Čiăng mtrŭt mđĭ bruă ruh mgaih anôk ala 53 hdră bruă, hdră bruă phŭn, čar Dak Lak mkŏ mjing leh 5 Êpul ngă bruă mơ̆ng bruă Đảng čar, mâo Khua bruă Đảng lehanăn phung kiăng khua bruă Đảng čar ngă Khua êpul. Anei jing dŭm hdră bruă dôk mâo lu hră mơar, gun kpăk kơ lăn ala, klei tla hnô, lŏ mkŏ anôk dôk hlăm wưng sui.

Leh 45 hruê mlam pŏk ngă hdră mtlaih êngiê anôk ala, 7 hdră bruă bi leh 100% anôk ala; 15 hdră bruă mâo mơ̆ng 90% kơ dlông. Boh tŭ dưn anei dưi mâo kyua dŭm Êpul ngă bruă klă anăp trŭn kơ nah gŭ, mbĭt hŏng alŭ wăl leh anăn pô duh bi liê bi klă grăp klei gun kpăk, bi klă boh phŭn čiăng msir mgaih leh anăn bruă klam mơ̆ng grăp anôk bruă. Mbĭt hŏng anăn, anôk ksiêm dlăng hnơ̆ng ngă bruă dưi mkra mlih grăp hruê đru kơ phung khua kiă kriê čar hmao thâo ƀuh dŭm hdră bruă huĭ srăng êmưt čiăng gĭt gai msir mgaih. Mơ̆ng hdră mtlaih êngiê, Khua bruă Đảng čar Dak Lak Lương Nguyễn Minh Triết tĭng dlăng, dŭm klei gun kpăk mơ̆ng dŭm hdră bruă klă sĭt dôk lu ti hdră mkŏ mjing hluê ngă.

“Lu bruă êlâo dih drei lač dleh, lač gun kpăk hdră bhiăn, hdră mtrŭn, ƀiădah leh khua gĭt gai klă anăp trŭn nao ti anôk bruă leh anăn mbĭt hŏng dŭm anôk bruă thơ̆ng, grăp čô knuă druh ngă bruă ruh mgaih anôk ala bi klă grăp mta bruă, bi klă bruă klam, bi klă hruê mmông snăn lu bruă dưi ruh mgaih sơăi.”

Tơdah ruh mgaih anôk ala jing sa hlăm dŭm bruă yuôm bhăn čiăng ba hdră bruă mŭt ngă bruă, snăn bi liê ngăn prăk knŭk kna lŏ dơ̆ng jing klei kpĭ prŏng hŏng Dak Lak hlăm dŭm mlan knhal jih thŭn. Ti anôk bi kƀĭn grăp gưl mlan 8 leh êgao, khua gĭt gai čar pioh lu mmông ksiêm dlăng hnơ̆ng bi liê. Hdră duh bi liê knŭk kna thŭn 2026 mơ̆ng Dak Lak êbeh 11.294 êklai prăk. Truh kơ ară anei, čar mbha leh klă klơ̆ng êbeh 9.918 êklai prăk, mâo giăm 88%. năng mđing, adôk 1.375 êklai prăk ka djăp klei găl jao prăk.

Hluê si Khua knơ̆ng bruă ngăn prăk čar Dak Lak Cao Đình Huy, mlan 8 hluê hdră kčah brei bi liê ƀiă êdi 3.000 êklai prăk ƀiădah boh sĭt knŏng mâo hlăm brô 604 êklai prăk. Čiăng dưi mâo mta kñăm bi liê tui si hdră kčah gưl III, knŏng hlăm mlan 9 čar brei ngă hlăm brô 5.154 êklai prăk. Knơ̆ng bruă ngăn prăk mă leh bruă hŏng phung duh bi liê djŏ tuôm, brei ƀuăn rơ̆ng hnơ̆ng ngă bruă.

