Ti anôk hriăm mrô 3, anôk hriăm mrô 1, Sang hră gưl sa Tây Nha Trang, čar Khánh Hòa, hđeh hriăm hră dôk hlăm sang hră ăt wĭt kơ sang ti yang hruê dơ̆ng grăp hruê kăm, leh anăn phung amĭ ama ba phung hđeh nao ti anôk hriăm phŭn čiăng hriăm klei hriăm Tin học. Anôk hriăm mơ̆ng anôk hriăm mrô 1 ka mâo ôh adŭ maĭ tĭng, ngă kơ bruă mkŏ mjing klei hriăm plah wah dŭm anôk hriăm ka sa hnơ̆ng. Phung hđeh ti anei ăt ƀiă mâo klei găl nao hgŭm hlăm dŭm bruă ngă msĕ hŏng phung hđeh ti anôk hriăm phŭn amâodah ti sang hră phŭn. Nguyễn Thị Dung, amĭ ama hđeh adŭ 4, anôk hriăm mrô 1, Sang hră gưl sa Tây Nha Trang lač klei ka djŏ:

“Brei nao mơ̆ng anôk hriăm điêt anei nao kơ anôk hriăm phŭn kơh mâo adŭ măi vi tính čiăng hriăm. Amâo mâo ôh phung amĭ ama yang hruê drông leh anăn truh 13h 30 mnĭt mdiăng nao hriăm tinăn. Êjai anăn hriăm aguah ưm ƀiădah knăm pă grăp hruê kăm brei mdiăng anak wĭt msĕ snăn. Klei ngă snăn srăng amâo mâo jăk msĕ hŏng phung hđeh ti anôk hriăm phŭn, kdrăp mnơ̆ng dhơ̆ng ăt msĕ mơh.”

 Bi mŭt mbĭt đru bi hrŏ anôk phŭn kriê dlăng ƀiădah ka msĕ hŏng bruă klei găl mtô bi hriăm plah wah dŭm anôk mtô bi hriăm điêt dưi rơ̆ng bi knar. Tơdah anôk bruă kdrăp mnơ̆ng ka ngă djŏ klei čiăng, hđeh sang hră ăt tŭ klei luč liê, bi phung amĭ ama  lŏ klam thiăm bruă drông atăt. Sang hră gưl sa Tây Nha Trang dưi mkŏ mjing mơ̆ng tur knơ̆ng bi mŭt 7 sang hră, mâo 1 sang hră phŭn leh anăn 6 anôk mtô điêt, hŏng 198 boh adŭ, hlăm brô 7.400 čô hđeh sang hră. Sang hră gưl dua Tây Nha Trang dưi mkŏ mjing mơ̆ng 6 boh sang hră, hŏng hlăm brô 5.400 čô hđeh sang hră.

          Bruă bi mŭt tal êlâo đru bi sa anăn hdră kčah, hdră mtrŭn leh anăn mbha bruă klam. Khădah snăn, hnơ̆ng dŭm êtuh boh adŭ, dŭm anôk mtô điêt bi kbưi hŏng klei mdê kơ kdrăp mnơ̆ng nah gŭ, klei mdê hđeh sang hră ngă kơ bruă gĭt gai tuôm hŏng lu klei dleh dlan. Khua sang hră pioh lu mmông gĭt gai bruă ngă plah wah dŭm anôk bruă nah gŭ, hlăk êjai bruă ksiêm dlăng klei thâo, dlăng mmông mtô leh anăn thâo boh klei kơ phung nai, hđeh sang hră adôk kƀah. Kriê dlăng hlăm hră mơar, hưn mthâo online amâo dưi hrô kluôm ôh kơ bruă nao ksiêm dlăng bruă ngă ti grăp sang hră, boh nik bruă thâo ƀuh leh anăn hmao đru phung hđeh sang hră brei mđing uêñ. Mơ̆ng boh sĭt anei, Knơ̆ng bruă sang čư̆ êa ƀuôn hgŭm Tây Nha Trang kčĕ bi ktlah Sang hră gưl sa leh anăn gưl dua Tây Nha Trang,  grăp gưl hruăm jing 2 sang hră hjăn. Nguyễn Công Danh,  K’iăng Khua Knơ̆ng bruă sang čư̆ êa ƀuôn hgŭm Tây Nha Trang, hâo hưn:

“Phung hđeh Sang hră gưl dua dôk thŭn đĭ prŏng, nai mtô brei păn kjăp phung hđeh ti sang hră. Tĭng 70/80 boh adŭ, hnơ̆ng msĕ snăn, kriê dlăng ênưih hĭn. Hŏng Sang hră gưl sa, sa čô nai mtô lŏ dôk kiă kriê 1 boh sang hră, brei kiă kriê 4 boh sang hră. 4 boh sang hră anăn amâo mâo jĕ ôh, kbưi hŏng mbĭt. Msĕ ti anei, tĭng Hòn Nghê lŏ găn 1 êa krông. Amâo dưi kiă kriê ôh, sui thŭn, sui mlan jing amâo mâo hơĭt ôh.”

Mlan 8/2026, čar Khánh Hòa mkŏ mjing hdră mkŏ dăp sang hră, hưn mdah leh anăn akâo klei blŭ mguôp mơ̆ng Anôk kriê dlăng bruă Đảng čar. Leh mkŏ dăp, ênoh anôk bruă sang hră hrŏ truh 66%. Ƀiădah, kluôm čar ăt mâo 18 sang hră hnơ̆ng prŏng êbeh 100 adŭ, lu ti dŭm ƀuôn prŏng lu mnuih. Leh dua mlan ngă bruă, dŭm alŭ wăl ba mdah leh hdră bi ktlah sang hră hnơ̆ng prŏng jing lu sang hră amâo dah mkŏ mjing thiăm anôk bi hriăm. Ară anei Knơ̆ng bruă sang hră mtô bi hriăm čar Khánh Hòa dôk bi mklin klei blŭ mguôp, klei akâo mơ̆ng dŭm alŭ wăl čiăng ksiêm dlăng dŭm sang hră hnơ̆ng prŏng, mâo lu anôk bi hriăm, anôk hriăm lehanăn alŭ wăl kriê dlăng prŏng, mơ̆ng anăn đru kčĕ hdră msir djŏ guôp.