Thŭn 1996, ayŏng Xuin ba pla leh kphê ti hma, hrô kơ hdră pla mdiê, ktơr, giêt plei. Dŭm thŭn tal êlâo, kyua ka thâo hdră dlăng kriê, kphê hrui mâo ƀiă. Amâo êdu ai, ayŏng tui ksiêm, hriăm êmuh, nao hgŭm hlăm dŭm adŭ mjuăt bi hriăm klei kreh knhâo hdră mnêč, nao dlăng dŭm gru hmô pla mjing kphê čiăng ba yua hlăm đang hma… Kyua anăn, mơ̆ng 300 phŭn kphê tal êlâo, truh kơ ară anei ayŏng Xuin pŏk mlar leh ênhă truh 5 ha kphê, hnơ̆ng mâo grăp thŭn êbeh 20 ton asăr.

Amâo djŏ knŏng ngă bruă duh mkra mbruă, ayŏng Xuin lŏ hur har nao hgŭm hlăm bruă ti alŭ wăl. Mơ̆ng sa čô khua bruă êdam êra hur har, ayŏng dưi bi mŭt hlăm Đảng. Thŭn 2010, hŏng klei đăo knang leh anăn bruă klam mơ̆ng pô, ayŏng mâo mnuih ƀuôn sang đăo knang ruah ngă Khua ƀuôn, leh anăn dưi ruah ngă Khua bruă Đảng ƀuôn Kdăng. Ayŏng Xuin mĭn nanao kơ hdră duh ƀơ̆ng sui thŭn mơ̆ng mnuih ƀuôn sang:

“Êlâo dih kâo ngă khua ƀuôn, lu gŏ sang hriê kơ sang akâo kâo čih hră čhĭ lăn, kâo amâo čih ôh. Leh anăn knŏng brei diñu ƀuh dŭm čô mnuih hlăm ƀuôn mâo lăn lu, čhĭ ƀrư̆ ƀrư̆, knhal tuč lŏ ngă bruă mưn kơ arăng, hdĭp hlăm klei knap mñai. Mnuih ƀuôn sang drei knŏng ngă lŏ hma, hdĭp hŏng bruă knuă, amâo thâo čhĭ mnia. Čhĭ lăn snăn ya mnơ̆ng ƀơ̆ng, ya mnơ̆ng čiăng tlaih ƀun. Msĕ si kâo êlâo dih ăt ƀun mơh, amâo mâo lăn pioh ngă bruă, gĭr ngă bruă, mkiêt mkriêm, lŏ blei thiăm lăn, hriăm êmuh, nao hgŭm hlăm klei mtô bi hriăm kơ hdră dlăng kriê wiê ênăk mnơ̆ng pla mjing snăn kơh dưi mâo msĕ si ară anei”.

Dưi djă pioh lăn, ƀiădah si ngă čiăng kơ mnuih ƀuôn sang mâo hnư hrui wĭt mơ̆ng lăn? Mbĭt hŏng ênoh prăk đru mơ̆ng Knơ̆ng prăk đru ba yang ƀuôn, ayŏng Xuin lŏ bi mguôp hŏng dŭm knơ̆ng bruă kphê ti alŭ wăl, đru kơ mnuih ƀuôn sang bi mguôp leh anăn mđĭ boh tŭ bruă pla mjing.

Jing đảng viên, ƀĭng ngă lŏ hma mbruă gưl čar, ayŏng Xuin kah mbha leh klei thâo, đru kơ lu gŏ sang dleh dlan kpưn đĭ tlaih kơ ƀun. Amai Kyăh, ti ƀuôn Kdăng, brei thâo:

"Kyua mâo Đảng, Knŭk kna uêñ mĭn đru kơ kâo êmô ana mđai, ngă kơ sang. Mâo anôk dôk kjăp, gŏ sang gĭr kriê dlăng êmô, mă bruă leh anăn mâo ayŏng Xuin bi hriăm pla, kriê dlăng kphê snăn gŏ sang kâo dưi tlaih leh mơ̆ng klei ƀun ƀin. Thŭn anei ăt gĭr ngă sang mrâo anei".

Đan, Khua anôk bruă mặt trận čar kwar Việt Nam să Kdang, čar Gia Lai, brei thâo ayŏng Xuin jing sa čô đảng viên êdah êdi ti alŭ wăl. Leh bi mŭt alŭ, ayŏng lŏ nao hgŭm hlăm Êpul răng mgang klei êđăp ênang ti nah gŭ.

“Êlâo adih ayŏng Xuin gĭr ktưn amâo bi siñê ôh hră mơar kơ mnuih ƀuôn sang čhĭ lăn, lu mnuih bi êmut, ƀiădah ară anei digơ̆ bi mni kơ ñu lu snăk. Ñu amâo uêñ kơ klei dleh dlan, jih ai tiê hŏng bruă knuă, mjing klei đăo knang hlăm mnuih ƀuôn sang, đru mguôp yuôm bhăn ba hdră êlan mơ̆ng Đảng, hdră bhiăn mơ̆ng Knŭk kna mŭt hlăm klei hdĭp. Kơ bruă duh mkra snăn ayŏng jing sa hlăm dŭm gŏ sang ngă bruă duh mkra thâo mbruă êdi hlăm ƀuôn”.

Ară anei lu gŏ êsei Bahnar ti ƀuôn Kdăng mâo leh dŭm đang kphê ba wĭt hnư hrui wĭt mơ̆ng 400 truh kơ 500 êklăk prăk hlăm grăp thŭn; lu gŏ êsei rŭ mdơ̆ng leh sang dôk prŏng siam. Hŏng ayŏng Xuin, djă pioh lăn amâo djŏ knŏng djă pioh mnơ̆ng yua mă bruă, ƀiădah lŏ jing djă pioh hdră duh ƀơ̆ng sui thŭn kơ mnuih ƀuôn sang. Klei yăl dliê mơ̆ng đảng viên anei ăt brei ƀuh, êjai knuă druh giăm mnuih ƀuôn sang, thâo săng mnuih ƀuôn sang leh anăn jhŏng đua klam, hdră êlan mơ̆ng Đảng, hdră bhiăn mơ̆ng Knŭk kna srăng dưi bi klă hŏng dŭm klei bi mlih mơ̆ng ƀuôn sang.