“Ară anei Knơ̆ng bruă ngăn prăk srăng mkăp ti gŭ klei găl leh anăn knŏng mkăp kơ dŭm hdră bruă mâo leh hnơ̆ng tŭ jăk. Grăp hruê kăm hmei srăng akâo kơ dŭm Anôk bruă kriê dlăng mâo klei kčĕ jing hmei srăng mkăp mtam kơ dŭm hnơ̆ng dưi bi leh. Hlăm klei dŭm čô amâo dưi bi liê snăn hmei hrui wĭt čiăng mkăp kơ dŭm hdră bruă mâo hnơ̆ng.”

Ară anei hlăm brô 60% hnơ̆ng brei čan prăk duh bi liê bruă knŭk kna mơ̆ng Dak Lak kƀĭn ti 4 Anôk bruă kriê dlăng hdră bruă, mâo Anôk bruă kriê dlăng hdră bruă êlan klông leh anăn bruă lŏ hma, Anôk bruă duh bi liê rŭ mdơ̆ng nah Ngŏ, Anôk bruă Ƀuôn Ama Thuôt leh anăn Anôk bruă Tuy Hòa. Ti anăp klei čiăng brei mjing klei bi mlih klă klơ̆ng hlăm bruă duh bi liê knŭk kna, ruh mgaih anôk ala leh anăn dŭm hdră bruă phŭn, Khua anôk bruă sang čư̆ êa čar Dak Lak Đỗ Hữu Huy mtă brei hưn mdah klă klei dưi brei čan mơ̆ng grăp hdră bruă, grăp hnơ̆ng bruă knuă; ktang phĭt bi mlih prăk duh bi liê mơ̆ng dŭm hdră bruă amâo mâo klei dưi hluê ngă nao kơ dŭm hdră bruă mâo klei čiăng leh anăn klei dưi brei čan jăk hĭn. Khua gĭt gai čar ăt mtă brei mđĭ ktang ksiêm dlăng boh sĭt ti anôk rŭ mdơ̆ng, bi mklă klei dưi mơ̆ng phung rŭ mdơ̆ng. Phung rŭ mdơ̆ng amâo djăp hnơ̆ng čuăn brei ksiêm dlăng bi mlih, ñĕ kơ klei dưi rŭ mdơ̆ng êdu jing anôk kpăk ngă êmưt hdră ngă bruă leh anăn bi liê.

“Anôk bruă brei hưn mdah hŏng Khua Knơ̆ng bruă sang čư̆ êa čar hdră êlan mbha kơ Khua Knơ̆ng bruă klam grăp pô duh bi liê leh anăn hdră êlan nao ksiêm dlăng, mtrŭt mjhar grăp hdră bruă. Nao truh ti anôk dôk rŭ mdơ̆ng, dlăng dlăng jing phung rŭ mdơ̆ng arăng mâo maĭ mŏk kdrăp mnơ̆ng mơ̆, arăng mâo mnuih mă bruă mơ̆; ba jih jang hră mơar ngă bruă ti anôk dôk rŭ mdơ̆ng čiăng ksiêm dlăng. Ksiêm dlăng rơ̆ng kơ klei mơ̆ng wưng anei truh kơ knhal jih thŭn dưi bi liê. Tơdah hlăm klei dôk kpăk đuôm bi klă klơ̆ng jing phung rŭ mdơ̆ng amâo rơ̆ng klei dưi ngă bruă, snăn mtă kơ pô duh bi liê brei bi mlih mtam.”

Mơ̆ng hdră mtlaih êngiê anôk ala truh kơ mtrŭt mđĭ bruă brei čan prăk duh bi liê bruă knŭk kna, Dak Lak dôk mdưm tur knơ̆ng kơ sa hdră ngă bruă mrâo: păn kjăp hdră bruă, msir mghaih ktang grăp anôk gun kpăk leh anăn mguôp hnơ̆ng ngă bruă hŏng bruă klam klă klơ̆ng. Anei dưi dlăng jing hdră msir yuôm bhăn čiăng mjing klei bi mlih hlăm dŭm mlan knhal jih thŭn, mtrŭt mđĭ hnơ̆ng ngă bruă dŭm hdră bruă, ba yua tŭ dưn ênoh prăk leh anăn hnưm ba dŭm hdră bruă phŭn mŭt ba yua, mđĭ lar boh tŭ dưn.