Hlue si hdră kčah wưng thŭn 2026-2030, hnơ̆ng trah dlăng 2050, Dak Lak tă hdră mkŏ mjing 3 bruă duh mkra mâo Wăl duh mkra Dhŭng Phú Yên, wăl duh mkra thơ̆ng nah Yŭ leh anăn Wăl duh mkra ƀăng jang knông lăn Dak Ruê. Mbĭt anăn, čar čuăl mkă 31 wăl tuh tia mkra mjing hŏng ênhă êbeh 8.900 ha. Khădah snăn, ară anei mrâo mâo 7 wăl tuh tia mkra mjing leh anăn 21 wăl tuh tia mkra mjing dưi čuăl mkă klă klơ̆ng, bi liê mkŏ mjing; hlăm anăn knŏng ƀiă  mâo hnơ̆ng bi leh truh 100%.

Hlue si Đỗ Bá Phú, Khua Anôk bruă mtrŭtt mjhar mnia blei (Phŭn bruă tuh tia mnia mblei), čiăng mđĭ boh tŭ dưn bi liê leh anăn mđĭ klei  jak iêô mơ̆ng dŭm wăl, wăl tuh tia mkra mjing, Dak Lak brei mđĭ kyar anôk bruă nah gŭ hlue si hdră hrăm mbĭt, bi mguôp kjăp hŏng hdră bruă logistics  mlir krĭng leh anăn dŭm klei găl êa čuh mtah. Klei anei amâo djŏ knŏng bi hrŏ ênoh bi liê ôh ƀiădah lŏ mđĭ boh tŭ dưn ba yua hlăm wưng sui.

“Dŭm wăl tuh tia mkra mjing brei dưm hlăm hdră čuăl mkă kdrăp logistic mlir krĭng, mkŏ Ngŏ – Yŭ, plah wah Lăn Dap Kngư hŏng kdrŭn ksĭ. Čiăng kơ mkiêt mkriêm êa pui êwa čuh, snăn dŭm wăl, anôk bruă tuh tia mkra mjing dưi čuăl mkă mrâo brei mkra mđĭ sa anôk, mjing klei găl čiăng mđĭ kyar dŭm hdră bruă êa pui êwa čuh mtah hlăm krĭng, wăl tuh tia mkra mjing. Bi tơdah amâo dưi  rŭ mdơ̆ng. mkŏ sa anôk snăn hnơ̆ng bi liê srăng lu, ênoh bi liê prăk knŭk kna leh anăn klei kpĭ kơ bruă pui kmlă lu.”

Boh sĭt brei ƀuh, klei kpăk đuôm prŏng hĭn ară anei ti Dak Lak amâo djŏ knŏng hlăm anôk bruă tuh tia mkra mjing ôh ƀiădah hlăm klei dưi mkŏ logistics hŏng kdrŭñ ksĭ, wưng dŭ mdiăng sui, klei găl kơ krĭng mă mnơ̆ng dhơ̆ng dleh bi mlih jing klei găl bi ktưn mơ̆ng bruă mkra mjing êlam.

Đại tá Nguyễn Thành Sơn,  Khua Êpul gơ̆ng  kriê dlăng Knơ̆ng bruă kdrŭn ksĭ Cát Lái (ƀuôn prŏng Hồ Chí Minh) brei thâo, logistics jing “ mta phŭn” mơ̆ng bruă duh mkra. Hlăk êjai anăn, Dak Lak ară anei ăt dôk jưh knang hlăm bruă dŭ mdiăng êlan jơ̆ng; dŭ mdiăng   hlăm êa ksĭ leh anăn bruă êdeh phiơr ka dưi ba yua tŭ dưn. Kyua anăn, brei čar  hnưm mkŏ mjing dŭm anôk bruă logistics mrâo mrang čiăng bi hrŏ ênoh bi liê leh anăn mđĭ klei dưi bi  ktưn dŭ mdiăng mnơ̆ng dhơ̆ng.

