Ti anôk rŭ mdơ̆ng Wăl tuh tia mkra mjing Hòa Tâm leh anăn kdrŭn ksĭ Bãi Gốc, ai êwa rŭ mdơ̆ng dôk mjêč. Dŭm pluh boh êdeh mdiăng mnơ̆ng, êdeh kai mbĭt hŏng lu kdrăp maĭ mŏk ngă nanao bruă mkra anôk ala, pŏk êlan mă bruă mkăp kơ hdră bruă.Dŭm klei bi mlih anei dưi mâo mơ̆ng boh tŭ dưn hlăm bruă msir mghaih anôk ala. Hluê si Anôk bruă kriê dlăng Wăl duh mkra Phú Yên, Leh hdră ngă bruă kdlưn hĭn, hdră bruă Wăl tuh tia mkra mjing Hòa Tâm dưi bi leh brei mưn êbeh 215 ha lăn. Ti anôk adôk, dŭm pluh ha anôk ala doh lŏ dơ̆ng ba jao kơ phung duh bi liê. Knŏng kdrŭn ksĭ Bãi Gốc, jih jang 64.9 ha lăn hlăm hang leh jao, mjing klei găl čiăng kơ hdră bruă mphŭn rŭ mkra dŭm mta bruă phŭn hlăm mlan 9 kơ anăp. Đỗ Văn Khánh, K'iăng khua Knơ̆ng bruă duh mkra mnia mblei leh anăn mđĭ kyar anôk bruă nah gŭ wăl tuh tia mkra mjing Hòa Tâm bi mklă:

"Khua knŭk kna ăt msĕ mơh khua gĭt gai bruă Đảng čar ăt mkŏ mjing leh êpul ngă bruă pral pioh kơ bruă ruh mgaih anôk ala msĕ si mrâo anei ăt ktang phĭt. Khua knơ̆ng bruă Hòa Phát ăt ƀuăn rơ̆ng akŏ mlan 9 srăng pŏk ngă, rơ̆ng djăp klei găl kơ hdră bhiăn leh anăn anôk bruă mâo phung ngă bruă čiăng pŏk ngă hluê ngă."

Amâo djŏ knŏng ti Hòa Tâm, hdră mtlaih êngiê anôk ala ăt dôk mjing klei bi mlih ti lu hdră bruă phŭn mkăn. Ti hdră bruă Ƀuôn Buĭp, hlăm Hdră bruă Knơ̆ng kdơ̆ng êa Yên Ngựa, să Liên Sơn Lắk, dŭm êpul ngă bruă dôk păn kjăp alŭ wăl, bi hgŭm ksiêm yap, bi leh hră mơar tla hnô. Truh ară anei, êbeh 8.34 ha mơ̆ng 31 gŏ sang dưi bi mklă hdră tla hnô hŏng ênoh êbeh 10.6 êklai prăk; gưl 2 ăt bi leh ksiêm yap, gĭr bi leh hrui mă lăn hlăm mlan 8 čiăng ba jao anôk ala ngă bruă. Nguyễn Anh Tú, Khua anôk bruă sang čư̆ êa să Liên Sơn Lắk lač:

"Ară anei mkŏ mjing leh dŭm êpul hâo hưn, nao truh hŏng mnuih ƀuôn sang. Knơ̆ng bruă duh mkra bi hgŭm hŏng Anôk bruă ngăn dŏ mơ̆ng Êpul hgŭm Ea Kar ksiêm yap leh anăn ngă mtam."

