Hruê tŭ mă anăn knăl 55 thŭn Đảng, Nguyễn Hữu Quyền, ti alŭ 5 Tân Thành, ƀuôn hgŭm Ƀuôn Ama Thuôt, amâo dưi mdăp ôh klei mgei ai tiê hlăk hdơr kơ dŭm thŭn mlan bi blah. Thŭn 1970, ñu nao mŭt hlăm kdrăn mblah leh anăn dưi bi mŭt hlăm Đảng ti krah dliê mtei ti lăn Campuchia. Knŏng êbeh 5 hruê êdei, ƀĭng kahan hưn ñu mŭt hlăm Đảng djiê leh. Klei ƀuăn mơ̆ng pô đảng viên hlăk anăn mguôp hŏng kdrăn mblah, hŏng ƀĭng kahan leh anăn hŏng bruă klam bi blah.

Leh klei bi blah, ayŏng Quyền lŏ dơ̆ng nao hgŭm hlăm bruă giăm 40 thŭn. Mdei bruă mơ̆ng thŭn 2008, ñu ăt nao hgŭm hlăm bruă ti alŭ wăl, mâo 4 wưng păn ngă K’iăng khua bruă Đảng leh anăn lu thŭn ngă Khua êpul hgŭm mnuih khua thŭn. Ti thŭn êgao 80, ayŏng Quyền lač, mdei bruă amâo djŏ mdei bruă klam; đảng viên, êjai dôk mâo klei suaih pral leh anăn klei găl, ăt brei mđĭ lar bruă klam, klei đua klam hŏng êpul êya leh anăn yang ƀuôn.

"Hluê Đảng, mtlaih êngiê djuê ana leh anăn mâo leh klei hdĭp êngiê, êđăp ênang. Anăn jing klei hơ̆k mơak prŏng êdi. Ti gŭ klei gĭt gai mơ̆ng Đảng, ênuk ară anei lŏ čuê aê ama, lŏ čuê čiăng si srăng ngă dưi bi lar knhuah gru mơ̆ng Đảng čiăng mkŏ mjing ala čar drei hluê si Hdră mtrŭn Klei bi kƀĭn tal 14 mơ̆ng Đảng kčah mtrŭn jing truh thŭn 2045 ala čar drei srăng jing sa ala čar đĭ kyar"

Tơdah klei ƀuăn mơ̆ng Nguyễn Hữu Quyền dưi čih ti krah anôk bi blah, snăn klei đăo knang mơ̆ng đảng viên Y Hạ Niê Kdăm, ti alŭ mrô 2 Tân Tiến, ƀuôn hgŭm Ƀuôn Ama Thuôt, dưi lŏ bi kjăp mơ̆ng dŭm thŭn mlan nao bi ktlah nao kơ Dưr êjai mrâo 8 thŭn.

Mơ̆ng thŭn 1955, Y Hạ Niê Kđăm dưi hriăm ti Sang hră Djuê ana Trung ương leh anăn tuôm 3 blư̆ dưi bi tuôm hŏng Awa Hô. Êdei anei, ñu ngă chuyên gia ti Campuchia, leh anăn lŏ wĭt mguôp lu thŭn hŏng bruă mtô bi hriăm leh anăn bruă ksiêm hriăm bruă mtô bi hriăm phung hđeh mnuih djuê ƀiă ti Dak Lak. Hlăm grăp anôk mă bruă, Y Hạ Niê Kdăm mâo nanao klei mñă pô djă pioh knhuah mơ̆ng đảng viên leh anăn lŏ čuê klei đăo knang anăn kơ ênuk gưl êdei.

"Hlăm ênuk mrâo, ênuk gưl mrâo, hŏng đảng viên brei gĭr ktưn kơ klei mĭn mơ̆ng Đảng. Gĭr djă pioh knhuah mơ̆ng mnuih cộng sản, mnuih đảng viên mơ̆ng Đảng".

Dŭm klei yăl dliê mơ̆ng Nguyễn Hữu Quyền, Y Hạ Niê Kdăm brei ƀuh, hŏng lu đảng viên khua thŭn, thŭn dưi bi mlih anôk bruă, bruă ngă, ƀiădah amâo ngă luč ôh bruă klam hŏng êpul êya leh anăn yang ƀuôn.

