Dak Lak mâo klei găl kơ lăn ala, mnơ̆ng dhơ̆ng lŏ hma phŭn leh anăn anôk mkŏ Lăn dap kngư hŏng Yŭ kwar Dhŭng. Khă snăn, čiăng mđĭ klei dưi bi ktưn, čar čiăng mlih mơ̆ng klei đĭ kyar mơ̆ng hnơ̆ng mâo truh kơ klei đĭ kyar mơ̆ng klei thâo, kdrăp mrâo leh anăn boh tŭ yuôm. Ti anôk bi kƀĭn, phung bi ala lač sa hlăm dŭm klei êdu kƀah prŏng jing klei bi hgŭm plah wah ksiêm hriăm kreh knhâo leh anăn klei čiăng hlăm boh sĭt ka kjăp.

Lu klei tŭ ksiêm hriăm ka dưi ba yua hlăm boh sĭt bruă pla mjing, êjai anăn anôk bruă duh mkra, êpul hgŭm bruă dôk dleh dưi nao hgŭm hŏng phung thơ̆ng kơ bruă leh anăn kdrăp mrâo djŏ guôp. Dŭm klei mĭn mphŭn čô̆ kơ bruă ăt tuôm hŏng klei dleh dlan kơ wăl anôk đĭ kyar leh anăn ai dưi đru. Čiăng bi hrŏ klei bi kpleh plah wah ksiêm hriăm leh anăn boh sĭt, phung thơ̆ng kơ bruă kčĕ mtrŭt mđĭ klei bi hgŭm Knŭk kna - sang hră - anôk bruă duh mkra, mđĭ lar bruă klam mkŏ mơ̆ng dŭm êpul êya mkŏ, mtrŭt mđĭ klei ba jao leh anăn mnia blei boh tŭ ksiêm hriăm, boh nik hlăm dŭm mta mnơ̆ng phŭn msĕ si kphê, tiu, durian.