm hdră bruă êlan klông phŭn hlăm thŭn 2026 jing lu êdi, truh êbeh 250.000 êklai prăk.

Anei jing boh kdrŭt yuôm bhăn čiăng dưi pŏk ngă rơ̆ng hnơ̆ng tŭ jăk leh anăn hnơ̆ng ngă bruă čiăng mtrŭt mđĭ klei đĭ kyar bruă duh mkra - ala ƀuôn, đru mguôp tŭ dưn hlăm hdră kñăm đĭ kyar dua ênoh mrô, prăk bi liê tŭ dưn leh anăn mjing tur knơ̆ng kjăp kơ klei đĭ kyar bruă duh mkra ala ƀuôn jih wưng păn bruă. Hlăm boh klei mmông adôk mơ̆ng thŭn 2026 knŏng dôk sa gưl, Khua knŭk kna mtă kơ Phŭn bruă rŭ mdơ̆ng, Phŭn bruă ngăn prăk mbĭt hŏng dŭm alŭ wăl brei gĭr ktưn jih hnơ̆ng, mđing mđĭ ai čiăng dưi mâo mta kñăm bi liê 100% hdră kčah prăk leh jao.