Mơ̆ng êbeh 70 klei hưn yuôm bhăn tŭ mă kơ lĭng kahan djiê êngiă hlăm dŭm ênuk bi blah, êbeh 2 mlan êgao Êpul tui duah, bi kƀĭn klang kleh lĭng kahan djiê êngiă K75 čar Lâm Đồng ngă leh 32 gưl ksiêm dlăng, iêo jak êbeh 800 gưl čô nao hgŭm mbĭt hŏng êdeh kčao êbeh 2.100m3 lăn, boh tâo, tui duah, bi kƀĭn mâo 26 klang kleh lĭng kahan djiê êngiă ti alŭ wăl 9 să, ƀuôn hgŭm hlăm čar. Trung tá Trần Xuân Hổ, khua êpul k75, knơ̆ng gĭt gai lĭng kahan čar Lâm Đồng brei thâo, hlăm bruă hluê ngă bruă klam, êpul mâo nanao klei đru mơ̆ng Bruă sang čư̆ êa leh anăn mnuih ƀuôn sang.

“Dŭm alŭ wăl boh nik jing Êpul gơ̆ng hdră êlan dŭm să, ƀuôn hgŭm hmei nao mă bruă jing mâo klei đru, wăt kơ êdeh êdâo, wăt mnơ̆ng yua čiăng ngă klei tui duah. Mnuih ƀuôn sang alŭ wăl đru, sa ai amâo mâo guôn čiu tla, ruh mgaih ôh.”

Nao mbĭt hŏng klei tui duah, bi kƀĭn klang kleh lĭng kahan êngiă asei hlăm boh sĭt, wưng tal 1 mơ̆ng hdră bruă 500 hruê mlam, čar Lâm Đồng hluê ngă ktang phĭt bruă mă mta ksiêm mkă đru bi klă anăn lĭng kahan djiê êngiă ti 11 bĭt msat hlăm čar. Thượng tá Trần Thanh Sơn, k’iăng khua bruă kđi čar knơ̆ng gĭt gai lĭng kahan čar Lâm Đồng brei thâo, dŭm bĭt msat leh anăn msat lĭng kahan djiê êngiă găn lu blư̆ mkra mđĭ kyuanăn bruă kuai mă klang kleh lĭng kahan djiê êngiă tuôm hŏng lu klei dleh dlan. Grăp čô knuă druh, lĭng kahan ngă bruă klam hŏng jih ai tiê, găn hjan, găn mđiă leh anăn mta nanao kơ pô rơ̆ng brei djŏ hdră kčah, grăp bruă ngă srăng mâo klei răng êdi:

“Yan adiê wưng anei dleh dưi ksiêm dlăng. Adiê hjan nanao ƀiădah ayŏng adei ăt gĭr ngă. Mă mơ̆ng ưm truh kơ tlam mmăt ăt gĭr bi leh pral hĭn. Klei mă mtă ksiêm mkă ngă djŏ hŏng klei čuăn mă mta ksiêm mkă mơ̆ng Phŭn bruă lĭng kahan, mơ̆ng bi mlih mrô, mă klang kleh truh kơ mă mta ksiêm mkă leh anăn ba wĭt kơ msat amâo brei mâo klei bi čhuai”.

Hlăm 4.776 msat lĭng kahan ka thâo klă hlei pô ti 11 bĭt msat, êpul bruă djŏ tuôm čar Lâm Đồng mă leh mta ksiêm mkă 3.625 msat djăp klei găl, bi leh êlâo kơ wưng kčah 3 mlan leh anăn ba jao kơ anôk bruă ksiêm mkă lĭng kahan, Phŭn bruă lĭng kahan čiăng đru kơ bruă ksiêm mkă ADN. Kahan ksiêm čar Lâm Đồng ăt mkŏ mjing 16 anôk hrui mă mtă ksiêm mkă, tŭ mă 1.371 mta ksiêm mkă grăp djuê hŏng tĭng amĭ mơ̆ng lĭng kahan ka thâo hlei pô, êgao 5 klang kleh mkă mơ̆ng klei mĭn tĭng.

Klei bi klă mơ̆ng kahan alŭ wăl 7 brei ƀuh, hlăm wưng tal 1, hdră bruă 500 hruê mlam, Lâm Đồng ngă leh kjăp, tŭ dưn, rơ̆ng kơ klei 6 klă; klei hưn, hâo hưn hrăm mbĭt, bi lar kluôm êlam, tui duah, bi kƀĭn hŏng klei gĭr, bruă klam leh anăn klei hdơr, bruă mă mta ksiêm mkă dưi ngă hrăm mbĭt, ktang phĭt, tŭ dưn. Đinh Văn Tuấn, k’iăng khua Bruă sang čư̆ êa čar, khua êpul gĭt gai bruă tui duah, bi kƀĭn leh anăn bi klă anăn klang kleh lĭng kahan djiê êngiă čar Lâm Đồng brei thâo, boh tŭ dưn phŭn kčưm wưng tal 1 hdră bruă 500 hruê mlam jing boh kdrŭt brei čar lŏ dơ̆ng hdră tui duah, ba phung jhŏng ktang djiê êngiă wĭt hŏng lăn čar, gŏ sang leh anăn ƀĭng kahan:

“Lâm Đồng truh hnưm 3 mlan. Anôk bruă ngă leh hnưm hĭn hlăm 4 alŭ wăl mơ̆ng wăl kahan. Anei jing kloei hơ̆k mơak hlăm êpul gĭt gai leh anăn dŭm êpul nao hgŭm ngă bruă klam.

Nguyễn Thanh Quảng, k’iăng khua bruă kđi čar, knơ̆ng gĭt gai lĭng kahan čar, k’iăng khua êpul gĭt gai bruă tui duah bi kƀĭn leh anăn bi klă anăn klang leh lĭng kahan djiê êngiă čar Lâm Đồng, brei thâo:

“Hlăm wưng anei mâo bruă klam drei ka bi leh anăn jing bruă tui duah, bi kƀĭn klang kleh lĭng kahan djiê êngiă. Hdră êlan mơ̆ng Êpul gĭt gai gưl čar jao kơ êpul tui duah leh anăn drei ba ênoh čuăn jing 50 klang kleh lĭng kahan djiê êngiă, ară anei drei mrâm mâo mă 26 klang kleh. Wưng tal 1 ka leh, ka dưi bi leh.”

Mŭt hlăm wưng tal 2 hdră bruă 500 hruê mlam, mơ̆ng ară anei truh hruê 27/7/2027 čar Lâm Đồng mdưm mta kñăm tui duah, bi kƀĭn mâo 124 klang kleh. Hŏng phung klă anăp ngă bruă klam, hdră bruă tui duah amâo djŏ knŏng jing klei bi tiŏ êran hŏng hruê mmông, ƀiădah lŏ jing hdră bi hdơr kơ phung êbuh leh kyua lăn čar. Hŏng bruă klam, klei jih ai tiê, čar Lâm Đồng dôk gĭr ba thiăm phung jhŏng ktang djiê êngiă wĭt hŏng lăn amĭ, lŏ ba wĭt klei hmăng hmưi mơ̆ng găp djuê leh anăn ƀĭng kahan./.