Knơ̆ng bruă sang čư̆ êa čar Dak Lak mâo leh Asăp mtrŭn mrô 25/2026 mtă kơ Anôk bruă sang hră mtô bi hriăm mbĭt hŏng dŭm alŭ wăl mđĭ hdră ksiêm dlăng, ktuê dlăng bruă hluê ngă dŭm ênoh prăk hrui wĭt ti sang hră; msir mgaih ktang dŭm klei hrui wĭt soh hŏng hdră bhiăn. Dŭm ênoh prăk hrui wĭt brei djŏ mnuih, djŏ mta kñăm, djŏ hdră bhiăn leh anăn hưn mdah čiăng kơ phung amĭ ama, hđeh sang hră thâo, ktuê dlăng.

Hlăm boh klei čar Dak Lak mrâo mkŏ dăp, mkŏ wĭt anôk bruă sang hră mơar. Kluôm čar ară anei adôk 625 anôk bruă mtô bi hriăm knŭk kna leh bi hrŏ êbeh 600 anôk bruă. Bruă bi hơĭt anôk bruă, rơ̆ng klei găl mtô bi hriăm brei nao mbĭt hŏng kriê dlăng kjăp ngăn prăk sang hră mơar, ñĕ kơ dŭm ênoh hrui hlăm akŏ thŭn mjing thiăm klei kpĭ kơ phung amĭ ama.

Knơ̆ng bruă sang hră mtô bi hriăm Dak Lak ăt mtă kơ dŭm sang hră hluê ngă djăp ênŭm hdră đru kơ phung hđeh, boh nik phung hđeh mâo klei hdĭp dleh dlan, phung hđeh ti krĭng mnuih djuê ƀiă; amâo brei klei bi mguôp akŏ thŭn jing klei ktrŏ kơ dŭm gŏ sang. Mbĭt hŏng anăn, Knơ̆ng bruă hưn mthâo mrô đĭng blŭ mjêč čiăng tŭ mă klei hâo hưn mơ̆ng mnuih ƀuôn sang. Anei dưi dlăng jing sa hlăm dŭm êlan čiăng pral hmao ƀuh, ƀuah mkra dŭm klei bi êdah ngă soh hlăm bruă hluê ngă dŭm ênoh hrui mă ti sang hră.

Lê Thị Thanh Xuân, Khua knơ̆ng bruă sang hră mtô bi hriăm čar Dak Lak, brei thâo knơ̆ng bruă hmao mtrŭn dŭm hră mơar ktrâo lač kriê dlăng ngăn prăk, ngăn drăp, ba jao leh hdră mkŏ dăp leh anăn dŭm ênoh hrui wĭt akŏ thŭn hriăm. Knơ̆ng bruă sang hră mtô bi hriăm Dak Lak mtă kơ dŭm anôk bruă mtô bi hriăm hluê ngă djŏ hdră bhiăn mơ̆ng akŏ thŭn hriăm; boh klei ngă soh srăng dưi ksiêm dlăng, ƀuah mkra leh anăn msir mghaih hluê si klei kčah mtrŭn.

“Dŭm mta phŭn djŏ tuôm kơ ênoh prăk hrui wĭt akŏ thŭn hriăm snăn hmei ăt mtă leh kơ dŭm sang hră mkŏ mjing hluê ngă kjăp. Dŭm ênoh prăk hrui wĭt akŏ thŭn hriăm ăt hmao mâo hră mơar čiăng ƀư̆ mkra, rơ̆ng amâo mâo mjing klei amâo jăk djŏ tuôm kơ klei mđĭ ênoh, dŭm klei ngă bi kpĭ kơ ngăn prăk, dleh dlan kơ phung hđeh sang hră”.