Dak Lak tiŏ nao êpul bruă djŏ tuôm đru kơ mnuih ƀuôn sang msir mghaih klei truh mơ̆ng adiê hjan êa lip ngă
Thứ năm, 10:07, 24/09/2026
Y-Ƀel Êban/ VOV Tây Nguyên
Y-Ƀel Êban/ VOV Tây Nguyên
VOV.Êđê- Klei hjan prŏng sui ngă êngăp êa, klưh hroh ti dŭm alŭ wăl ti Dak Lak. Bruă sang čư̆ êa dôk mjêč đru hrui pĕ boh mnga, mdrơ̆ng lehanăn bi hrŏ klei luič liê kyua adiê hjan êa lip.
Hjan prŏng sui ti lu alŭ wăl nah Ngŏ čar Dak Lak ngă kơ dŭm êtuh ha mdiê, hbei ƀlang ti să Hòa Thịnh êngăp êa. Hluê si alŭ wăl, hlăm brô 300 ha hbei ƀlang lehanăn êbeh 600 ha mdiê mâo klei hmăi. Să iêu mtrŭt leh 15 êpul êdam êra mbĭt hŏng 50 čô knuă druh, lĭng kahan knông lăn trŭn kơ bruă đru kơ mnuih ƀuôn sang mjêč hrui pĕ boh mnga.
Trung đoàn 888, Knơ̆ng gĭt gai lĭng kahan čar Dak Lak, mđĭ 70 čô knuă druh, lĭng kahan wĭt ti să Hòa Thịnh bi hgŭm hrui pĕ ênhă mdiê, hbei ƀlang adôk, bi hrŏ klei luič liê kyua êa lip lêč. Mbĭt hŏng đru kơ mnuih ƀuôn sang, să Hòa Thịnh dôk mkŏ mjing hdră mdrơ̆ng hluê si grăp hnơ̆ng, čŏng pô êpul êya, kdrăp mnơ̆ng, rơ̆ng klei êđăp ênang kơ mnuih ƀuôn sang leh anăn bi hrŏ klei luič liê kyua yan adiê ngă.
Viết bình luận