Ti kdrŭn ksĭ Phú Lạc, ƀuôn hgŭm Hòa Hiệp, êlâo kơ hô̆ mran kbiă ti êa ksĭ, dŭm klei găl kơ hră mơar, kdrăp ksiêm dlăng êlan nao, hră čih pioh klei hiu mă kan leh anăn krĭng ngă bruă dưi ksiêm dlăng, mñă. Dŭm klei ka djăp klei găl amâo dưi brei kbiă mơ̆ng kdrŭn ksĭ. Phan Thanh Lực, klam bruă kdrŭn ksĭ Phú Lạc brei thâo, mbĭt hŏng klei ksiêm dlăng mơ̆ng êpul djŏ tuôm, klei hâo hưn nanao đru kơ phung trah mă kan thâo klă dŭm klei čuăn brei hluê ngă mơ̆ng hlăk mprăp gưl hiu trah mă kan.

"Jih jang dŭm anôk bruă ba mnuih ƀuôn sang mŭt čiăng ñĕ kơ klei 3 amâo mâo. Mâo hră čih pioh djăp ênŭm, boh nik jing amâo mâo ksĭng mmiă krĭng êa ksĭ ala tač êngao."

Thiếu tá Lương Công Hậu, K'iăng khua kđông kahan răng mgang knông lăn Hòa Hiệp Nam brei thâo, bruă kriê dlăng dưi hluê ngă jih wưng kŭm păn ngă bruă. Truh kơ ară anei, ti krĭng anei amâo lŏ mâo ôh kŭm păn dôk hlăm ênoh "3 amâo mâo"; dŭm kŭm păn dưi mkŏ dưm leh kdrăp ksiêm dlăng êlan nao leh anăn brei hluê ngă klei kčah mtrŭn tơdah kdrăp anei tuôm hŏng klei amâo jăk.

"Mnuih ƀuôn sang ngă bruă trah mă kan hluê ngă kjăp dŭm klei kčah mtrŭn kơ bruă gang mkhư̆ klei trah mă IUU. Ară anei, hlăm alŭ wăl amâo lŏ mâo ôh hô̆ mran dôk hlăm ênoh "3 amâo mâo". Dŭm hô̆ mran mâo mkŏ dưm leh djăp kdrăp ksiêm dlăng êlan nao leh anăn hluê ngă kjăp dŭm klei kčah mtrŭn kơ bruă mkra mđĭ tơdah kdrăp yua tuôm hŏng klei amâo jăk, kñăm rơ̆ng djŏ hŏng klei bhiăn ala čar."

Amâo djŏ knŏng ksiêm dlăng ti kdrŭn ksĭ, bruă sang čư̆ êa alŭ wăl lŏ ba bruă kriê dlăng êpul hŏ mran wĭt truh kơ krĭng mnuih ƀuôn sang dôk. Ti dŭm alŭ wăl êlâo dih tuôm mâo klei ngă soh hŏ mran IUU, dŭm alŭ ƀuôn hgŭm hŏng êpul bruă djŏ tuôm kriê dlăng hŏ mran hluê hŏng dŭm êpul hŏ mran êđăp ênang; pô hŏ mran dưi hâo hưn, siñê klei ƀuăn rơ̆ng, hlăm anăn mđing êdi êpul hŏ mran mă kan ngừ êa ksĭ.

Hŏng dŭm hô̆ mran amâo djăp klei găl ngă bruă, bruă sang čư̆ êa mkŏ mjing klei ksiêm dlăng ti anôk jưh 24 mmông grăp hruê. Ti ƀuôn hgŭm Phú Yên, anôk mâo êpul hô̆ mran hiu mă kan ngừ êa ksĭ ngă bruă lu ti krĭng ksĭ. Nguyễn Xuân Cảnh, Khua bruă sang čư̆ êa ƀuôn hgŭm Phú Yên, brei thâo, bruă kriê dlăng êpul hô̆ mran dưi hluê ngă hŏng klei bi mguôp plah wah bruă sang čư̆ êa, kahan răng mgang knông lăn, kdrŭn ksĭ leh anăn alŭ ƀuôn.

"Djŏ tuôm hŏng bruă bi kdơ̆ng hŏng klei trah mă IUU, hmei gĭt gai leh dŭm anôk bruă djŏ tuôm bi hgŭm kjăp hŏng kđông kahan răng mgang knông lăn Đà Rằng ăt msĕ mơh kdrŭn ksĭ čiăng ngă jăk bruă anei; mbĭt anăn bi hgŭm hŏng alŭ wăl kriê dlăng kjăp êpul hô̆ mran ăt msĕ mơh phung mă kan êjai nao trah mă kan, grăp hruê brei ktuê dlăng, mă rup leh anăn hưn mdah hluê si klei kčah mtrŭn."