Hdră mtrŭn 21 mơ̆ng Anôk kriê dlăng bruă Đảng gưl dlông tal XIII hruê 16/6/2022 bi mklă êpul đảng viên jing mta phŭn yuôm bhăn bi mklă klei thâo gĭt gai, ai kdơ̆ng mblah mơ̆ng anôk bruă Đảng nah gŭ; mtă kơ grăp čô đảng viên čŏng pô mjuăt bi hriăm, ba anăp, bi hmô, krơ̆ng kjăp knhuah dôk dơ̆ng ƀơ̆ng huă leh anăn hluê ngă kjăp klei ƀuăn hlăk mŭt Đảng.

Hŏng đảng viên leh wĭt mdei, êjai dôk mâo klei suaih pral, klei thâo leh anăn ai tiê, bruă mđĭ lar bruă klam dưi mphŭn mơ̆ng dŭm mta bruă jĕ giăm: nao hgŭm hlăm klei bi kƀĭn, đru mguôp bruă knuă hlăm alŭ wăl, mtrŭt mjhar mnuih ƀuôn sang hluê ngă hdră êlan, hdră mtrŭn, amâodah lŏ čuê klei thâo kơ phung mda asei.

Dŭm klei đru mguôp anăn amâo mâo hơ̆k kdơ̆k, ƀiădah jing hdră mnuih đảng viên lŏ dơ̆ng djă pioh klei ƀuăn hŏng Đảng hlăm klei hdĭp aguah tlam. Tào Thị Nga, khua kiă kriê anôk bruă ksiêm dlăng mnuih ƀuôn sang čar Dak Lak hđăp, lač klei ba êlan êlâo, bi hmô tal êlâo brei mphŭn mơ̆ng klei djă djăp klei ƀuăn hŏng Đảng leh anăn mnuih ƀuôn sang.

Kâo amâo dưi wơr bĭt ôh êjai dôk ti gŭ hla čhiăm gru Đảng kâo ƀuăn jih klei hdĭp gĭr ktưn kơ lăn čar, kơ mnuih ƀuôn sang, kơ Đảng. 45 thŭn êgao, asei kâo pô bi mĭn mnuih đảng viên msĕ hŏng hmei brei gĭr ktưn leh anăn ngă klei bi hmô čiăng kơ ênuk êdei gĭr jing tui hriăm, kpưn đĭ hŏng ênuk gưl mrâo, năng hŏng lăn čar pô kpưn đĭ hlăm ênuk gưl mrâo mrang”.

Hlăm ênuk bi blah, bruă klam mơ̆ng đảng viên dưi lông dlăng plah wah kdrăn mblah. Hlăm ênuk êđăp ênang, klei ba anăp, bi hmô dưi bi êdah mơ̆ng dŭm bruă jĕ giăm hŏng klei hdĭp: lač nao mbĭt hŏng ngă, jĕ giăm hŏng mnuih ƀuôn sang leh anăn bruă klam hŏng êpul êya.

Hdră mtrŭn 21 mơ̆ng Anôk dlăng bruă Đảng gưl dlông tal XIII mdưm klei čiăng mđĭ hnơ̆ng tŭ jăk êpul đảng viên mguôp hŏng klei mjuăt bi hriăm, ba anăp, bi hmô leh anăn rơ̆ng klei mjĕ giăm hŏng mnuih ƀuôn sang. Klei klah čŭn 58 hruê 26/6/2026 mơ̆ng Phŭn bruă kđi čar gưl XIV lŏ dơ̆ng hluê ngă Hdră mtrŭn 21, mñă klă mkŏ mjing êpul đảng viên mkăp djŏ hŏng klei čiăng hlăm boh klei mrâo.

Hŏng phung đảng viên khua thŭn ti Dak Lak, klei ƀuăn hŏng Đảng dưi lŏ čuê hŏng dŭm bruă ngă klă klơ̆ng, mơ̆ng klei bi kƀĭn bruă Đảng, đru mguôp bruă mbĭt truh kơ mtô klei thâo kơ phung mda asei.