Khădah lu hdră bruă mâo leh klei bi mlih, ruh mgaih anôk ala ăt jing klei kpăk prŏng hĭn mơ̆ng bruă duh bi liê knŭk kna. Hluê si Anôk bruă kriê dlăng hdră bruă duh bi liê rŭ mdơ̆ng bruă êlan klông leh anăn Lŏ hma mđĭ kyar krĭng ƀuôn sang čar Dak Lak, anôk bruă dôk kriê dlăng 35 hdră bruă, hlăm anăn 17 hdră bruă ăt kpăk anôk ala leh anăn mkra mlih hdră bruă. Knŏng bruă tla hnô dôk kpăk ti 19 să, hmăi klă anăp kơ hdră ngă bruă leh anăn bi liê. Trần Tiến Đông, Khua Anôk bruă kriê dlăng hdră bruă duh bi liê rŭ mdơ̆ng bruă êlan klông leh anăn Lŏ hma mđĭ kyar krĭng ƀuôn sang čar Dak Lak brei thâo:

"Dŭm hdră bruă dôk kpăk gun ka dưi bi liê jih jing hlăm bruă ruh mgaih anôk ala. Bi dŭm hdră bruă mâo leh anôk ala snăn Anôk bruă dôk gĭt gai phung ngă bruă mjêč pŏk ngă hdră bruă, mđing kơ yan adiê jăk čiăng ngă bruă jih hruê mlam, mđĭ pral hnơ̆ng bi leh."

Truh hruê 10/7/2026, čar Dak Lak bi liê leh 2.921 êklai prăk, mâo êbeh 30% hdră kčah dưi jao. Čiăng bi leh mta kñăm đĭ kyar dua ênoh mrô, Knơ̆ng bruă sang čư̆ êa čar mtă kơ dŭm knơ̆ng, dhar bruă, alŭ wăl mđing ruh mgaih dŭm klei gun kpăk kơ hdră čuăl mkă, lăn ala, klei ngă hră mơar duh bi liê, wăl hdĭp mda leh anăn phŭn mkăp mnơ̆ng dhơ̆ng rŭ mdơ̆ng; ksiêm dlăng, msir mghaih jih 396 hdră bruă, anôk bruă êmưt ngă bruă; lŏ dơ̆ng mđĭ lar klei bhiăn "êlan mtah", bi mguôp bruă klam bi liê hŏng Hdră bruă 45 hruê mlam msir mghaih anôk ala leh anăn mđĭ lar bruă klam mơ̆ng 5 êpul ngă bruă hlăm msir mghaih klei dleh dlan hluê si hdră bruă, grăp alŭ wăl. Mta kñăm kčah jing truh jih gưl III bi liê ƀiă êdi 67% hdră kčah prăk, jih gưl IV mâo 92% leh anăn bi leh 100% êlâo kơ hruê 31/1/2027. Đỗ Hữu Huy, Khua knơ̆ng bruă sang čư̆ êa čar Dak Lak mñă klă:

Ksiêm wĭt kluôm hdră mă bruă 6 mlan knhal jih thŭn, bi mklă grăp bruă klam phŭn mơ̆ng mlan 7, mlan 8 leh anăn gưl tal III; mđing msir mghaih bi jih dŭm anôk gun kpăk dôk gun kpăk klei đĭ kyar leh anăn mđĭ kyar. Grăp čô khua gĭt gai brei klă anăp trŭn kơ bruă, klă anăp ksiêm dlăng anôk dôk ngă bruă, klă anăp mă bruă hŏng anôk bruă duh mkra, hŏng phung duh bi liê, hŏng mnuih ƀuôn sang čiăng ruh mgaih klei dleh dlan; ai tiê jing jao bruă brei tuič hnơ̆ng, ƀuăn srăng ngă, leh ngă brei mâo boh tŭ dưn."

Mơ̆ng dŭm klei bi mlih ti dŭm anôk rŭ mdơ̆ng truh kơ klei gĭr ktưn hlăm hdră gĭt gai, kiă kriê, Dak Lak dôk ƀrư̆ ƀrư̆ ruh mtlaih anôk ala, mtrŭt mđĭ hdră duh bi liê knŭk kna. Tơdah dŭm hdră bruă phŭn dưi mtrŭt mđĭ leh anăn ênoh prăk dưi ba pral hlăm hdră duh mkra, anei srăng jing boh kdrŭt yuôm bhăn čiăng kơ čar bi sĭt mta kñăm đĭ kyar dua ênoh mrô hlăm thŭn 2026.