“ Hriăm mơ̆ng klei hriăm lu ala čar, brei drei ba mnơ̆ng dhơ̆ng truh ti kdrŭn ksĭ snăn bruă dŭ mdiăng srăng pral hĭn. Hlăm logistics, kdrŭn ksĭ jing anôk dŭ mdiăng dua nah, jing anôk kriê pioh, đŭng hruh, anôk dŭ mdiăng mnơ̆ng dhơ̆ng, jing anôk mđĭ ênoh yuôm mnơ̆ng dhơ̆ng. Kdrŭn ksĭ jing anôk ba mnơ̆ng dhơ̆ng ba čhĭ kơ ala tač êngao. Kâo ƀuh ti čar Dak Lak, anôk djŏ guôp hĭn jing krĭng wăl să Ea Ô, anei jing anôk kbưi hŏng čar Khánh Hòa hlăm brô 60 km, djŏ guôp hŏng bruă  logistics.”

Leh bi mŭt, Dak Lak mâo ênhă êbeh 18.000 km², dôk tal tlâo kluôm ala, anôk bi kƀĭn klei găl krĭng mnơ̆ng dhơ̆ng lŏ hma hnơ̆ng prŏng ti nah Yŭ leh anăn kđrăp kdrŭn ksĭ, wăl tuh tia mkra mjing, bruă duh mkra êa ksĭ ti nah Ngŏ. Klei bi mguôp anei pŏk klei găl mkŏ mjing hdră kjăp mơ̆ng bruă mkra mjing truh kơ ba čhĭ kơ ala tač êngao. Khădah snăn, čiăng mjing klei găl jing boh kdrŭt đĭ kyar, klei ksiêm dlăng anôk bruă nah gŭ tuh tia mkra mjing leh anăn logistics brei dưi msir mgaih hlăm mbĭt.

 Hlue si Đào Mỹ, K’iăng Khua Knơ̆ng bruă sang čư̆ êa čar Dak Lak, čar dôk kƀĭn mkra mlih hră mơar, bi leh hdră čuăl mkă krĭng, wăl tuh tia mkra mjing, bi liê mđĭ kyar anôk bruă nah gŭ kdrŭn ksĭ leh anăn logistics kñăm mjing klei êdah kdlưn kơ bruă tuh tia mkra mjing êlam leh anăn mđĭ ênoh yuôm ba čhĭ kơ ala tač êngao.

“Knơ̆ng bruă tuh tia mnia blei, Anôk bruă kriê dlăng Wăl duh mkra Phú Yên leh anăn dŭm anôk bruă djŏ tuôm bi kƀĭn djăp ênŭm klei ksiêm hriăm, klei blŭ  mguôp mơ̆ng klei bi trông čiăng hưn mdah hŏng Knơ̆ng bruă sang čư̆ êa čar mâo klei gĭt gai klă klơ̆ng. Kčĕ anăn dŭm hdră bruă phŭn, anôk bruă nah wăl tuh tia mkra mjing êlam leh anăn logistics wưng 2026 – 2030 čiăng pral pŏk ngă dŭm bruă iêô jak bi liê. Kčĕ dŭm hdră êlan mdê hjăn kơ lăn ala, prăk čan, mtrŭt mjhar tuh tia mkra mjing, đru bi mlih mrô, mă bruă hưn mdah hŏng gưl mâo klei dưi ăt msĕ mơh Gưl dlông ksiêm dlăng, mtrŭn klei bhiăn djŏ guôp đru kơ anôk bruă duh mkra.”

Klei găl kơ hnơ̆ng, krĭng mnơ̆ng dhơ̆ng leh anăn êlan čhĭ hlăm êa ksĭ knŏng klă sĭt mđĭ lar tơdah mkŏ hŏng hdră logistics mrâo mrang leh anăn anôk bruă tuh tia mkra mjing hrăm mbĭt. Hŏng hdră tă bi leh hdră čuăl mkă, mđĭ kyar dŭm anôk bruă logistics, mđĭ mkra mjing êlam leh anăn iêô jak phung bi liê phŭn, Dak Lak dôk  grăp knhuang hlue ngă klei kñăm jing anôk đĭ kyar mrâo kơ bruă tuh tia mkra mjing leh anăn logistics mơ̆ng krĭng wăl Lăn Dap Kngư – ktuê hang ksĭ Dhŭng kwar Krah.