Sa hruê mlan 10, Pô jhŏng ktang hlăm êpul lĭng kahan yang ƀuôn Phan Nhạn mơ̆ng Nha Trang lŏ wĭt čuă kdrŭn ksĭ  Vũng Rô, să Hòa Xuân, čar Dak Lak. 95 thŭn, jơ̆ng awăt leh, knga kngăl leh, ƀiădah klei thâo săng mơ̆ng khua kŭm păn thŭn anăn  ăt adôk êmăt êdi. Ñu hdơr kơ klei găn leh hlăm êlan hing ang 65 thŭn êlâo:

“Gưl tal êlâo jing Phạm Hùng leh anăn Phạm Văn Đồng hriê hưn hŏng hmei snei: Mnuih ƀuôn sang leh anăn lĭng kahan mtlaih êngiê dôk guôn jih jang diih. Hmei nao leh jih 7 hruê 8 mlam kơh truh ti Cà Mau."

Hlăm hdră kdơ̆ng mblah Mi mtlaih êngiê, Pô jhŏng ktang lĭng kahan Phan Nhạn, Khua kŭm păn amâo mâo mrô, nao hgŭm hlăm 15 gưl kŭm păn ba phao ktang mŭt hlăm kdrăn mblah kwar Dhŭng. Ară anei dôk ti ƀuôn hgŭm Nam Nha Trang, čar Khánh Hòa, 4 yan hmư̆ ênai êa ksĭ, Pô jhŏng ktang Phan Nhạn hĭn mơh hdơr kơ dŭm gưl kŭm păn hƀuê ênuk, mâo wưng găn êa ksĭ ala tač êngao leh anăn mŭt ti kdrŭn ksĭ. Ăt mâo dŭm gưl ñu čŏng čuh pui bi rai kŭm păn leh anăn bi blah hŏng phung roh čiăng răng mgang klei hgăm kơ êlan:

  Kŭm păn pô nao  ti êa ksĭ mdiăng ƀiă êdi hlăm brô 1.5 ton put mtuh. Čuh hŏng klei pui ƀơ̆ng. Ama ăt jing mnuih mkă  mmông, dưm anôk čuh put, truh mmông mâo asăp mtă brei mtuh kŭm păn. Ruă ai pô ăt tŭ mơh, bi rai jih kŭm păn yơh."

Tơdah msĕ si khua dlăng masin jing kboh mơ̆ng kŭm păn snăn khua kŭm păn jing mngăt êwa mơ̆ng kŭm păn. Grăp thŭn, tơdah truh kơ wưng bi hdơr êlan Hồ Chí Minh ti êa ksĭ, bi hdơr kơ kdrŭn Vũng Rô, pô jhŏng ktang lĭng kahan yang ƀuôn Hồ Đắc Thạnh, khua kŭm păn amâo mrô lŏ wĭt kơ kdrŭn. Ăt ti anôk anei, ñu mbĭt hŏng ƀĭng hgŭm mâo klei thâo mĭn, jhŏng ktang, găn hgao klei phung roh ngă, ba 3 kŭm păn truh kơ kdrŭn êđăp ênang, dŭ ba giăm 200 ton phao ktuang kơ Vũng Rô, đru kơ kdrăn mblah Phú Yên leh anăn dŭm čar krĭng 5. Pô jhŏng ktang Hồ Đắc Thạnh yăl dliê kơ gưl bi tuôm hŏng phung roh hlăm kŭm păn tal êlâo truh kơ kdrŭn Vũng Rô thŭn 1964:

:" Hlăm gưl nao anăn, êjai kŭm păn nao ti krĭng êa ksĭ mơ̆ng Quảng Nam Đà Nẵng truh Bình Định snăn êdeh phiơr suang dlăng mơ̆ng phung roh ñu phiơr ti dlông  nanao kŭm păn kâo. Leh ñu phiơr mŭt hlăm hang snăn dua boh kŭm păn phung roh kbiă hŏng hnơ̆ng pral snăk, êran truh giăm kŭm păn 41 hmei leh anăn ñu nao mđrĭng mbĭt. Jih jang phao ktuang hlăm kŭm păn pŏk , knăm kơ kŭm păn kâo. Klei hŭi hyưt êdi msĕ aruăt klei brô̆. Tơdah phung roh ƀuh kŭm păn kâo jing kŭm păn mdiăng phao ktuang mơ̆ng  kwar Dưr snăn bi kdơ̆ng mtam. Kâo ăt dôk hơĭt msir boh klei. Leh 1 mmông ksiêm dlăng, amâo mâo klei ƀuh ôh hlăm kŭm păn anei snăn diñu đuĕ yơh. Snăn anăn jing mmông  jĕ hŏng klei djiê leh anăn hdĭp."

Bi hŏng Hoàng Gia Hiếu, kkiêng leh anăn đĭ hriê kơ prŏng ti krĭng êa ksĭ Hải Phòng, grăp blư̆ knăm bi hdơr hruê knhuah gru êlan Hồ Chí Minh ti êa ksĭ, Hiếu lŏ nao ti kdrŭn ksĭ K15 Hải Phòng čiăng čuh brui mngưi kơ ƀĭng kahan. Ñu jing pô mă bruă hlăm kŭm păn, kreh luê suang dlăng  êlâo kơ mran mŭt hlăm kdrŭn ksĭ. Rup ƀĭng kahan pô jhŏng ktang djiê êngiă dôk  nanao hlăm ai tiê  klei mĭn ñu.

" Gưl anăn mŭt hmei hluê ngă hdră êlan phưi mnơ̆ng, leh snăn mmông anăn hlăm brô 4h aguah leh snăn klei gĭt gai mơ̆ng khua gĭt gai brei ayŏng adei đuê̆ mơ̆ng kŭm păn čiăng bi rai kŭm păn. Mmông anăn kŭm păn mtuh ktang êdi, kâo hŏng ayŏng Tự êka ƀiă, ayŏng Thạnh amâo mâo klei truh ôh. Ayŏng Đọc hŏng Nhợ djiê."

Hlăm 14 thŭn pŏk êlan Hồ Chí Minh hlăm êa ksĭ, mâo 94 čô knuă druh lĭng kahan djiê êngiă. Grăp thŭn, hlăm hruê knhuah gru êlan Hồ Chí Minh hlăm êa ksĭ 23/10 leh anăn dŭm hruê knăm bi hdơr, Phung lĭng kahan hđăp êpul kŭm păn amâ mâoi mrô lŏ wĭt ti dŭm kdrŭn ksĭ hlăm ktuê dlông lăn čar čiăng čuh brui mngưi bi hdơr kơ ƀĭng kahan. Dŭm kwang mnga mâo dŭm ênuk gưl phưi hlăm êa ksĭ. Klei săn asei mơ̆ng phung ayŏng adei mjing leh klei yăl dliê hlăm hdră kdơ̆ng mblah Mi mtlaih êngiê djuê ana mơ̆ng djuê ana, čiăng kơ ƀuôn sang, lăn čar dưi mâo hruê mơak tŭ dưi.