Klei bi lông mâo dua gưl: Gưl klei mĭn leh anăn gưl hdră êlan. Gưl klei mĭn mâo dŭm klei mĭn čô̆ kơ bruă dưi mâo amâodah ka mâo mnơ̆ng dhơ̆ng, bruă đru, gru hmô, ƀiădah ka dưi ba truh anôk mnia mblei leh anăn ka mâo prăk hrui wĭt. Starup mâo klei mĭn jăk srăng dưi mkŏ mjing klei bi hriăm, đru bi kluôm klei mĭn, mkŏ hŏng phung thơ̆ng kơ bruă, phung duh bi liê čiăng dưi mkŏ mjing dŭm hdră mâo klei găl.

Gưl hdră êlan mâo dŭm hdră čô̆ kơ bruă mâo leh mnơ̆ng dhơ̆ng, bruă đru, gru hmô dưi ba mdah truh anôk mnia mblei amâodah lông yua hŏng phung blei ba yua klă sĭt, leh anăn mâo leh prăk hrui wĭt, amâodah ka kâo prăk hrui wt ƀiădah mâo leh ênoh prăk dưi čih yap hŏng hră mơar, djăp klei găl tĭng tla čiăng bi klă boh tu ngăn prăk.

Dŭm hdră mâo klei găl dưi mâo klei đru bi kluôm gru hmô mnia mblei, mđĭ klei thâo hlăk mblang, mkŏ ai dưi leh anăn nao hgŭm hlăm dŭm wăl anôk hnơ̆ng prŏng hĭn.

K’iăng nai prŏng, nai prĭng Lê Đức Niêm, k’iăng khua kiă kriê sang hră gưl prŏng Lăn Dap Kngư, bi klă mta phŭn klei bi lông thŭn anei mâo knhuah klă sĭt, mñă ktang klei čiăng bi mlih mơ̆ng klei mĭn jing boh tŭ dưn sĭt.

 “Akŏ “Mơ̆ng klei mĭn truh kơ boh tŭ dưn” jing klei hưn klă klơ̆ng, bi êdah ai tiê mlihy mrâo mbruă hluê si dŭm hdră mtrŭn mơ̆ng Đảng, msĕ si hdră mtrŭn mrô 57. Anăn jing bruă ba dŭm hdră êlan, kdrăp mrâo hlăm boh sĭt čiăng mk mjing boh tŭ dưn. Anei jing klei găl brei phung čô̆ kơ bruă, knơ̆ng bruă mrâo mkŏ mjing nao hgŭm, êlâo hĭn jing hriăm, leh anăn hưn mdah anăn knăl, mbĭt anăn bi mni kơ dŭm klei mĭn leh anăn boh tŭ dưn mâo knơ̆ng bruă mkŏ mjing”.

Hŏng phung hriăm gưl prŏng, klei bi lông ăt pŏk klei găl lông dlăng, mă klei hriăm leh anăn lông ngă hŏng klei mĭn  mrâo. Adei Trần Thị Thiện Hạnh, hriăm gưl prŏng Sang hră gưl prŏng Lăn Dap Kngư, brei thâo:

 “Klei bi lông jing yuôm bhăn snăk. Ñu đru kâo mâo klei hriăm, mâo klei găl lông dlăng klei thâo pô, mơ̆ng anăn mbŏ klei thâo leh anăn duh kơ hdră mă bruă êdei anei.”

Trần Thanh Sơn,  Khua Knơ̆ng bruă kreh knhâo leh anăn kdrăp mrâo čar Dak Lak, brei thâo bruă mlih mrâo mbruă dôk mâo tur knơ̆ng leh anăn tă hdră klă mngač hĭn hŏng Hdră mtrŭn 57 leh anăn Hdră bhiăn kreh knhâo, kdrăp mrâo leh anăn mlih mrâo mbruă. Klei bi lông mđing mđĭ kyar dŭm klei mĭn, hdră bruă mguôp hŏng bruă mkŏ mjing anôk bruă duh mkra mâo klei dưi mjing ênoh yuôm leh anăn đru mguôp kơ ala ƀuôn. Knơ̆ng bruă kreh knhâo leh anăn kdrăp mrâo srăng gĭr mkŏ anôk bruă duh mkra, phung đru čiăng hrăm mbĭt hŏng dŭm hdră bruă mâo klei pah mni, đru mđĭ kyar anôk bruă duh mkra leh anăn bi lar dŭm gru hmô tŭ dưn.