Mbĭt hŏng ksiêm dlăng, čar Dak Lak dôk bi lu jơr hdră hâo hưn čiăng kơ dŭm klei bhiăn gang mkhư̆ klei trah mă IUU dưi truh hŏng phung trah mă kan hŏng hdră klă anăp leh anăn jêñ jêñ hĭn. Ti ƀuôn hgŭm Xuân Đài, knuă druh mtrŭt mjhar mnuih ƀuôn sang Kđông kahan răng mgang knông lăn Xuân Đài amâo djŏ knŏng hâo hưn hlăm dŭm klei bi kƀĭn ƀuôn ôh ƀiădah lŏ nao truh kơ grăp alŭ ƀuôn, grăp gŏ sang. Thượng úy Nguyễn Văn Liến, Kiăng khua êpul mtrŭt mjhar mnuih ƀuôn sang kđông kahan răng mgang knông lăn Xuân Đài, brei thâo, êjai lu hô̆ mran wĭt kơ hang, êpul kahan răng mgang knông lăn yua loa mđung asăp êrô hiu mguôp hŏng mbha hră ti dŭm ktuê êlan, krĭng mnuih ƀuôn sang dôk, kdrŭn kan leh anăn dŭm anôk mnuih trah mă kan kreh bi kƀĭn.

"Gru hmô “Ênai mđung asăp kahan răng mgang knông lăn” leh mkŏ mjing hluê ngă mâo ba wĭt leh lu klei tŭ dưn. Hŏng hdră mđung asăp hlăm dŭm ktuê êlan, krĭng ƀuôn sang leh anăn kdrŭn ksĭ, dŭm klei hâo hưn kơ bruă gang mkhư̆ klei hiu trah mă kan soh hŏng hdră bhiăn srăng dưi mơĭt truh kơ mnuih ƀuôn sang, đru kơ mnuih ƀuôn sang hmao thâo."

Klei năng mđing jing hdră mtô mblang kơ bruă bi kdơ̆ng hŏng klei trah mă IUU hlăk ƀrư̆ ƀrư̆ bi mlih mơ̆ng bruă hưn mthâo hdră bhiăn jing mkŏ mjing klei mưng hluê ngă mơ̆ng mnuih trah mă kan. Dŭm klei čiăng kơ krĭng trah mă, hră mơar hô̆ mran, mnuih mă bruă, hră čih klei trah mă, kdrăp ksiêm dlăng êlan nao amâo dah hưn mthâo tơdah kbiă, mŭt hlăm kdrŭn dưi lŏ mñă nanao, mđrĭng hŏng grăp gưl hiu trah mă. Ară anei, mnuih ƀuôn sang trah mă kan thâo klă leh anăn hluê ngă kjăp dŭm hdră bhiăn hlăm bruă bi kdơ̆ng hŏng klei trah mă soh hŏng hdră bhiăn IUU.

“Hmei tinei thâo săng jih leh, hlue ngă jăk yơh. Tlĕ mă brei djŏ krĭng, nao hlăm êa ksĭ brei mâo djăp hră mơar, mnuih hlăm mran brei čih anăn, mă rup. Tơdah wĭt jing brei hưn mthâo."

Yap truh akŏ mlan 9/2026, Dak Lak mâo 2.593 boh hô̆ trah mă kan mơ̆ng 6m kơ dlông, hlăm anăn 689 boh hô̆ mơ̆ng 15m kơ dlông; 100% hô̆ trah mă kan dưi hưn mthâo hlăm klei čih pioh bruă trah mă kan ala čar. Bruă ksiêm dlăng hô̆ trah mă kan kbiă, mŭt hlăm kdrŭn ksĭ, tui duah phŭn agha mnơ̆ng dhơ̆ng leh anăn krơ̆ng kjăp klei bi mguôp VMS dưi mđĭ hĭn. Hlăm mlan 8 leh anăn hruê kăm tal êlâo mlan 9, čar amâo mâo ôh klei ngă soh kjham kơ klei trah mă IUU.

Ba hdră bhiăn hlăm grăp gưl hiu trah mă kan, grăp boh hô̆ mran leh anăn jing klei thâo săng mơ̆ng mnuih hiu trah mă kan jing hdră msir phŭn čiăng Dak Lak mbĭt hŏng kluôm ala hnưm ruh mgaih "Hră kñĭ", mđing truh kơ bruă kan hdang hơĭt kjăp, mâo bruă klam.